Usolwelo wa Yesu Kristu Alwezele Kuli Yoano
19 Kulutwe lia yino yuma, nevwile yize yapwile ngwe liji lia mbunga yinene mwilu, liambile ngwo: “Halisenu Yehova!* Ulamwino, ni uhenya ni ndundo yapwa yambala ya Zambi yetu, 2 mumu upatwilo wenyi wapwa wamwenemwene, wa ululi. Mumu hanapatwila chikoi munene yoze wapihishile hashi ni utanji* wenyi. Hanakale manyinga ja ndungo jenyi ku kwoko lienyi.” 3 Mba yamba nawa ha chisuho chamuchiali ngwo: “Halisenu Yehova! Mwishi wenyi muununga ni kufwindangana ndo ku miaka ya mutolo.”
4 Makulwana 24 ni yitangiwa yiwana ya mwono, yaafulamana ni kuwayila Zambi yoze unatwama ha ngunja ni kwamba ngwo: “Amene! Halisenu Yehova!”
5 Chikwo nawa, limwe liji liatuhukile ku ngunja ngwo: “Halisenu Zambi yetu, yenu eswe waze nwapwa ndungo jenyi, waze nwakumuvwila woma, akepe ni anene.”
6 Mba nevwile yimwe yapwile ngwe liji lia mbunga yinene, ngwe zungo lia meya anji ni kukulunguza chinene, liambile ngwo: “Halisenu Yehova, mumu Yehova* Zambi yetu, Mukwa-Ndundo-Jeswe, haputuka kuyula! 7 Tuwahililenu, tuzalenu too ni chiseke, tumwehenu uhenya, mumu umbachiso wa Mwana-panga hiwaheta, ni mukwo-pwo halilulieka. 8 Ewa, amutayijile kuzala mahina a linyu yipema, alejima, mumu linyu yipema yinalumbunuka yitanga ya ululi ya asandu.”
9 Mba iye yamba kuli yami ngwenyi: “Soneka: Kawaha waze akwasanyika ha chiwanyino cha umbachiso wa Mwana-panga.” Yamba nawa kuli yami ngwenyi: “Wano kali maliji amwenemwene a Zambi.” 10 Kashika, nafulamanyine ku yiliato yenyi hanga ngumuwayile. Alioze, iye yamba kuli yami ngwenyi: “Kanyama! Kanda uchilinga! Yami nguli wika ndungo-ni-mukwenu ni wa mandumbu je, waze ali ni mulimo wa kuhana uchela hakutwala kuli Yesu. Wayila wika Zambi! Mumu uprofeto wakuhanjika umwenemwene hakutwala kuli Yesu.”
11 Namwene lilu lia kwazulula, mba kwasolokele kavwalu mutoma. Yoze te unatwamaho jina lienyi Mukwa-kushishika ni Umwenemwene, iye kakupatwila ni kwasa jita ni ululi. 12 Meso jenyi kali ngwe mulengi wa kahia, ha mutwe wenyi hali yipangula yinji. Iye kali ni jina lia kusoneka lize niumwe kalinyingikine, shina wika iye mwene. 13 Iye kanazala mazalo ali ni yipeka ya manyinga. Kakumuvuluka ngwo, Liji lia Zambi. 14 Chikwo nawa, tujita a mwilu amukawile ha tuvwalu atoma, o te kanazala mahina a linyu apema, atoma. 15 Mu kanwa lienyi yimutuhuka mukwale usuku wambuka hanga onwone nawo akwa-mavungu. Iye makayula ni lukanda wa utale. Chikwo nawa, kanaliata ukamino wa vinyu ya ufwatulo wa Zambi Mukwa-Ndundo-Jeswe. 16 Ha mazalo jenyi, ewa, ha kulu lienyi, hali jina lia kusoneka ngwo, Mwanangana wa mianangana ni Mwene wa ene.
17 Namwene nawa umwe mungelo kanamana ha tangwa, iye wakololokele ni liji linene ni kwamba kuli tujila eswe waze te anahumuka mu tetela ngwenyi: “Tweyenu kuno, nulikungulule ha chiteleka chinene cha Zambi, 18 hanga nulie yifwo ya mianangana, yifwo ya manjolo, yifwo ya yitakame, yifwo ya tuvwalu ni ya waze akutwamaho, ni yifwo ya eswe, ya ndungo ni waze hi ndungo ko, ya akepe ni ya anene.”
19 Mba namwene ngongo ni mianangana a hashi ni tujita two, kanalikungulula hanga akase jita ni yoze te unatwama ha kavwalu ni tujita twenyi. 20 Akwachile ngongo ni profeta wa mahuza hamwe nenyi, yoze walingile yilayi kumeso jenyi yize apiangwile nayo waze atayijile mufunda wa chinyingi wa ngongo ni waze te akuwayila kaponya kenyi. Eswe aali aanyashine ni mwono mu chitende cha kahia chize chakuwema ni fundanga. 21 Alioze, waze asalile aashihile ni mukwale usuku uze te unatuhuka mu kanwa lia yoze te unatwama ha kavwalu. Mba tujila eswe akuchile ni yifwo yo.