Asonekene Luka

12 Ha ola yacho, mbunga ya atu yiyilikungulula hamuwika, te tununu anji, kapwile ni kulishinjeka ni kuliliata umwe ni mukwo. Mba iye yaputuka kuhanjika, chitangu kuli tumbaji twenyi ngwenyi: “Kanyamenu ni futunwiso ya A-Fwariseu, yenayo ulembekese. 2 Alioze, kukushi chuma nichimwe cha kusweka kanawa chize kechi kachisolola, chikwo nawa kukushi chuma nichimwe cha kuhengeka chize kechi kachinyingika. 3 Kashika, yeswayo yenu munuhanjika mu milima, makayivwa mu pangu, ni yeswe munuhanjika mwishi mu yipatulo ya muchima, kumakayambujola ha mafulumba ja mazuwo. 4 Chikwo nawa, ngunambe kuli yenu masepa jami ngwami: Kanda nuvwila woma waze akushiha mujimba, alioze hanyima kechi kuhasa kulinga nawa nichimwe. 5 Alioze yami mungunulweza yoze nwatamba kuvwila woma: Vwilenu woma Yoze, muze mashiha, kali ni ndundo ja kumbila mu Ngehena. Ewa, ngunanulweze ngwami, mwenawo nwatamba kuvwila woma. 6 Shina keshi kulanjisa tujila atano akehe-akehe ha tumbongo twaali twa ndando yikehe?* Chipwe chocho, Zambi keshi kuvulama niumwe wa kuli ayo. 7 Alioze, chipwe je kambu ja ku mitwe yenu, hanajalula jeswe. Kashika kanda nwivwa woma, yenu nuli ni ulemu unji kuhiana tujila akehe-akehe anji.

8 “Ngunambe kuli yenu ngwami: Mweswawo mangutayiza kumeso ja atu, Mwana-mutu neye makamutayiza kumeso ja angelo ja Zambi. 9 Alioze, mweswawo malikala yami kumeso ja atu, kumakalikalaye kumeso ja angelo ja Zambi. 10 Mweswawo mamba liji lia kulimika ni Mwana-mutu, makamukonekena; alioze yoze mashililika spiritu yisandu, kechi kamukonekena. 11 Muze manutwala kulutwe lia mbunga, lia mianangana ni akwa-kuyula, kanda nulipikala ha yize munwamba ni chize munuyamba hanga nulikalile, 12 mumu spiritu yisandu muyikanulongesa ha ola yizeyene yuma yize munwamba.”

13 Mba, umwe mutu ha mbunga yamulweza ngwenyi: “Longeshi, lweza ndumbwami hanga atete chihinga ni yami.” 14 Iye yamukumbulula ngwenyi: “Yena lunga, iya wangupwisa ngaji hanji mukwa-kunutetela yuma yenu?” 15 Mba yamba kuli ayo ngwenyi: “Nungenu ni kukanyama, lifungenu ku kuzo yeswe, mumu chipwe mutu mapwa ni yuma yinji, yuma yacho kuyichi kumwaha mwono.” 16 Chocho, yaatela chimwe chishima ngwenyi: “Munda wa umwe pichi yiwima chinji. 17 Kashika, yaputuka kunyonga mu mbunge yenyi ngwenyi: ‘Haliapwila yika mungulinga amu chishi ni haze mungutulikila mihuko yami?’ 18 Mba yamba ngwenyi: ‘Mungulinga chino: Mungupuzula machila jami, mungutunga anene-anene kuhiana, mwenamo mungutulikila mbuto jami jeswe ni yikumba yami yeswe, 19 mba mungwamba kuli yami mwene* ngwami: “Yena* uli ni yuma yinji yipema yize watulika ha miaka yinji, hwima, liako, nwako, wahilila.”’ 20 Alioze, Zambi yamulweza ngwenyi: ‘Yena chihepuke, ufuku uno makutambula mwono we, iya mba masala ni yuma yize unakunga?’ 21 Yino ye yakulingiwa kuli mutu yoze wakulikungila mwene upite, alioze hi pichi ko kumeso ja Zambi.”

22 Mba yalweza tumbaji twenyi ngwenyi: “Kashika nakunulweza ngwami, litwaminenu kulipikala chinji ha mwono wenu, hakutwala ku yize munulia, ni ha mijimba yenu, hakutwala ku yize munuzala. 23 Mumu mwono unahiana kulia ni mujimba unahiana mazalo. 24 Talenu yikwakwalo: Keshi kutumba chipwe kuhela, keshi machila chipwe zuwo lia kutulikila yuma; nihindu Zambi kakwalisa. Shina yenu kunwahianyine chinji tujila nyi? 25 Iya wa kuli yenu, ha kulipikala chinji, mahasa kuwezela matangwa* ku mwono wenyi? 26 Kashika, nyi nuchi kuhasa kulinga chuma chino chikehe, mumu liaka nwakulipikala chinji hakutwala ku yuma yikwo? 27 Talenu chize yitemo yakutatuka: Kuyishi kukalakala, chipwe kulinukina mazalo; alioze ngunanulweze pundu ngwami, chipwe mwe Solomone mu uhenya wenyi weswe kakazalile ngwe chimwe cha ku yitemo yino. 28 Mba nyi chenacho Zambi akujika mwambu wa mu yambu, uze wakusoka musono, hamene maumbila mu jiko, shina kechi kunujika yenu nyi? Yenu akwa-ufulielo ukehe! 29 Kashika, echenu kufupa yize munulia, yize mununwa, chikwo nawa, litwaminenu kulipikala chinji; 30 mumu yuma yino yeswe ye akwa-mavungu a hashi akufupa chinji, alioze Tatenu kananyingika ngwenyi nunafupu yuma yino. 31 Alioze, nungenu ni kufupa Wanangana wenyi, mba yuma yino yeswe kumakanuwezelayo.

32 “Kanda nwivwa woma, yenu mbunga yikehe ya mapanga, mumu chinapemena Tatenu kunwaha Wanangana. 33 Lanjisenu yuma yenu ni kuhana yawana kuli yiswale. Nukenu tuku ja mbongo jize kujishi kulokoka, chekwamba upite uze kuushi kuhwa mu malilu, muze eji kechi kuhasa kunjila, chipwe yiswa kechi kuupihisa. 34 Mumu kweswako mukupwa upite we, kwenako nawa mukupwa mbunge ye.

35 “Zalenu* mahina, liluliekenu, ndeya jenu jipwe jakutemuna, 36 pwenu ngwe atu waze anashimbwila mwata wo yoze unafuna ku umbachiso, hanga muze meza ni kungongwela ku chikolo, amwazulwile ni kawashi. 37 Kawaha ndungo waze muze mwata wo meza, maawana kanalawola! Ngunanulweze ngwami, iye makazala mahina a mulimo, makaatwamisa ku mesa ni kwalingila mulimo. 38 Mba nyi meza ha muchima ufuku,* hanji ha mandemba* maawana halilulieka, kawaha ndungo jacho! 39 Alioze, nyingikenu ngwenu, nyi te mwenya-zuwo kananyingika ola yize mwiji meza, kachi kechi kwecha hanga zuwo lienyi alipupe. 40 Ni yenu nawa, liluliekenu, mumu Mwana-mutu makeza ha ola yize kunwanyongene.”

41 Petulu yamuhula ngwenyi: “Mwene, chishima chino yetu unachitela nyi atu eswe?” 42 Mwene yamba ngwenyi: “Iya kevwe kaselo* washishika, wakanyama, yoze mwata wenyi mamusa helu lia chizavu cha akwa-mulimo wenyi, hanga anunge ni kwaha kulia cho chakumbana ha shimbu lialita? 43 Kawaha ndungo yono, muze mwata wenyi meza mamuwana kanalingi milimo yenyi! 44 Ngunanulweze pundu ngwami, mwata wenyi makamutongola hanga afunge yikumba yenyi yeswe. 45 Alioze, nyi ndungo wacho mamba mu mbunge yenyi ngwenyi: ‘Mwata wami kanashimbula,’ mba maputuka kulamba ndungo a malunga ni a mapwo ni kulialia ni kunwanwa ni kuzengewa, 46 mwata wa ndungo yono makeza ha tangwa lize iye keshi ni kushimbwila ni ha ola yize iye kanyingikine, makamumwesa lamba linji ni kumusa hakachi ka waze keshi kushishika. 47 Kashika, ndungo yoze unakanyingika upale wa mwata wenyi, alioze kaliluliekele chipwe kulinga yize amutumine, makamusuta-suta yitete. 48 Alioze, yoze kakevwile kanawa upale wa mwata wenyi, chocho yalinga yuma yize yinatela kumumwesa lamba, makamusuta yitete yikehe. Pundu lume, yoze hanamwehe yuma yinji, kumakamwita yinji, ni yoze hanase helu lia yuma yinji, kumakamwita yinji kuhiana.

49 “Nejile hanga ngukwachise kahia hano hashi, mba yika mungulinga nyi hakakwachisa kulu? 50 Kwamba pundu, upapachiso nguli nawo uze atamba kungupapachisa, ngunanenganyana chinji ndo haze muukamanunuka! 51 Shina nunanyongo ngwe neza ni kuneha sambukila hano hashi? Ngunanulweze ngwami, hi chocho ko, alioze neza ni kuhandununa. 52 Mumu kuputuka musono, mu zuwo muze muli atu atano malihandununa, atatu malimika ni aali, aali malimika ni atatu. 53 Ayo makalihandununa, tata makalihandununa ni mwanenyi wa lunga, mwana wa lunga ni tato, mama makalihandununa ni mwanenyi wa pwo, mwana wa pwo ni naye, mama-weno makalihandununa ni tembwa-mwana, tembwa-mwana ni naye-weno.”

54 Iye yalweza mbunga ngwenyi: “Muze nwakumona lelwa mulivumbuka ku chivumbuko, hazehene nwakwamba ngwenu: ‘Fuji ya tachi yineza ko,’ chenacho chakupwa. 55 Ni muze nwakumona fuji muyikatuka ku chitokelo nwakwamba ngwenu: ‘Mukupwa chivukuminya,’ chenacho chakupwa. 56 Yilembekese, nwakuhasa kulumbununa kupwa cha yuma ya hashi ni mwilu, alioze kuchi kevwe kunwanyingikine kulumbununa yuma ya mashimbu wano? 57 Mumu liaka yenu ene kunwanyingikine kupatula chize chinalite? 58 Chakutalilaho, muze yena ni mukwa-kole ye nunayi kuli umwe mukwa-kuyula, livwashane nenyi shimbu nuchili mu jila hanga nuhwise mulonga, kuchina makukunjika kuli sopi, sopi makuhana kuli kafunga, mba kafunga makumbila mu zuwo lia ususu. 59 Ngunambe kuli yena ngwami, kuchi kutuhukamo ndo muze mufweta chipwe kalumbongo* ke kakehe ka kasula.”