Asonekene Luka
16 Mba iye yalweza tumbaji twenyi ngwenyi: “Umwe pichi kapwile ni kaselo kenyi yoze atu alamikijine ngwo, kakupihisa upite wa mwata wenyi. 2 Chocho yamusanyika, yamuhula ngwenyi: ‘Yika yenayo ngunevu hakutwala kuli yena? Ngulumbunwine chize wakukalakala, mumu kuuchi kununga nawa ni kukalakala mu zuwo lino.’ 3 Mba kaselo yamba mu mbunge yenyi ngwenyi: ‘Yika mungulinga mumu mwene wami kananguchiza ha mulimo? Ngolo ja kulima chishi najo, sonyi mungwivwa ja kwita.* 4 Aa! Hinanyingika yize mungulinga hanga muze manguchiza ku mulimo, atu angutambule kanawa ku mazuwo jo.’ 5 Yasanyika mutu ni mutu yoze uli ni kongo lia mwata wenyi, yahula mutangu ngwenyi: ‘Kongo lingahi uli nalio kuli mwata wami?’ 6 Iye yamukumbulula ngwenyi: ‘Lukama wa njongo* ja maji a olevwe.’ Kaselo yamulweza ngwenyi: ‘Anda mukanda we wa kongo, twama hashi, soneka kawashi-washi 50.’ 7 Mba yahula mukwo ngwenyi: ‘Mba yena, kongo lingahi uli nalio?’ Iye yamukumbulula ngwenyi: ‘Lukama wa njongo* ja tiliku.’ Kaselo yamulweza ngwenyi: ‘Anda mukanda we wa kongo, soneka 80.’ 8 Mwata yachichimieka kaselo wacho, chipwe ngwe kali mupi, mumu kalingile yuma ni mana; mumu ana a mwaka uno kakusolola mana a umwenemwene hakulinga yuma ya mu chisemuko cho, kuhiana ana a pangu.
9 “Ngunanulweze nawa ngwami: Pwenu ni masepa kupalikila mu upite wa uhenge, hanga muze muuhwa, ayo akanutambule mu yihela yo yakutwama ya mutolo. 10 Yoze mashishika mu yuma yikehe, mashishika nawa mu yuma yinji, yoze uli chihenge mu yuma yikehe, mapwa nawa chihenge mu yuma yinji. 11 Kashika, nyi yenu kunwashishikile ni upite wa uhenge, iya makanwaha upite wamwenemwene? 12 Nyi kunwashishikile ni yuma ya mbala, iya makanwaha yize hananutulikila? 13 Mukwa-mulimo niumwe yoze mahasa kupwa ndungo wa miata aali wakuhi, mumu hanji mahasa kuvwila kole umwe ni kuzanga mukwo, hanji mahasa kulelesa umwe ni kulalaminya kuli mukwo. Yenu kunuchi kuhasa kupwa ndungo ja Zambi ni ndungo ja Upite.”
14 A-Fwariseu waze akuzanga mbongo, te kanapanjika yino yeswe, mba yaputuka kumukekuna. 15 Chocho, Yesu yamba kuli ayo ngwenyi: “Yenu nuli waze akusoloka kumeso ja atu ngwo nuli akwa-ululi, alioze Zambi kananyingika mbunge jenu, mumu chuma chize chapwa chilemu kumeso ja atu, kumeso ja Zambi chapwa chizelwokeso.
16 “Shimbi ni Aprofeta yahetele ndo hali Yoano. Kukatuka haze, Wanangana wa Zambi kanawambujola ngwe sango jipema, atu a mulali weswe kanazombokelako. 17 Pundu, chili chashi malilu ni hashi kupalika, alioze niumwe lusona umuwika hanji lutope wa Shimbi mahona kumanunuka wakuhi.
18 “Mweswe yoze malilakula ni mukwo-pwo ni kumbata pwo mweka, malinga upangala, ni yoze malimbata ni pwo yoze hanamulakula, malinga upangala.
19 “Kwapwile umwe lunga pichi yoze wapwile ni kuzala mazalo alauluka ni a linyu, mwono wenyi te upema tangwa ha tangwa. 20 Kwapwile nawa umwe chiswale avuluka ngwo Lazaru, mujimba wenyi wapwile wa too ni yilonda, te kakumutumbieka ku chikolo cha pichi wacho; 21 te kakuzanga kulia yifwenyu-fwenyu yize yapwile ni kuholoka ku mesa ya pichi, chipwe tuwa te kakwiza hanga alese yilonda yenyi. 22 Ha kupalika cha matangwa, chiswale yafwa, angelo yamuzundula yamusa hakamwihi ni Apalahama.
“Pichi neye yafwa, yamufunda. 23 Muze te ali mu fuka ni kumona lamba, yahetula meso, yamona Apalahama kusuku kali hamwe ni Lazaru. 24 Chocho, iye yamusanyika ni kwamba ngwenyi: ‘Tata Apalahama, nguvwile kama keke, tuma kama Lazaru hanga achupike songo lia munwe wenyi mu meya, akekemese kama limi liami, mumu ngunamono lamba linji mu mulengi uno wa kahia.’ 25 Alioze, Apalahama yamba ngwenyi: ‘Mwanami, iwuluka ngwe, muze wapwile ni mwono watambwile yuma yipema, alioze Lazaru katambwile yuma yipi. Haliapwila iye kanamulembejeka kuno, alioze yena unamono lamba. 26 Chikwo nawa, hakachi ka yetu ni yenu hasaho jondo yinene, kashika, waze ali sali lino kechi kuhasa kupalika aye sali lia yenu, chipwe waze ali sali lia yenu kechi kuhasa kupalika eze sali lia yetu.’ 27 Mba pichi yamukumbulula ngwenyi: ‘Nyi chocho, ngunaliumbu tata, umutume kama ku zuwo lia tata, 28 nguli ni mandumbu jami atano, mweche kama hanga aye aatoweze, hanga no ahone kwiza ku chihela chino cha lamba.’ 29 Alioze, Apalahama yamba kuli iye ngwenyi: ‘Ayo kali ni Mose ni Aprofeta. Kashika, aapanjike.’ 30 Pichi yakumbulula ngwenyi: ‘Ka, tata Apalahama, nyi umwe hakachi ka afu maya kuli ayo, malikonyeka.’ 31 Alioze, Apalahama yamulweza ngwenyi: ‘Nyi ayo kechi kupanjika Mose chipwe Aprofeta, nihindu kechi kutayiza chipwe ngwe umwe mahinduka hakachi ka afu.’”