Kuli A-Roma
14 Tambulenu mutu yoze unalele ku ufulielo, alioze kanda nupatwila yoze ukwete manyonga alisa ni a yenu.* 2 Lunga yoze ukwete ufulielo kakulia yuma yeswe, alioze yoze walela ku ufulielo kakulia wika yilimalima. 3 Yoze wakulia yuma yeswe, katambile kulelesa yoze keshi kulia, mba yoze keshi kulia yuma yeswe, katambile kupatwila yoze keshi kulia, mumu Zambi hanatayiza mutu wacho. 4 Yena iya mba upatwile kavumbi wa mukwenu? Mwata wenyi mwe mamona nyi iye mamana nguu hanji malimbuka. Alioze, iye mamana nguu mumu Yehova* mahasa kumumanyisa.
5 Mutu umwe mahasa kunyonga ngwe tangwa limwe lili lilemu kuhiana matangwa akwo; alioze mukwo mahasa kunyonga ngwe matangwa eswe kali amuwika. Kashika, mutu ni mutu katamba kupwa ni shindakenyo ngwo yize afuliela yalita. 6 Mutu yoze wakulemesa tangwa limuwika kuhiana matangwa akwo, kakuchilinga hanga alemese Yehova.* Yoze wakulia yuma yeswe kakuchilinga hanga alemese Yehova,* mumu kakusakwilila Zambi ha kulia chacho. Alioze, yoze keshi kulia yuma yeswe, keshi kuyilia hanga alemese Yehova,* chipwe chocho neye kakusakwilila Zambi. 7 Kashika, kukushi mutu niumwe yoze ukwete mwono mumu hali iye mwene. Chikwo nawa, niumwe yoze wakufwa mumu hali iye mwene wakuhi. 8 Mumu nyi tuli ni mwono, tuli nawo ha kulemesa Yehova,* chipwe mutufwa, mutufwa ha kulemesa Yehova.* Kashika, chipwe mutupwa ni mwono hanji mutufwa, tuli ambala a Yehova.* 9 Mumu ha chikuma chino Kristu wafwile ni kuhinduka hanga apwe Mwene wa afu ni wa akwa-mwono.
10 Mba mumu liaka yena wakupatwila ndumbwe? Hanji, mumu liaka wakulelesa ndumbwe? Mumu yetu eswe kumutukamana kulutwe lia chitwamo cha upatwilo wa Zambi. 11 Ngwe chize chinasonewa ngwo: ‘“Ngunalishingi yami ngwami,’ chocho anambe Yehova,* ‘makungunwa eswe kumakaliumba kuli yami ni malimi eswe kumakanyingika zwalala ngwo yami nguli Zambi.”’ 12 Mutu ni mutu kumakalumbununa hakutwala kuli iye mwene kuli Zambi.
13 Kashika, kanda tulipatwila umwe ni mukwo. Chikwo nawa, kanda tulinga nichimwe chuma chize muchikokolola ufulielo wa ndumbwetu hanji kumuhukanyisa. 14 Ngunanyingika ni kukunuka kuli Mwene Yesu ngwami, chuma nichimwe chakupwa cha luchisa chene chakuhi; shina wika muze umwe machinyonga ngwe cha luchisa, kuli iye muchipwa lume cha luchisa. 15 Nyi ndumbwe mevwa chinyengo mumu lia kulia chize wakulia, kumana kuushi kumuzanga. Kristu hanafu mumu hali mutu wacho, kanda upihisa ufulielo wa mutu wacho mumu lia kulia che. 16 Kashika, kanda wecha hanga ahanjike yuma yipi hakutwala ku yuma yipema yize wakulinga. 17 Mumu Wanangana wa Zambi kuwatalile ha yize twakulia ni yize twakunwa, alioze chuma chilemu chili kupwa akwa-ululi, kupwa ni sambukila ni uwahililo mu spiritu yisandu. 18 Mumu yoze wakukalakala mu jila yino ngwe ndungo ya Kristu, kakupemena kuli Zambi ni kupwa ni utayizo wa atu.
19 Kashika, twatamba kulinga yeswayo yize mutuhasa hanga tupwe ni sambukila ni kulitakamisa umwe ni mukwo. 20 Kanda wonwona mulimo wa Zambi mumu lia kulia. Chamwenemwene kulia cheswe muhasa kuchilia, alioze chili chipi nyi walia chuma chize muchitalingisa mukwenu. 21 Chili chipema kulitwamina kulia yifwo, chipwe kunwa vinyu, hanji kulinga chuma chimwe chize muchihasa kutalingisa ndumbwe. 22 Ufulielo uze uli nawo, pwako nawo kumeso ja Zambi. Kawaha yoze keshi kulihisa iye mwene mumu lia yize akutayiza. 23 Alioze, nyi mutu mayambashana ha chikuma cha kulia, chipwe chocho malia kulia chacho, mutu wacho hanamuhisa kulu mumu keshi kuchilinga ni ufulielo. Kashika, cheswacho mutu malinga chakuhona ufulielo, chapwa shili.