Asonekene Yoano
10 “Pundu ngunanulweze ngwami, yoze keshi kunjilila ku chikolo cha limba* lia mapanga alioze manjilila sali lieka, kali mwiji, chikwo nawa, kakutambula atu yuma ku tachi.* 2 Alioze, yoze manjilila ku chikolo, mwe kafunga ka mapanga. 3 Mukwa-kufunga chikolo mamwazulwila, mapanga mevwa liji lienyi. Iye mavuluka mapanga jenyi ha majina ni kwatwala haze. 4 Muze hatuhwisa mapanga jenyi eswe, mapalika kulutwe lio, o mamukaula, mumu kananyingika liji lienyi. 5 Kechi kakaula chilambala, alioze mamuchina, mumu kanyingikine liji lia yilambala.” 6 Yesu yaatela chishima chino, alioze, kuchaalumbunukine.
7 Kashika, Yesu yamba nawa ngwenyi: “Pundu ngunanulweze ngwami, yami nguli chikolo cha limba lia mapanga. 8 Waze eswe aliangile kwiza mu jina liami, kali eji, akwa-kutambula yuma ku tachi; alioze mapanga kakaapanjikile. 9 Yami nguli chikolo. Yoze manjilila muli yami, makamulamwina, makanjila ni kutuhuka, makawana ulilo. 10 Mwiji kakwiza wika hanga eye, ashihe ni kunongesa. Alioze yami nejile hanga nupwe ni mwono, nupwe nawo wakulumbama. 11 Yami nguli kafunga mupema; kafunga mupema kakuhana mwono wenyi hali mapanga jenyi. 12 Mukwa-mulimo yoze hi kafunga ko, yoze hi mukwa-mapanga ko, muze akumona kangunga kaneza, kakuhichika mapanga machina, mba kangunga makwata mapanga ni kwamwanga, 13 iye machina, mumu kali mukwa-mulimo, keshi kunyonga hali mapanga. 14 Yami nguli kafunga mupema. Ngunanyingika mapanga jami, ni mapanga jami kanangunyingika, 15 ngwe chizechene Tata anangunyingika; ni yami ngunamunyingika, munguhana mwono wami hali mapanga jami.
16 “Nguli ni mapanga akwo, hi a mu limba lino ko; wano nawa natamba kwaneha, o makapanjika liji liami, makapwa chendo chimuwika ni kafunga umuwika. 17 Kashika Tata akunguzanga, mumu munguhana mwono wami, hanga ngukautambule cheka. 18 Kukushi mutu niumwe yoze mangutambulawo, alioze, yami mwene munguuhana. Nguli ni ulite wa kuuhana, ni ulite wa kuutambula cheka. Shimbi yino Tata wanguheleyo.”
19 A-Yunda yalihandununa cheka hakachi ko mumu lia maliji wano. 20 Anji a kuli ayo yaputuka kwamba ngwo: “Kali ni ndemoniu, kanazaluka. Mumu liaka nunamupanjika?” 21 Akwo yamba ngwo: “Maliji wano, hi a mutu ko yoze uli ni ndemoniu. Shina ndemoniu mahasa kulawisa meso a kapuputa?”
22 Ha matangwa jacho, mu Yerusaleme mwapwile Chiwanyino cha Kukunjika Tembele. Te ha mashimbu a chishika. 23 Yesu te kanende mu tembele, mu Mbalanda ya Solomone. 24 Chocho, A-Yunda yamujingilika, yamwamba ngwo: “Ndo tangwa lika mutwecha ni kuyambashana? Nyi yena mwe Kristu, tulweze pundu.” 25 Yesu yaakumbulula ngwenyi: “Hinanulweza kulu, chipwe chocho kunwatayijile. Milimo yize nakulinga mu jina lia Tata, yakuhana uchela hali yami. 26 Alioze yenu kunwatayijile, mumu hi nuli mapanga jami ko. 27 Mapanga jami kakwivwa liji liami, yami ngunaanyingika, ayo kakungukaula. 28 Yami ngunaahe mwono wa mutolo, kechi kaanongesa nilimwe tangwa, niumwe makaatambula mu kwoko liami wakuhi. 29 Yize Tata angwaha, yili yilemu chinji kuhiana yuma yikwo, niumwe kechi kuhasa kutambula mapanga mu kwoko lia Tata. 30 Yami ni Tata tuli mutu umuwika.”*
31 Cheka nawa, A-Yunda yanda mawe hanga amwase. 32 Mba Yesu yamba kuli ayo ngwenyi: “Nanusolwela milimo yinji yipema ya kuli Tata. Ha milimo yino, mulimo uka munungwashila mawe?” 33 A-Yunda yamukumbulula ngwo: “Kutuchi kukwasa mawe mumu lia mulimo upema, alioze mumu lia matuka, mumu yena uli mutu, chipwe chocho unalipwisa zambi.” 34 Yesu yaakumbulula ngwenyi: “Te kuchasonewene mu Shimbi yenu ngwo: ‘Nambile ngwami: “Yenu nuli tuzambi nyi’”? 35 Nyi Zambi hanavuluka ngwo ‘tuzambi’ atu waze liji lienyi liahishile—ni yisoneko kechi kuhasa kuyalumuna— 36 Tata hanangusela ku usandu ni kungutuma hashi, alioze yenu nunangwambe ngwenu: ‘Unatukana,’ mumu namba ngwami: ‘Nguli Mwana wa Zambi’? 37 Nyi chishi kulinga milimo ya Tata, kanda nungufuliela. 38 Alioze nyi nakuyilinga, chipwe ngwe kunushi kungufuliela yami, fulielenu ha milimo yacho, hanga nunyingike ni kutayiza ngwenu, Tata kakulivwashana ni yami, ni yami nawa nakulivwashana ni Tata.” 39 Kashika, yafupa kumukwata cheka, alioze iye yachina.
40 Chocho yaya mu sali lia Yordau, kuze Yoano apwile ni kupapachishila atu ku uputukilo, yatwamako. 41 Atu anji yaya kuli iye, yaputuka kwamba ngwo: “Yoano kakalingile nichimwe chilayi, alioze yuma yeswe yize ambile hakutwala kuli yono mutu, yili yamwenemwene.” 42 Mba anji a kuli waze apwileho yamufuliela.