Asonekene Mateu

9 Chocho, Yesu yanjila mu wato, yazauka, yaya mu sali, yanjila mu chihunda cho. 2 Hazehene, yamunehena lunga mukwa-kalepa, wakupombesa ha chipoya. Ha kumona ufulielo wo, Yesu yamba kuli mukwa-kalepa ngwenyi: “Hamuka, mwanami! Shili ye hakukonekenayo.” 3 Ha chikuma chino, alongeshi a shimbi yaputuka kunyonga mu mbunge yo ngwo: “Mutu yono kanatukana.” 4 Alioze, Yesu ha kunyingika manyonga jo, yaahula ngwenyi: “Mumu liaka nunanyongo yuma yipi mu mbunge jenu? 5 Achinyongenu, chuma chika chashi kwamba, shina kwamba ngwo: ‘Shili ye hakukonekenayo,’ nyi kwamba ngwo, ‘Katuka hanga wende?’ 6 Alioze, mba nunyingike ngwenu, Mwana-mutu kali ni ndundo hano hashi ja kukonekena shili—” Yesu yamba kuli mukwa-kalepa ngwenyi: “Katuka, anda chipoya che, yako ku zuwo lie.” 7 Mba iye yakatuka, yaya ku zuwo lienyi. 8 Muze mbunga hachimona, yevwa woma, yahalisa Zambi, yoze wahanyine chiyulo chacho kuli atu.

9 Muze Yesu haya ndambu kulutwe, yamona umwe lunga jina lienyi Mateu kanatwama ku zuwo lia kufwetela lijimu, yamwamba ngwenyi: “Pwako kambaji kami!” Chocho iye yakatuka, yamukaula. 10 Ha kupalika cha amwe mashimbu, muze Yesu te anali mu zuwo, akwa-kufwetesa lijimu anji ni yivulumunyi yaheta, yaputuka kulia hamwe ni Yesu ni tumbaji twenyi. 11 Hakuchimona, A-Fwariseu yahula tumbaji twenyi ngwo: “Mumu liaka longeshi wenu anali hamuwika ni akwa-kufwetesa lijimu ni yivulumunyi?” 12 Muze Yesu hachivwa, yamba ngwenyi: “Atu ahinduka keshi kufupa ndotolo,* alioze waze ayiza e akumufupa. 13 Kashika, yeenu nulilongese ulumbunwiso wa maliji wano anambe ngwo: ‘Ngunazange keke hi mulambu ko.’ Mumu chejile ni kufupa akwa-ululi, alioze yivulumunyi.”

14 Hohene, tumbaji twa Yoano yakundama kuli iye ni kumuhula ngwo: “Mumu liaka yetu ni A-Fwariseu twakulitwamina kulia, alioze tumbaji twe ka?” 15 Yesu yamba kuli ayo ngwenyi: “Shina masepa ja sandungi mahasa kunenganyana shimbu sandungi uchili hamwe no? Alioze, mukwiza matangwa waze sandungi kechi kapwa hamwe no, mba o makalitwamina kulia. 16 Niumwe mutu yoze wakunukina chihanda cha hina liaha helu lia hina likulu wakuhi, mumu chihanda cha hina liaha, muchipula hina likulu, mba chituwa cha hina liacho muchitohwa chinji. 17 Chikwo nawa, atu keshi kulonga vinyu yaha mu tuku jikulu. Nyi machilinga, tuku muyipulika, vinyu muyimwangana ni je tuku mujipiha. Alioze, atu kakulonga vinyu yaha mu tuku jaha, mba yeswe yaali mayifunga kanawa.”

18 Muze te anaalweze yino yuma, umwe mukwa-kuyula yakundama, yaliumba kuli iye ngwenyi: “Mwanami wa pwo kota hafwa, tweya kama umusayike kwoko lie hanga apwe cheka ni mwono.”

19 Chocho Yesu yakatuka, hamwe ni tumbaji twenyi yamukaula. 20 Umwe pwo yoze te wakupinda ni musongo wa kuhita manyinga ha miaka 12, yakundama kunyima lia Yesu, yakwata ku songo lia mazalo jenyi, 21 iye te kananyongo mu mbunge yenyi ngwenyi: “Nyi mungukwata wika ku mazalo jenyi, munguhinduka.” 22 Yesu yatewuluka, yamumona, yamba ngwenyi: “Hamuka, mwanami! Ufulielo we wakuuka.” Kukatuka ha tangwa lize, pwo yahinduka.

23 Muze ahetele ku zuwo lia mukwa-kuyula mu sunangonga, yawana akwa-kwimba miaso ya yinyengo* ni chizungo-zungo cha mbunga, 24 Yesu yamba ngwenyi: “Tuhukenu, mumu mwana-pwo kafwile; alioze kanapombo.” Ha kwivwa chocho, ayo yaputuka kumuseha ni kumulelesa. 25 Muze hatuhwisa mbunga haze, iye yanjila mu zuwo, yakwata mwana pwo ku kwoko, mba mwana-pwo yahinduka. 26 Hohene, lusango wacho yalimwanga mu chifuchi cheswe.

27 Muze Yesu hakatuka ku chihela chacho, yenda kachipinji, mba tupuputa aali yaputuka kumukaula ni kukololoka ngwo: “Tuvwile kama keke, Mwana wa Ndawichi.” 28 Muze Yesu hanjila mu zuwo, tupuputa jacho yaya kuli iye, Yesu yaahula ngwenyi: “Yenu nunafuliela ngwenu yami munguhasa kuchilinga?” Ayo yamukumbulula ngwo: “Ewa, Mwene.” 29 Mba Yesu yakwata mu meso jo, yamba ngwenyi: “Chilingiwe kulita ni ufulielo wenu.” 30 Hazehene, ayo yaputuka kumona. Chikwo nawa, Yesu yaatoweza ngwenyi: “Niumwe kanda achinyingika.” 31 Alioze muze ayo atuhukile, yamwanga lusango wenyi mu chifuchi cheswe.

32 Muze te anayi kwo, yikusoloka amwe atu, yamunehena umwe lunga kamama, yoze te uli ni ndemoniu. 33 Muze ndemoniu wacho amutuhwishile, kamama yaputuka kuhanjika. Mbunga yakomoka ni kwamba ngwo: “Kanda tuchimona kama chuma ngwe chino mu Izalele.” 34 Alioze A-Fwariseu kapwile ni kwamba ngwo: “Kakutuhwisa andemoniu ni tachi ja mwata wa andemoniu.”

35 Yesu yaya mu mambonge eswe ni mu yihunda yeswe, ni kulongesa mu masunangonga jo, ni kwambujola sango jipema ja Wanangana ni kuuka misongo yeka ni yeka, ni weji weswe. 36 Ha kumona mbunga, yevwila keke, mumu kapwile ni kwamwesa lamba ni kwalengulula ngwe mapanga waze keshi kafunga. 37 Iye yamba kuli tumbaji twenyi ngwenyi: “Kuli milimo yinji, alioze akwa-kuyilinga akehe. 38 Kashika, etenu kuli Mwenya-milimo hanga atume akwa-milimo anji alinge milimo yenyi.”