Yilinga ya Apostolo
15 Amwe tumbaji akatukile ku Yundeya yaputuka kulongesa mandumbu ngwo: “Nyi ngwe kunwapwile ngalami kulita ni shimbi ya Mose, kechi kanulamwina.” 2 Kashika muze Paulu ni Mbarnabe halimika no chikolo nikulihangujola no, mandumbu yaatongola Paulu ni Mbarnabe ni amwe akwo a kuli ayo aye ku Yerusaleme kuli apostolo ni makulwana a mu chikungulwila akatale ha chikuma chacho.
3 Chocho muze mandumbu a mu chikungulwila te hashinjikila Paulu ni Mbarnabe ni malunga akwo, yanunga ni wenyi wo kupalikila mu Fwenishia ni Samaria, ni kwambulwila mandumbu mu yimako-yimako chize akwa-mavungu afulielele. Chino yichineha uwahililo unji mukachi ka mandumbu. 4 Muze o ahetele ku Yerusaleme, akwa-chikungulwila yaasambilila hamwe ni apostolo ni makulwana. O yambulula yuma yeswe yize Zambi alingile kupalikila muli ayo. 5 Alioze kwakatukile amwe a ku mbunga ya A-Fwariseu waze te hafuliela yamba ngwo: “Chatamba kwapwisa ngalami ni kwamba hanga afunge Shimbi ya Mose.”
6 Chocho apostolo ni makulwana yalikungulula hanga atale ha chikuma chacho. 7 Muze te halishimwina ha mashimbu anji, Petulu yakatuka ni kwamba kuli ayo ngwenyi: “Mandumbu, yenu nunanyingika kanawa chize ku matangwa a kunyima, Zambi wangutongwele hakachi kenu hanga ku kanwa liami akwa-mavungu akevwe liji lia sango jipema akafuliele. 8 Zambi yoze wanyingika mbunge ja atu kasolwele ngwenyi kanaatayiza* ha kwaha spiritu yisandu chizechene ngwe ayihanyine kuli yetu. 9 Chikwo nawa, iye kasolwele kalisa hakachi ka ayo ni yetu, alioze wapemesene mbunge jo ku ufulielo. 10 Kashika mumu liaka nuneseka Zambi ni kuzanga kusa kanga ha kota ja tumbaji, kanga yize chipwe tulamba twetu chipwe yetu kutwahashile kuyimbata? 11 Alioze tunafuliela ngwetu, hanatulamwina mumu lia chawana cha keke ya Mwene Yesu chizechene ngwe ayo.”
12 Mumu lia chino, chizavu cheswe chaholele kuluu ni kupanjika Mbarnabe ni Paulu waze te anahanjika hakutwala ku yilayi ni yikomokeso yinji yize Zambi alingile mukachi ka akwa-mavungu kupalikila muli ayo. 13 Muze o te hahwisa kuhanjika, Tiangu yaputuka kuhanjika ngwenyi: “Mandumbu ngwivwenu. 14 Semone kambulwile mu yimako-yimako chize Zambi alihulikilile kuli akwa-mavungu ha chisuho chitangu hanga akasakuleho limwe vungu lize mulimbata jina lienyi. 15 Chino nawa chinalite ni maliji ja Aprofeta ngwe chize chinasonewa ngwo: 16 ‘Kulutwe lia yino yuma, mungukeza nawa ngukatungulule mbalaka* ya Ndawichi yize hiyinapuzuka; mungukatungulula yikulu yayo yikapwe ngwe chize yapwile, 17 hanga masalila ja atu akafupe Yehova* hamwe ni akwa-mavungu eswe waze akwavuluka ha jina liami, chocho anambe Yehova* yoze wakulinga yino yuma yeswe, 18 yuma yize yami natesele* kulinga chize ku shakulu.’ 19 Kashika nyonga liami* ngwami, kanda tupinjisa atu wano akwa-mavungu waze anazange kulingila Zambi. 20 Alioze twasonekenenu hanga ehuke chikolo yuma yize hanayisela ku mahamba, utanji,* tushitu a kuhonda* ni manyinga. 21 Mumu chize ku mashimbu akunyima, atu kakwambujola Shimbi ya Mose mu mbonge ni mbonge, ni kujitanga ni liji linene mu masunangonga ha sambata jeswe.”
22 Hohene apostolo ni makulwana hamwe ni mandumbu eswe mu chikungulwila, yaatesa kutongola amwe malunga hakachi ko hanga aatume ku Andiakia hamwe ni Paulu ni Mbarnabe. Yaatuma Yunda yoze avuluka nawa ngwo Mbarsavwa ni Saila, malunga waze te akusongwela mukachi ka mandumbu. 23 Yasoneka mukanda ni kuutuma kupalikila muli ayo ngwo:
“Yetu mandumbu jenu apostolo ni makulwana, tunanumeneka yenu mandumbu jetu akwa-mavungu nwatwama ku Andiakia, ni ku Seria, ni ku Selishia! 24 Hitunevu ngwo, amwe hanakatuka kuli yetu ni kunupinjisa ni maliji jo ni kweseka kwenyeka* ufulielo wenu. Alioze, yetu kwetu kutwahele shimbi niyimwe ha chikuma chino. 25 Kashika twatesa ni mbunge yimuwika kusakula malunga ni kwatuma kuli yenu hamuwika ni mandumbu jetu a zango Mbarnabe ni Paulu, 26 waze ahanyine mwono wo mu jina lia Mwene wetu Yesu Kristu. 27 Tunanutumina Yunda ni Saila e no makanwambulwila yuma yize twanusonekena. 28 Mumu hichapemena spiritu yisandu ni yetu nawa ngwetu, kanda tunutwika yiteli yilemu shina wika yuma yize chatamba kukaula. 29 Nungenu ni kwehuka yuma yize hanayilambula ku mahamba, manyinga ni tushitu a kuhonda* ni utanji.* Nyi nwalifunga ku yino yuma, munulinga kanawa. Mwoyo wenu!”*
30 Chocho muze te haashika, malunga wano yaya ku Andiakia yakungulula chizavu cheswe ni kwaha mukanda. 31 Mba muze te hautanga yaawahilila chinji ni maliji a utakamiso. 32 Amu Yunda ni Saila no apwile aprofeta, yakwasa mandumbu ni kwatakamisa ni pande jinji. 33 Muze te hatwamako amwe mashimbu, mandumbu yaashika ni sambukila, mba Yunda ni Saila yahiluka kuli waze aatumine. 34* —— 35 Alioze Paulu ni Mbarnabe yasala mu Andiakia ni kulongesa ni kwambujola sango jipema ja liji lia Yehova* hamwe ni mandumbu akwo.
36 Kulutwe lia matangwa amwe, Paulu yamba kuli Mbarnabe ngwenyi: “Haliapwila tuhilukenu tukameneke mandumbu jetu mu mambonge eswe kuze twambujolwele liji lia Yehova* hanga tumone chize ali.” 37 Mbarnabe kazangile kuya ni Yoano yoze te avuluka ngwo Marku. 38 Alioze Paulu katayijile kuya ni Yoano mumu iye kalihandunwine no mu Pamafwilia. Chikwo nawa, kakwashile mu mulimo wa kwambujola. 39 Chocho yalihamika* kuhiana, kashika yalihandununa umwe ni mukwo. Mbarnabe yaya ni Marku yanjila mu ulungu yaya ku Shipre. 40 Paulu yasakula Saila, mba muze mandumbu te halemba kuli Yehova* hanga amufunge, Paulu ni Saila yaya. 41 O kayile ku Seria ni Selishia ni kutakamisa yikungulwila.