Mukanda wa Tiangu
2 Mandumbu jami, shina nunakakaminya ku ufulielo muli Mwene wetu wa uhenya Yesu Kristu, aku nunasolola nawa katonde mukachi kenu? 2 Mumu nyi umwe mutu manjila mu kukunguluka chenu, ni tuzeya a oru ku minwe ni mazalo apema, alioze umwe chiswale yoze unazala mazalo api neye manjilamo, 3 shina nwakulemesa yoze unazala mazalo apema, ni kwamba ngwenu: “Twama aha, ha chihela chilemu,” alioze munwamba kuli chiswale ngwenu: “Mana kwilu,” hanji ngwenu: “Twama haze nakusa molu jami”? 4 Nyi chenacho nwakulinga, kunwamwene ngwenu nunalihandununa mukachi kenu, ni kulipwisa sopi waze akusopesa chipi?
5 Panjikenu, mandumbu jami a zango. Ngwami Zambi kasakwile atu waze akumona kuli akwa-hashi ngwe yiswale hanga apwe pichi ku ufulielo ni kupwa maswana ja Wanangana uze alakenyene kuli waze akumuzanga? 6 Alioze yenu nwakulelesa yiswale. Ngwami pichi e akunumwesa lamba ni kunutwala* ku yota, hi chocho ko? 7 Ngwami ayo kakutuka jina lilemu lize anulukile, hi chocho ko? 8 Nyi nwakukaula shimbi ya wanangana kulita ni yisoneko yinambe ngwo, “Zanga mwenyembo we ngwe chize wakulizanga yena mwene,” nunalingi kanawa. 9 Alioze nyi munununga ni kusolola katonde, nunalingi shili, shimbi muyinuhisa, mumu kunushi kuyononokena.
10 Nyi mutu mononokena Shimbi jeswe, alioze mehukaho yimwe, kehuka jeswe. 11 Mumu yoze wambile ngwenyi: “Kanda ulinga upangala,” mwe wambile nawa ngwenyi: “Kanda ushiha mutu.” Kashika, nyi kuushi kulinga upangala, alioze mushiha mutu, wavulumuna shimbi. 12 Nungenu ni kuhanjika ni kulinga yuma ngwe atu waze makasopesa ni shimbi ya vungu lize kulishi mu undungo. 13 Mumu mutu yoze keshi kuvwila akwo keke, neye kechi kamuwvila keke ha tangwa lize makamusopesa. Mumu keke yakukumba usopeso.
14 Mandumbu jami, yika mutu mayuka nyi mamba ngwenyi kali ni ufulielo, alioze keshi kuusolola mu yitanga? Shina ufulielo wacho muuhasa kumulamwina? 15 Nyi ndumbu wa lunga hanji wa pwo kali ni uvu, ni kuhona kulia cha tangwa ha tangwa, 16 mba umwe wa kuli yenu mamba kuli iye ngwenyi: “Yako ni sambukila, kanda wivwa chishika, liako ukute,” alioze kamuhele yize anahono ku mujimba, upeme uka alinga? 17 Chizechene nawa, ufulielo ukawawo, nyi kuushi yitanga, kuunafu.
18 Alioze, umwe mamba ngwenyi: “Yena uli ni ufulielo, yami nguli ni yitanga. Ngusolwele ufulielo we uze kuushi yitanga, yami mungukusolwela ufulielo wami mu yitanga yami.” 19 Shina wakufuliela ngwo kwatwama Zambi umuwika? Wakulinga kanawa. Alioze, andemoniu no kakufuliela ni kuchikima ni woma. 20 Yena mutu wamokomoko, shina unazange kumona chize ufulielo uze kuushi yitanga wapwa wa ngwaza? 21 Ngwami tata Apalahama kamuvulukile kuli Zambi ngwo mukwa-ululi mumu lia yitanga yenyi, muze te halambula mwanenyi Izake ha chilumbilo? 22 Nyingikenu ngwenu, ufulielo wenyi wakalakalile hamuwika ni yitanga, ufulielo wenyi yiupwa ungunu mumu lia yitanga yenyi, 23 mba chisoneko yichimanunuka, chinambe ngwo: “Apalahama wafulielele muli Yehova,* mba achalwile kuli iye ngwe ululi,” chocho yamuvuluka ngwo sepa lia Yehova.*
24 Nyingikenu ngwenu, mutu mamuvuluka ngwo mukwa-ululi mumu lia yitanga, hi mumu lia ufulielo wika ko. 25 Chizechene nawa, ngwami chikoi Rahape kamwalwile neye ngwo mukwa-ululi mumu lia yitanga, muze te hazumbula kanawa tunganda ni kwalweza hanga ayile mu jila yeka? 26 Kwamba pundu, chizechene ngwe mujimba nyi kuushi spiritu kuunafu, chocho nawa ufulielo nyi kuushi yitanga kuunafu.