Asonekene Luka
22 Chiwanyino cha Mbolo yize kuyishi Futunwiso te chinakundama, chize avuluka ngwo Chizomboka. 2 Chikwo nawa, asasendote a lutwe ni alongeshi a shimbi te kanafupu uhashi wa kumukwata ni kumushiha, alioze te kakwivwa woma wa mbunga. 3 Mba Satana yanjila muli Yundase, yoze avuluka ngwo Ka-Keriote, umwe wa kuli e Kumi ni Aali. 4 Yundase yaya ni kuhanjika ni asasendote a lutwe ni tupitau a tembele chize makunjika Yesu kuli ayo. 5 Ayo yawahilila, kashika yalitesa hanga amwehe mbongo ja prata. 6 Chocho iye yatayiza, yaputuka kufupa uhashi upema hanga amukunjike kuli ayo, ha shimbu lize kuheshi mbunga.
7 Tangwa lia Chiwanyino cha Mbolo yize kuyishi Futunwiso yiliheta, ha shimbu lize atamba kuhana chitapo cha Chizomboka; 8 mba Yesu yatuma Petulu ni Yoano, yaalweza ngwenyi: “Yeenu nululieke Chizomboka hanga tukachilie.” 9 O yamuhula ngwo: “Kulihi unazange hanga tukachilulikile?” 10 Iye yaakumbulula ngwenyi: “Panjikenu! Muze mununjila mu mbonge, munulitakana ni umwe lunga yoze unambata mulondo wa meya. Mukaulenu ndo mu zuwo lize iye manjila. 11 Ambenu kuli mwenya-zuwo ngwenu: ‘Longeshi katutuma kuli yena hanga tukuhule ngwo: “Chipatulo cha ngeji kulihi chili hanga yami ngulilemo Chizomboka ni tumbaji twami?”’ 12 Lunga wacho, makanulweza chipatulo chinene cha kwilu muze muli yuma yeswe. Mwenamo munululiekela Chizomboka.” 13 Chocho ayo yaya, yawana yuma yeswe ngwe chize Yesu aalwezele, yalulieka Chizomboka.
14 Muze ola yahetele, yatwama ku mesa ni apostolo jenyi. 15 Iye yamba kuli ayo ngwenyi: “Nazangile kulu kulia Chizomboka chino hamwe ni yenu, shimbu kanda nguchimona lamba; 16 mumu ngunanulweze ngwami: Chichi kachilia nawa ndo muze muchikamanunuka mu Wanangana wa Zambi.” 17 Muze iye hatambula musenge, yasakwilila Zambi, yamba ngwenyi: “Wenu musenge au, nwenu, upalikisenu hakachi kenu, 18 mumu ngunanulweze ngwami: Kuputuka haliapwila chichi kanwa nichimwe cha ku mihuko ya vindera ndo ha tangwa lize Wanangana wa Zambi muwiza.”
19 Iye yanda nawa mbolo, yasakwilila Zambi, yayipalula yayihana kuli ayo yamba ngwenyi: “Mbolo yino yinalumbunuka mujimba wami, uze mahana hali yenu. Nungenu ni kuchilinga hanga nukangwiwuluke.” 20 Yalinga chizechene nawa ni musenge, muze te halia, yamba ngwenyi: “Musenge uno unalumbunuka usendo waha kupalikila mu manyinga jami, waze mamwangana mumu hali yenu.
21 “Alioze, nyingikenu ngwenu, kwoko lia yoze mangukunjika lili hamwe ni yami ha mesa. 22 Kwamba pundu, mwe Mwana-mutu maya kwenyi kulita ni chize hanachambe, alioze lamba kuli mutu yoze mamukunjika!” 23 Yaputuka kulihula umwe ni mukwo ngwo, iya chamwenemwene hakachi ketu malinga chino.
24 Alioze, ayo yaputuka kulihamika chinji hanga anyingike iya munene hakachi ko. 25 Mba, Yesu yaalweza ngwenyi: “Mianangana ja akwa-mavungu, kakulipwisa miata hali ayo, ni waze akuyula hali ayo kakwavuluka ngwo Atu Apema. 26 Yenu kunwatambile kupwa chocho. Alioze yoze mazanga kupwa munene hakachi kenu, katamba kupwa ngwe kanuke, yoze mazanga kupwa mwanangana, katamba kulingila akwo. 27 Alioze, iya munene, shina yoze unatwama ku mesa nyi yoze unavumbika? Hi yoze ko unatwama ku mesa? Alioze yami nguli mukachi kenu ngwe yoze unanukalakalila.
28 “Kashika, yenu nuli waze nwanyongonona hamwe ni yami mu yeseko yami; 29 yami ngunalingi usendo ni yenu wa wanangana, ngwe chizechene Tata alinga usendo ni yami, 30 hanga nukalie, nukanwe ku mesa yami mu Wanangana wami ni kutwama ha ngunja hanga nukapatwile mavungu 12 a Izalele.
31 “Semone, Semone, panjika! Satana kanazange kunusala ngwe chize akusala tiliku. 32 Alioze, naliumba chjinji kuli Zambi mumu lia yena hanga ufulielo we uhone kukokoloka; ni yena muze muufuna, takamisa mandumbu je.” 33 Chocho, Petulu yamulweza ngwenyi: “Mwene, hinalilulieka kulu hanga nguye ni yena chipwe mu zuwo lia ususu, chipwe ku kufwa.” 34 Alioze, Yesu yamba kuli iye ngwenyi: “Petulu, ngunakulweze pundu ngwami, musono shimbu ndemba kanda achisanyika mukalikala yami yisuho yitatu, ngwo kuwangunyingikine.”
35 Iye yaahula nawa ngwenyi: “Muze nanutumine te kunushi chipakumuna cha mbongo, chipwe kulia, chipwe sapato, shina nunakahona yimwe?” Ayo yakumbulula ngwo: “Ka.” 36 Mba iye yaalweza ngwenyi: “Alioze, haliapwila yoze uli ni chipakumuna cha mbongo achimbate, yoze uli ni tuku ya kulia, aye nayo, yoze keshi katana, alanjise chikuto chenyi alande umuwika. 37 Mumu ngunanulweze ngwami, chuma chize hanasoneka chinambe ngwo: ‘Iye yamwalula hakachi ka yitanguke,’ chatamba kumanunuka hali yami. Ewa chino chinamanunuka hali yami.” 38 Ayo yamulweza ngwo: “Mwene, tuli ni tutana aali hano.” Iye yamba ngwenyi: “Kanakumbana.”
39 Muze atuhukile, kulita ni ndako yenyi, yaya ku Mulundu wa Olevwe, e tumbaji no yamukaula. 40 Muze aheteleko, iye yaalweza ngwenyi: “Nungenu ni kulemba hanga nuhone kunjila mu cheseko.” 41 Iye yasosoloka kuli ayo ngwe kachipinji ka kukonga cha liwe, yaliumba makungunwa hashi, yaputuka kulemba, 42 yamba ngwenyi: “Tata, nyi unazange chiza kama musenge uno kuli yami. Alioze, ulingiwe upale wenu hi upale wami ko.” 43 Mba mungelo wa mwilu yasoloka kuli iye yamutakamisa. 44 Alioze, yalipikala chinji, yanunga ni kulemba chikolo; matukuta jenyi yasotoka ngwe misoto ya manyinga hashi. 45 Muze hahwisa kulemba, yakatuka yaya kuli tumbaji, yaawana mu tulo, te kanahongo mumu lia chinyengo. 46 Iye yamba kuli ayo ngwenyi: “Mumu liaka nunapombo? Katukenu nungenu ni kulemba hanga nuhone kunjila mu cheseko.”
47 Muze iye te anahanjika, mbunga yiyiheta, lunga avuluka ngwo Yundase umwe wa kuli Kumi ni Aali, mwe te unaasongwela, yakundama kuli Yesu hanga amumbejale. 48 Alioze, Yesu yamwamba ngwenyi: “Yundase, yena unakunjika Mwana-mutu ni mbeju?” 49 Muze waze apwile ni Yesu amwene yize te yinalingiwako, yahula ngwo: “Mwene, twalambe ni katana?” 50 Umwe wa kuli ayo yalamba ndungo wa mwata wa asasendote ni katana,* yamuteta twitwi lia utata. 51 Alioze, Yesu yamulweza ngwenyi: “Kwahwa.” Yakwata ku twitwi lia lunga wacho, yamuwuka. 52 Yesu yamba kuli asasendote a lutwe, tupitau a mu tembele ni makulwana waze ayile ni kumukwata ngwenyi: “Nweza kuli yami ni tutana ni mitondo ngwe nguli chingalwe* nyi? 53 Muze napwile hamwe ni yenu tangwa ha tangwa mu tembele, kunwakesekele kungukwata. Alioze ola yino yili ni yenu ni ya mwata wa waze ali mu milima.”
54 Mba yamukwata, yamutwala ku zuwo lia mwata wa asasendote. Alioze, Petulu te kanaakaula kanonajila. 55 Muze te hawika kahia muchima lia yiize ni kutwama hamuwika, Petulu yatwama hakachi ko. 56 Hazehene, umwe ndungo wa pwo, muze hamumona kanatwama ku jiko, yahulikila meso jenyi hali Petulu, yamba ngwenyi: “Lunga yono neye kapwanga hamwe nenyi.” 57 Alioze, Petulu yalikala ni kwamba ngwenyi: “Yena pwo, chamunyingikine kwami.” 58 Muze te hikwapalika mashimbu akehe, mutu mukwo yamumona, yamba ngwenyi: “Ni yena uli umwe wa kuli ayo.” Alioze, Petulu yamba ngwenyi: “Yena lunga, hi yami ko.” 59 Muze te hikwapalika ola yimuwika, lunga mukwo yaputuka kumujijiminya ni kwamba ngwenyi: “Pundu lume, lunga yono kapwanga ni iye, mumu kali Ka-Ngalileya!” 60 Alioze, Petulu yamba ngwenyi: “Yena lunga, chanyingikine yize unambe.” Hazehene, muze te machihanjika, ndemba yatambika. 61 Chocho, Mwene yateuluka yatala Petulu, mba Petulu yewuluka maliji a Mwene, waze ambile kuli iye ngwenyi: “Musono, shimbu ndemba kanda achisanyika, mukalikala yami katatu keswe.” 62 Chocho, yatuhuka, yalila chinji.
63 Malunga waze akwachile Yesu, yaputuka kumukekuna ni kumulamba; 64 muze te hamufuka ku meso, yamba ngwo: “Profeteza! Iya wakulamba?” 65 Yamwamba yuma yikwo yinji yakumushililika nayo.
66 Muze hikwacha, mbunga ya makulwana ja atu, asasendote a lutwe ni alongeshi a shimbi yalikungulula, yamutwala ku Chota Chinene cha Usopelo, yamba ngwo: 67 “Nyi yena uli mwe Kristu, tulweze.” Iye yaakumbulula ngwenyi: “Chipwe mungunulweza, kunuchi kutayiza chipwe hakehe. 68 Chikwo nawa, nyi nanuhula yihula, kunuchi kungukumbulula. 69 Alioze, kukatuka musono, Mwana-mutu makatwama ku kwoko lia chindume lia Zambi Mukwa-Ndundo.” 70 Hohene, atu eswe yamuhula ngwo: “Kuma yena uli Mwana wa Zambi nyi?” Iye yaakumbulula ngwenyi: “Yenu ene nunachambe ngwenu nguli Mwana wa Zambi.” 71 Ayo yamba ngwo: “Mumu liaka mutufupa yela akwo? Mumu hitwalivwila yetu ene yize yatuhuka mu kanwa lienyi.”