Usolwelo wa Yesu Kristu Alwezele Kuli Yoano

16 Mba nevwile liji linene kukatuka muma musandu liambile kuli angelo shimbiali ngwo: “Yeenu nukamwangine hashi malonga shimbiali a ufwatulo wa Zambi.”

2 Mutangu wayile wamwangine longa lienyi hashi. Mba chimwe chilonda chipi chapinjishile atu eswe waze apwile ni mufunda wa chinyingi cha ngongo ni kuwayila kaponya kenyi.

3 Wamuchiali wamwangine longa lienyi mu kalunga-lwiji. Meya jamo alumukine manyinga ngwe a mufu, mba yitangiwa ya mwono* yeswe yatwama mu kalunga-lwiji, yafwile.

4 Wamuchitatu wamwangine longa lienyi mu ngiji ni ha mafuji a meya. Chocho eswe alumukine manyinga. 5 Mba nevwile mungelo yoze wapwile ni chiyulo ha meya, kanambe ngwenyi: “Yenu nuli Zambi washishika, Yoze kwali ni yoze wapwile, nuli mukwa-ululi mumu hinunatese upatwilo uno. 6 Ayo amwangine manyinga ja asandu ni aprofeta, mba yenu nwahele manyinga hanga aanwe. Yino ye atela.” 7 Mba nevwile liji ku chilumbilo linambe ngwo: “Ewa, Yehova* Zambi Mukwa-Ndundo-Jeswe, upatwilo* wenu uli wamwenemwene ni wa ululi.”

8 Wamuchiwana wamwangine longa lienyi ha tangwa. Mba tangwa alitayijile kwocha atu ni kahia. 9 Mba atu awemene ni chivukuminya chinene, alioze ashililikile jina lia Zambi, yoze ukwete chiyulo ha yilungo yino. O kalikonyekene chipwe kumuhalisa.

10 Wamuchitano wamwangine longa lienyi ha ngunja ya ngongo. Wanangana wenyi wapwile mu milima, mba atu aputukile kulisuma ha malimi mumu lia yikola, 11 o yashililika Zambi wa mwilu mumu lia yikola ni yilonda yo, nihindu kalikonyekene ha yitanga yo.

12 Wamuchisambano wamwangine longa lienyi ha lwiji munene Ufrateze. Mba meya jenyi omine chau, hanga akalulieke jila ya mianangana a ku chivumbuko cha tangwa.

13 Mba namwene maspiritu atatu a luchisa,* alifwa ngwe mbwota, waze atuhukile mu kanwa lia ndragau, mu kanwa lia ngongo, ni mu kanwa lia profeta wa mahuza. 14 Sango jacho jinakatuka kuli andemoniu ni mianangana a hashi heswe kakujivwa. Sango jacho jakulinga yilayi hanga jikunge mianangana ku jita yize muyikalingiwa ha tangwa linene lia Zambi Mukwa-Ndundo-Jeswe.

15 “Talenu! Nguneza ngwe mwiji. Kawaha yoze malaula ni kununga ni kufunga mazalo jenyi, hanga kechi kenda uselesele ni atu kechi katala ku sonyi jenyi.”

16 Ayo akungulwile mianangana hamuwika mu chihela chize avuluka mu Hepreu ngwo, Armagedone.*

17 Wamuchishimbiali wamwangine longa lienyi mu tetela. Mba kwakatukile limwe liji linene muma musandu, chize ku ngunja ni kwamba ngwo: “Hichahwa!” 18 Mba kwapwile mihenyo, maliji ni kukulunguza, kwapwile munyiko unene wa ndundo jinji walisa ni yeswe yize yalingiwile chize haze atangile atu hano hashi. 19 Mbonge yinene yalihandunwine mu yihanda yitatu. Mambonge ja akwa-mavungu apuzukile. Mba Zambi yewuluka Babilonia Yinene hanga akayehe musenge wa vinyu wa ufwatulo wenyi. 20 Chikwo nawa, matungu eswe ni milundu yeswe yatokele. 21 Mba mawe anene-anene a chiwe, waze liwe ni liwe liapwile ni kulema cha talentu* yimuwika, aholokele mwilu hali atu. Atu ashililikile Zambi mumu lia chilungo cha chiwe, mumu chilungo chacho chapwile chinene chinji.