Kuli A-Roma
13 Mutu mweswe, chamutamba kwononokena* akwa-kuyula, mumu chiyulo cheswe chakukatuka kuli Zambi; kukushi mukwa-kuyula niumwe, shina yoze Zambi hanatayiza. 2 Kashika, yoze malimika ni mukwa-kuyula, malimika ni chiyulo* cha Zambi; waze malimika ni chiyulo chacho, makaapatwila. 3 Mumu waze akulinga yipema keshi kuvwila akwa-kuyula woma, alioze shina waze akulinga yipi, enoo akwevwila woma. Kuwazangile kuvwila mukwa-kuyula woma nyi? Linga yipema, mba makakuchichimieka. 4 O kali tuvumbi twa Zambi ha upeme we. Alioze, nyi wakulinga yuma yipi, watamba kwivwa woma mumu o katambwile ulite ni chiyulo cha kumwesa lamba yoze malinga yuma yipi. Kali tuvumbi twa Zambi hanga akale ni kutenukina waze akulinga yuma yipi.
5 Kashika, chanutamba kwononoka hi mumu lia utenu wika ko, alioze nawa, mumu lia shimbi yenu ya mbunge. 6 Yenu nwakufweta lijimu mumu lia chikuma chino; se o kali tuvumbi twa Zambi waze akuhondangana chinji mu milimo yino. 7 Hanenu kuli eswe yize atela kutambula: Yoze meta lijimu, mwehenu lijimu; yoze meta milambu, mwehenu milambu; yoze meta kumuvwila woma, muvwilenu woma; yoze meta ulemu, mulemesenu.
8 Kanda nukapwa ni kongo kuli mutu niumwe, shina kulizanga umwe ni mukwo; mumu yoze mazanga mukwo, hanamanununa shimbi. 9 Shimbi jinambe ngwo, kanda ulinga upangala, kanda ushiha mutu, kanda wiya, kanda wivwa chipululu, Shimbi jino jeswe ni jikwo nawa jinaswila mu Shimbi yino yimuwika ngwo: “Zanga mwenyembo we ngwe chize wakulizanga yena mwene.” 10 Zango kulishi kulinga chipi kuli mwenyembo wenyi; kashika, zango linapu che kumanununa cha shimbi.
11 Lingenu chino, mumu nunanyingika ha mashimbu waze tuli, ola hiyaheta yakulaula mu tulo, mumu ulamwino wetu uli hakamwihi kuhiana muze te twachipwa akwa-kufuliela. 12 Ufuku wasala hakepe uhwe; tangwa hiliakundama. Kashika tumbilenu yitanga ya milima ni kuzala mata a pangu. 13 Chatutamba kupwa ni ndako jipema ngwe akwa-pangu, kanda tulinga yiwanyino ya chimbangwinya, kanda tuzengewa, kanda tulinga utanji, kanda tulinga yitanga ya sonyi, kanda tupwa akwa-vunda chipwe akwa-ukwa. 14 Alioze, kaulenu chilweza cha Mwene wetu Yesu Kristu. Chikwo nawa, kanda nulianga kutesa chize munumanununa usolo wa musunya.