Kuli A-Hepreu
9 Usendo ukulu wapwile ni shimbi mumu lia mulimo usandu ni chimwe chihela chisandu hashi. 2 Mumu katungile chipatulo chitangu mu mbalaka, muze mwapwile chikwachilo cha ndeya, mesa ni mbolo ja kutumbieka kumeso ja Zambi,* chize te avuluka ngwo, Muma Musandu. 3 Alioze, kunyima lia chikalakala cha hina chamuchiali, kwapwile chipatulo cha mbalaka chize te avuluka ngwo, Muma Musandu Mwahiana. 4 Mwenamo mwapwile chikwachilo cha insensu cha oru ni mushete wa usendo, uze wapwile weswe wakushila ni oru, muchima liawo mwapwile ndoho ya oru yize te yili ni mana, mulumbu wa Arone uze wasokele yitemo ni mawe a usendo; 5 helu lia mushete hapwile akerupimi a uhenya, waze te anazulamina chifuko cha mushete. Haliapwila, wano hi mashimbu ko akuhanjika hakutwala ku yuma yino mu yimako-yimako.
6 Amu aluliekele chocho yuma yacho, asasendote te kakunjila matangwa eswe mu chipatulo chitangu cha mbalaka hanga alinge mulimo usandu; 7 alioze mu chipatulo chamuchiali mwakunjila wika mwata wa asasendote a lutwe, chisuho chimuwika ha mwaka, keshi kunjilamo mokomoko, kakunjilamo ni manyinga waze akulambula hali iye mwene ni ha shili yize atu alinga chakuhona kunyingika. 8 Spiritu yisandu yasolwele zwalala ngwo, jila ya muma musandu te kanda achiyisolola muze te mbalaka yitangu yichiliko. 9 Mbalaka yino, yili chilweza cha mashimbu wano. Kulita ni ululikiso wacho, kakulambulamo yawana ni yitapo. Yuma yacho, kuyichi kuhasa kutomesa mbunge ya mutu yoze wakulinga mulimo usandu. 10 Mumu yapwile ni kutala wika ha kulia, kunwa, ni kusana cheka ni cheka. Kayisele mumu lia mujimba, yinunge ndo ha shimbu lialita lia kululieka yuma.
11 Alioze, muze Kristu ejile ngwe mwata wa asasendote a lutwe wa yuma yipema yize hiyalingiwa, iye yanjila mu mbalaka yinene, chikwo nawa yingunu, yize kakayilingile ku moko ja atu, che kwamba, hi ya hano hashi ko. 12 Iye kanjilile muma musandu, hi ni manyinga ja pembe hanji ja ana-ngombe* ko, alioze ni manyinga jenyi mwene, kamuwika kunahu, ni kutupulwila ku miaka yeswe. 13 Mumu nyi manyinga ja pembe ni ja kuji a ngombe ni uto wa ana-ngombe yize akusapwila hali akwa-luchisa, yakupemesa ku musunya, 14 mba yika mutwamba ha manyinga ja Kristu, yoze kupalikila mu spiritu ya mutolo, walihanyine kuli Zambi chakuhona kapalia, makapemesa mbunge jetu ku yitanga yamokomoko, hanga tulingile Zambi ya mwono mulimo usandu?
15 Kashika iye kali chitakanyishi wa usendo waha, hanga atu waze hanatambika atambule chilakenyo cha chihinga cha mutolo, mumu umwe wafwile hanga aatusule kupalikila mu ukuule, ku shili yize alingile ku usendo utangu. 16 Mumu haze hali usendo, mutu yoze waulinga katamba kufwa, 17 mumu usendo wakukola nyi kwapwa kufwa, kuushi kukola nyi mutu yoze waulinga uchili ni mwono. 18 Kashika, usendo utangu newo kaukolesele ni manyinga. 19 Muze Mose ahanjikile maliji eswe a Shimbi kuli atu, yanda manyinga ja yimbembe a ngombe, ja pembe, meya, wanda uchila ni chisapwilo cha mwambu, yasapwila ha mukanda ni hali atu eswe, 20 ni kwamba ngwenyi: “Wano kali manyinga a usendo uze Zambi anutuma kufunga.” 21 Yasapwila nawa manyinga ku mbalaka ni ku yikwata yeswe yize apwile ni kukalakala nayo mu mulimo usandu. 22 Ewa, kulita ni Shimbi, yuma yeswe kakuyipemesa ni manyinga, chikwo nawa, nyi kamwangine manyinga, ukonekeno wa shili kuuchi kupwako.
23 Kashika, yilweza ya yuma ya mwilu, te katamba kuyipemesa ni yitapo ya manyinga a yimuna, alioze yuma ya mwilu, yakufupiwa yitapo yipema yahiana. 24 Mumu Kristu kakanjilile muma musandu mwa kutunga ni moko ja atu, che chilweza chamwenemwene, alioze mu malilu, mwenamo iye haliapwila kanasoloka kumeso ja Zambi hali yetu. 25 Kuchapwile ngwe hanga te iye alilambule mwene yisuho yinji, ngwe chize mwata wa asasendote a lutwe te akunjila muma musandu mwaka ha mwaka ni manyinga waze hi a iye mwene ko. 26 Nyi chenacho, kachi kanakamona lamba yisuho yinji, chize ku uputukilo wa kutanga cha hashi. Alioze haliapwila, ha kusula cha miaka yino, hanalisolola kamuwika kunahu, hanga ajimune shili kupalikila mu chitapo cha iye mwene. 27 Ngwe chizechene atu waze atongwele a kufwa kamuwika kunahu, mba kulutwe matambula upatwilo, 28 chocho nawa Kristu hanamulambula kamuwika kunahu, hanga ambate shili ya anji, mba muze makasoloka ha chisuho chamuchiali, kechi katala nawa ha shili, makamumona kuli waze akumushimbwila hanga aalamwine.