Yesu kanakajikijila hali tumbaji twenyi chipwe ngwe ayo kapwile ni kuhengesa. (Yoa. 15: 16) Tiangu ni Yoano etele Yesu hanga aehele chihela chilemu mu Wanangana, Yesu kakaamwene ngwe akwa-kuzo hanji kwamona ngwe katelele kupwa apostolo. (Marku 10:​35-40) Kulutwe, ha ufuku uze akwachile Yesu tumbaji twenyi eswe yamuhichika ukawenyi. (Mateu 26:56) Alioze, Yesu kakechele kwafuliela. Iye kanyingikine kanawa uhenge wo, chipwe chocho yanunga ni kwazanga “ndo ku songo.” (Yoa. 13:1) Muze amuhindwishile, Yesu yahana chiteli chilemu kuli apostolo jenyi ashishika 11 hanga alinge mulimo wa kutayisa tumbaji ni kufunga mapanga jenyi. (Mateu 28:​19, 20; Yoa. 21:​15-17) Ujikijilo wenyi hali malunga wano yihenge kuwakalitokelele. Ayo eswe kanungine ni kushishika ndo ku kufwa cho. Chochene, Yesu kahichikile yilweza yipema ya kujikijila hali akwo. w22.09 6 ¶12

Nyi mutupwa ni shindakenyo ngwetu, Yehova kakutuzanga nawa manunga ni kupwa sali lietu, kutuchi kwivwa woma wa Satana. Chakutalilaho, mukwa-kusoneka Samu 118 kapalikile mu yimwe yuma yikalu chinji. Iye kapwile ni akwa-kole anji, amwe a kuli ayo te miata (versu 9, 10). Ha mashimbu amwe, kapwile ni kumupinjisa chinji (versu 13). Nawa kamuhele fumbo linene kuli Yehova (versu 18). Chipwe chocho, iye yasoneka ngwenyi: “Chichi kwivwa woma.” Iye kanyingikine ngwenyi, chipwe ngwe Yehova kamufumbile, nihindu kakumuzanga. Nawa kapwile ni shindakenyo ngwenyi chipwe ngwe mapalika mu yipikalo yeswayo, nihindu Tato wa zango te manunga ni kumukwasa. (Samu 118:29) Twatamba kupwa ni shindakenyo ngwetu Yehova kakutuzanga. Shindakenyo yino, muyitukwasa kukumba woma uze twakwivwa ha yikuma yitatu, (1) woma wa kuhona kulisa usoko wetu, (2) kuvwila atu woma, ni (3) woma wa kufwa. w22.06 15 ¶3-4

Sako shindakenyo ngwe uwayilo we kuli Yehova uli ha chihela chitangu. Yehova kali Sakatanga yetu nawa katela uwayilo wetu. (Uso. 4:11; 14:​6, 7) Kashika, chuma chilemu ku mwono wetu, chatamba kupwa kuwayila Yehova mu jila yalita “ni spiritu ni umwenemwene.” (Yoano 4:​23, 24) Chino chinalumbunuka kutayiza hanga uwayilo wetu ausongwele ni ukwaso wa spiritu yisandu ya Zambi, kulita ni umwenemwene uze uli mu Mbimbiliya. Kuwayila Yehova chatamba kupwa ha chihela chitangu ku mwono wetu, chipwe ngwe twatwama mu chifuchi chize mulimo wetu uli wakukanjisa. Unji wa mandumbu jetu kuhiana 100 kali mu mazuwo a ususu mumu lia kupwa Yela ja Yehova. Chipwe chocho, ayo kakuwahilila ha kulinga yize mahasa hanga alembe, kulilongesa ni kwambulwila akwo hakutwala kuli Zambi ni Wanangana wenyi. Chipwe muze akutwamba hanji kutuhungumiona, twakuwahilila ha kunyingika ngwetu Yehova kali hamwe ni yetu nawa makatuwahisa.—1 Petu. 4:14. w22.10 9 ¶13