Usolwelo wa Yesu Kristu Alwezele Kuli Yoano

22 Iye wangusolwelele umwe lwiji wa meya a mwono atoma too ngwe kristale, waze te anakatuka ku ngunja ya Zambi ni ya Mwana-panga. 2 Meya jacho te kanapalumuka mukachi ka tapalo linene lia mbonge. Sali ni sali lia lwiji kwapwile mitondo ya mwono yize te yakwima mihuko ha yisuho 12 ha mwaka. Mafwo ja mitondo yacho kakuuka no mavungu.

3 Kukuchi kapwa nawa shingo nilimwe. Alioze, ngunja ya Zambi ni ya Mwana-panga muyikapwa mu mbonge, ni ndungo jenyi makamulingila milimo yisandu. 4 O makamona chifwa chenyi, ni jina lienyi mulikapwa ha mahuma jo. 5 Chikwo nawa, kukuchi kapwa nawa ufuku, o kechi kafupiwa pangu lia ndeya chipwe lia tangwa, mumu Yehova* Zambi kumakapanguka hali ayo, o kumakayula ndo ku miaka ya mutolo.

6 Iye yamba kuli yami ngwenyi: “Maliji wano kali a ujikijilo ni a umwenemwene. Ewa, Yehova* Zambi yoze wakuhanjika kupalikila muli aprofeta, katuma mungelo wenyi hanga asolole kuli ndungo jenyi yuma yize kwasala hakehe yilingiwe. 7 Tala! Mungwiza ni kawashi. Kawaha mweswe yoze mononokena maliji a uprofeto a chivungo chino.”

8 Yami Yoano, nevwile ni kumona yuma yino. Muze nayivwile ni kuyimona, nafulamanyine ku yiliato ya mungelo yoze wangusolwelele yuma yacho hanga ngumuwayile. 9 Alioze, iye yamba kuli yami ngwenyi: “Kanyama! Kanda uchilinga! Yami nguli wika ndungo-ni-mukwenu ni wa mandumbu je, aprofeta, ni waze akwononokena maliji a chivungo chino. Wayila wika Zambi.”

10 Iye yamba nawa kuli yami ngwenyi: “Kanda ujika maliji a uprofeto a chivungo chino, mumu mashimbu waze atesele kanakundama. 11 Echa mukwa-uhenge anunge mu uhenge wenyi, mukwa-luchisa anunge mu luchisa wenyi; alioze mukwa-ululi anunge mu ululi wenyi, ni yoze musandu anunge mu usandu wenyi.

12 “‘Tala! Mungwiza ni kawashi. Kwononona chize mungukahana, kuli yami chili, hanga ngukahane kuli mutu ni mutu kulita ni yitanga yenyi. 13 Yami nguli Alfa ni Omega,* mwe mutangu ni kasula-songo, uputukilo ni songo. 14 Kawaha waze akukosa mazalo jo asuku, hanga akapwe ni utuswilo wa kulia ku mitondo ya mwono ni kunjila ku yikolo ya mbonge. 15 Haze hali tuwa,* hali akwa-kulinga yuma ya yipanda-panda,* akwa-kulinga utanji,* yingalwe, akwa-kukombelela mahamba ni eswe waze akuzanga ni kuhanjika mahuza.’

16 “‘Yami Yesu, natumine mungelo wami hanga anwehe uchela wa yuma yino mukuyukisa yikungulwila. Yami nguli chikota ni munyachi wa Ndawichi, ni katongonoshi yoze wakutemuka chimenemene.’”

17 Spiritu ni nandungi kanambe ngwo: “Tweya!” Yoze mevwa ambe ngwenyi: “Tweya!” Yoze uli ni pwila eze, yoze unazange kunwa meya a mwono atambule chawana.

18 Ngunashindakenya kuli mweswe mevwa maliji a uprofeto wa chivungo chino ngwami: Nyi umwe maweza yimwe ha yuma yino, Zambi makamuwezela yilungo yize yinasonewa mu chivungo chino. 19 Mba nyi umwe machiza chuma chimwe ha maliji a mu chivungo a uprofeto uno, Zambi kumakachiza chihanda chenyi chize chinasonewa mu chivungo chino. Iye kechi katayiza hanga alie ku mihuko ya mitondo ya mwono, chipwe kumwecha hanga anjile mu mbonge yisandu.

20 “Yoze wakuhana uchela wa yuma yino kanambe ngwenyi: ‘Ewa, mungwiza ni kawashi.’

“Amene! Tweya, Mwene Yesu.”

21 Chawana cha keke cha Mwene Yesu, chikapwe hamwe ni asandu.