Asonekene Mateu
3 Ha matangwa waze, Yoano Chipapachisa yaya ni kwambujola mu puya ya Yundeya, 2 ni kwamba ngwenyi: “Likonyekenu, mumu Wanangana wa mu malilu hiwakundama.” 3 Pundu, yono kali yoze profeta Izaia ambile ni maliji wano ngwenyi: “Liji lia umwe mutu linakololoka mu puya ngwo: ‘Luliekenu jila ya Yehova!* Lulamisenu matapalo jenyi.’” 4 Yoano kapwile ni kuzala mazalo a wona wa kamelu ni muya wa lambu mu zalilo. Kulia chenyi chapwile mapasu ni uchi wa mu musenge. 5 Atu a mu Yerusaleme ni a mu Yundeya yeswe ni a mu mambonge eswe alisulangana ni Yordau, ejile kuli iye 6 ni kumulweza shili yo yeswe, chocho iye waapapachishile mu Lwiji Yordau.
7 Muze amwene A-Satuseu ni A-Fwariseu anji kanakundama kuze apwile ni kupapachishila atu, Yoano yamba kuli ayo ngwenyi: “Yenu ana ja yihili, iya wanulweza ngwenu, munuhasa kuchina upatwilo uze muukeza? 8 Kashika, sololenu mu yitanga yenu ngwenu nwalikonyeka. 9 Kanda nulisamba ngwenu: ‘Tuli ana ja Apalahama.’ Pundu ngunambe kuli yenu ngwami, Zambi mahasa kwalumuna mawe wano hanga apwe ana ja Apalahama. 10 Njimbu ku miji ya mitondo yili. Kashika mutondo weswe kuushi kwima mihuko yipema, makaupatula ni kuukonga mu kahia. 11 Yami ngunanupapachisa ni meya, mumu lia kulikonyeka chenu, alioze yoze meza hanyima liami, kananguhiana, yami chishi ni ulite wa kuzula sapato* jenyi. Iye makanupapachisa ni spiritu yisandu ni kahia. 12 Chifujilo mu kwoko lienyi chili hanga ahandunune tiliku ni mwambu, ni kupemesa kanawa chizungwilo chenyi, tiliku yenyi makayikungila mu chihela cha kutulikila mbuto,* alioze mwambu makawocha mu kahia kaze kechi kahasa kukajima.”
13 Yesu yakatuka ku Ngalileya, yaya ku Yordau kuli Yoano hanga amupapachise. 14 Alioze, Yoano yazanga kumukwika ni kwamba ngwenyi: “Yami mwe natamba kwiza kuli yena hanga ungupapachise, kuchi mba yena uneza kuli yami?” 15 Chocho Yesu yamukumbulula ngwenyi: ”Echa hanga chino chilingiwe haliapwila, mumu nyi chalingiwa, mutumanununa yuma yeswe ya ululi.” Mba Yoano yatayiza. 16 Muze Yesu hamupapachisa, hazehene yatutuka mu meya, shimbu lizeliene malilu yazuluka, mba yamona spiritu ya Zambi yinahulumuka ngwe liembe ni kwiza hali iye. 17 Chikwo nawa, liji yiliza mu malilu ngwo: “Yono mwe Mwanami, yoze nazanga chinji, muli iye ngunawahilila.”