Usolwelo wa Yesu Kristu Alwezele Kuli Yoano
1 Usolwelo wa Yesu Kristu, uze Zambi amuhele, hanga asolole kuli ndungo jenyi yuma yize yatamba kulingiwa ni kawashi. Yesu watumine mungelo wenyi, mba kupalikila muli iye walwezele usolwelo wacho kuli ndungo yenyi Yoano mu yilayi. 2 Mwenawo wahanyine uchela wa liji lize liakatukile kuli Zambi, ni uchela uze Yesu Kristu ahanyine, ewa, wa yuma yeswe yize amwene. 3 Kawaha yoze matanga ni liji linene ni waze mevwa maliji a uprofeto uno ni kwononokena yuma yeswe yize yinasonewamo, mumu shimbu lize atesele linakundama.
4 Yami Yoano, ku yikungulwila shimbiali ya mu mbonge ya Azia:
Nukapwe ni chawana cha keke ni sambukila ya kuli Zambi “Yoze uliko, yoze wapwileko, yoze makeza,” ni ya kuli spiritu shimbiali waze ali kulutwe lia ngunja yenyi, 5 ni ya kuli Yesu Kristu, “Chela Wamwenemwene,” “mutangu kuhinduka hakachi ka afu” ni “Mukwa-kuyula hakachi ka mianangana a hashi.”
Yoze wakutuzanga watutuswile ku shili yetu kupalikila mu manyinga jenyi— 6 watupwishile mianangana, asasendote kuli Zambi yenyi kanda Tato—ewa, uhenya ni ndundo yikapwe kuli iye ndo ku miaka ya mutolo. Amene.
7 Talenu! Iye kaneza mu malelwa, mutu mweswe makamumona, chipwe waze amutuwile. Mavungu eswe a hashi makalila mbimbi mumu hali iye. Ewa, Amene.
8 “Yami nguli Alfa ni Omega,”* chocho anambe Yehova* Zambi, “Yoze uliko, yoze wapwileko, yoze makeza, mwe Mukwa-Ndundo-Jeswe.”
9 Yami ndumbwenu Yoano, mukwa-kulianyina-ni-mukwenu mu luyinda, mu wanangana ni ha kunyongonona mu kulinunga ni Yesu, napwile mu tungu avuluka ngwo Patemu, mumu lia kuhanjika hakutwala kuli Zambi ni ha kuhana uchela wa Yesu. 10 Kupalikila mu spiritu, napwile ha tangwa lia Mwene, mba nevwile kunyima liami liji linene lize liapwile ngwe zungo lia chitavwi, 11 linambe ngwo: “Soneka yuma yize unamono ha chimwe chivungo ni kuchituma ku yikungulwila yino shimbiali: Ku Efwesu, ku Semina, ku Perekamu, ku Tayatera, ku Sarte, ku Filadelfia, ni ku Laotesea.”
12 Natewulukile hanga ngumone yoze unahanjika ni yami, mba ha kutewuluka yingumona yikwachilo ya ndeya ya oru shimbiali, 13 mukachi ka yikwachilo yacho, umwe walifwa ni mwe Mwana-mutu kanazala mazalo waze ahetele ndo ku yiliato ni kulijichika muya wa oru ha tulo. 14 Chikwo nawa, mutwe wenyi ni kambu jenyi japwile jitoma ngwe wanda utoma, ngwe neve. Meso jenyi apwile ngwe mulengi wa kahia, 15 molu jenyi yahenya ngwe unengu uze wakusayisa mu jiko lia kahia, liji lienyi liapwile ngwe zungo lia meya anji. 16 Te kanakwata tutongonoshi shimbiali ha kwoko lienyi lia chindume. Mu kanwa lienyi, mwatuhukile mukwale usuku wambuka wa lutwilo mwaali, ku meso* jenyi kwapeyimine ngwe chize tangwa liakupeyima ni tachi. 17 Muze namumwene, nafulamanyine ku yiliato yenyi ngwe nguli mufu. Iye wasayikile kwoko lienyi lia chindume hali yami ni kwamba ngwenyi:
“Kanda wivwa woma. Yami nguli Mutangu ni Kasula-songo, 18 ni yoze uli ni mwono. Nafwile, alioze haliapwila nguli ni mwono cheka nawa ndo ku miaka ya mutolo, nguli ni sapi ja kwazulula chikolo cha kufwa ni cha Fuka.* 19 Kashika, soneka yuma yize hiwamona, yuma yize yinalingiwa haliapwila ni yuma yize muyikalingiwa kulutwe lia yino. 20 Chino chili chijimbikilo chisandu cha tutongonoshi shimbiali waze hiwamona ku kwoko liami lia chindume ni yikwachilo shimbiali ya ndeya ya oru: Tutongonoshi shimbiali kanalumbunuka angelo a mu yikungulwila shimbiali, yikwachilo shimbiali yinalumbunuka yikungulwila shimbiali.