Asonekene Yoano
5 Ha kupalika cha yuma yino, yikupwa chiwanyino cha A-Yunda, Yesu yakanduka ku Yerusaleme. 2 Mu Yerusaleme, hakamwihi ni Chikolo cha Mapanga, mwatwama chitende chikwete mbalanda jitano, chize te avuluka mu limi lia Hepreu ngwo, Mbeteseta. 3 Mu mbalanda yacho, mwenamo te mieji anji anapombo, ngwe, tupuputa, yilema ni akwa-mijimba yasosewa. 4* —— 5 Alioze, mwapwile umwe lunga yoze te wayiza 38 a miaka. 6 Muze amwene mutu wacho kanapombo ni kunyingika ngwenyi, kayiza ha miaka yinji, Yesu yamwamba ngwenyi: “Unazange kuhinduka?” 7 Mweji yamukumbulula ngwenyi: “Mwene, chishi mutu yoze mangunjisa mu chitende muze meya akufuza, alioze muze nakweseka kunjilamo, mukwetu mukwo kakungupalika kulutwe.” 8 Yesu yamulweza ngwenyi: “Katuka! Anda chipoya* che, enda.” 9 Chocho, lunga wacho yahinduka hazehene, yanda chipoya chenyi, yaputuka kwenda.
Tangwa liacho te lia Sambata. 10 Kashika, A-Yunda yaputuka kwamba kuli lunga yoze aukile ngwo: “Musono lia Sambata, kuwatambile kumbata chipoya.” 11 Alioze iye yaakumbulula ngwenyi: “Mutu yoze wanguuka kangulweza ngwenyi: ‘Anda chipoya che enda.’” 12 Mba ayo yamuhula ngwo: “Mutu muka wakwamba ngwenyi: ‘Anda chipoya wende’?” 13 Alioze, lunga yoze aukile te kanyingikine mutu yoze wamuuka, mumu Yesu te hatoka hakachi ka mbunga waze apwileho.
14 Ha kupalika cha mashimbu, Yesu yawana lunga wacho mu tembele, yamwamba ngwenyi: “Achitala, hiwahinduka. Kanda uvulumuna nawa, nyi ka chuma chipi chahiana muchikuwana.” 15 Lunga wacho yaya kwenyi, yalweza A-Yunda ngwenyi, Yesu mwe unakamuuka. 16 Kashika A-Yunda apwile ni kukaujola Yesu, mumu kapwile ni kulinga yuma yino ha tangwa lia Sambata. 17 Alioze iye yaakumbulula ngwenyi: “Tata kananungu ni kukalakala ndo haliapwila, chipwe yami ngunakalakala.” 18 Kashika A-Yunda azangile chinji kumushiha, hi wika ko ha kwehuka shimbi ya Sambata, alioze mumu kapwile nawa ni kusanyika Zambi ngwo, Tata, ni kulitesa ni Zambi.
19 Ha chikuma chino, Yesu yamba kuli ayo ngwenyi: “Ngunanulweze pundu ngwami, Mwana keshi kuhasa kulinga chuma nichimwe cha kunyonga lienyi, alioze yize wika akumona Tato akulinga. Mumu yuma yize Tata akulinga, Mwana neye kakuyilinga chizechene. 20 Mumu Tata kakuzanga Mwana, kakumulweza yuma yeswe yize iye mwene akulinga, makamulweza yitanga yikwo yinene yinahiana yino, hanga yenu nukomoke. 21 Mumu ngwe chizechene Tata akuhindwisa afu ni kwaha mwono, Mwana neye kakuhana mwono kuli yoze mazanga. 22 Tata keshi kupatwila niumwe, alioze hanakunjika chiyulo cheswe cha upatwilo kuli Mwana, 23 hanga atu eswe waze akulemesa Tata, alemese nawa Mwana. Yoze keshi kulemesa Mwana, keshi kulemesa Tata yoze wamutumine. 24 Pundu ngunambe kuli yenu ngwami, yoze wakwivwa maliji jami ni kufuliela muli Yoze wangutumine, kali ni mwono wa mutolo, kechi kamusopesa, alioze hakatuka ku kufwa, haya ku mwono.
25 “Pundu ngunambe kuli yenu ngwami, ola muyiza chipwe haliapwila hiyaheta, muze afu makevwa liji lia Mwana-mutu, mba waze makalivwa makapwa ni mwono. 26 Mumu ngwe chizechene Tata ali ni mwono muli iye mwene, chocho nawa hanahana kuli Mwana, ulite wa kupwa ni mwono muli iye mwene. 27 Hanamwehe chiyulo chakupatwila, mumu iye kali Mwana-mutu. 28 Kanda nukomoka ha chikuma chino, mumu ola muyiza muze waze eswe ali mu mafuka,* makevwa liji lienyi, 29 makatuhuka, waze alingile yuma yipema kumakaahindwisa hanga akatwame ni mwono, waze alingile yuma yipi, kumakaahindwisa hanga akaasopese. 30 Kuchichi kuhasa kulinga chuma nichimwe cha kunyonga liami. Chize nakwivwa che nakupatula, upatwilo wami uli wa ululi, mumu kuchishi kulinga upale wa yami mwene, alioze upale wa yoze wangutumine.
31 “Nyi munguhana uchela wa yami mwene, uchela wami hi wamwenemwene ko. 32 Kuli mukwo yoze wakuhana uchela hakutwala kuli yami, ngunanyingika ngwami uchela uze akuhana hali yami, uli wamwenemwene. 33 Nwatumine atu kuli Yoano, iye yaaha uchela wamwenemwene. 34 Kuchishi kutayiza uchela unakatuka kuli mutu, alioze ngunanulweze yuma yino hanga akanulamwine. 35 Lunga wacho kapwile ndeya yatemuka, yapanguka, nwazangile kuwahilila nenyi mu pangu lienyi, alioze zango liacho liapwile lia shimbu likehe. 36 Alioze uchela uze nguli nawo unahiana wa Yoano, mumu milimo yize Tata anguhele hanga ngulinge, milimo yacho ye nakulinga, yakuhana uchela ngwo, Tata mwe wangutumine. 37 Chipwe Tata yoze wangutumine, neye hanahana uchela hali yami. Yenu kanda nuchivwa liji lienyi, chipwe kumona chize apwa, 38 ni maliji jenyi, keshi muli yenu, mumu kunushi kutayiza yoze iye atumine.
39 “Yenu nwakuhengwola Yisoneko mumu nwakunyonga ngwenu, munukapwa ni mwono wa mutolo kupalikila mu Yisoneko, alioze Yisoneko yacho ye yakuhana uchela hakutwala kuli yami. 40 Nihindu kunwazangile kwiza kuli yami hanga nupwe ni mwono. 41 Kuchishi kutayiza kungufumanyisa kuli atu, 42 alioze ngunanyingika ngwami, kunushi ni zango lia Zambi mu mbunge jenu. 43 Yami neza mu jina lia Tata, alioze yenu kunwangutambwile. Nyi mutu mweka meza mu jina lienyi mwene, kachi nwamutambula. 44 Kuchi munuhasa kufuliela, ngwami nwakutayiza hanga anufumanyise kuli akwenu, alioze kunushi kufupa lufuma unakatuka kuli Zambi umuwika? 45 Kanda nunyonga ngwenu mungunusuma mulonga kumeso ja Tata; kuli mutu yoze wakunusuma mulonga, Mose, yoze nwakufuliela. 46 Kwamba pundu, nyi nwakufuliela muli Mose, kachi nwakufuliela muli yami, mumu iye kasonekene hakutwala kuli yami. 47 Alioze, nyi kunushi kufuliela ha yisoneko yenyi, mba kuchi munufuliela ha yize nakwamba?”