Mukanda Wamuchiali wa Petulu
3 Akwetu a zango, uno we mukanda wamuchiali ngunanusonekena, ngwe chizechene ngunakanusonekena mukanda utangu, ngunakasumuna uhashi wenu wa kunyonga kanawa ha kunwiwulula yuma yino, 2 hanga nwiwuluke maliji waze aprofeta ahanjikile ha mashimbu a kunyima, ni shimbi ya Mwene kanda Chilamwina chetu, yize anulwezele kupalikila muli apostolo jenu. 3 Chuma chitangu, nyingikenu ngwenu, ha matangwa a kusula, akwa-kukekuna kumakasoloka ni maliji jo a kukekuna, ni kulinga yuma kulita ni usolo wo. 4 Ayo makamba ngwo: “Mwene kambile ngwenyi kumeza, mba yolihi? Talenu, chize haze tulamba twetu apombele mu ufwe, yuma yeswe yinanungu chizechene ngwe chize yapwile ku uputukilo wa yitangiwa.”
5 Mumu ayo kakulengulula umwenemwene uno unambe ngwo, ha miaka yinji kunyima, malilu ni hashi te kwe yatwama, ku liji lia Zambi, hashi yihalihandununa ni meya, hashi yihapwa hakachi ka meya; 6 mba kupalikila mu yuma yino, atu* a ha mashimbu jacho yaanongesa muze hashi hazalile ni meya. 7 Alioze, ku liji lioliene, malilu ni hashi yize yiliko musono, kanayitulikila kahia, kanayifungu ndo ha tangwa lia upatwilo ni lia unongeso wa atu api.
8 Kashika, mandumbu jami a zango, kanda nuvulama chino, kuli Yehova,* tangwa limuwika lili ngwe kanunu ka miaka, ni kanunu ka miaka ngwe tangwa limuwika. 9 Yehova* keshi kulaluka ni chilakenyo chenyi ngwe chize atu amwe akunyonga, alioze iye kakulihumikiza* ni yenu, mumu kazangile hanga mutu niumwe atoke, alioze kanazange hanga eswe alikonyeke. 10 Alioze, tangwa lia Yehova* mulikeza ngwe mwiji, ha tangwa liacho, malilu makapalika ni lundunjila munene, yuma mu malilu ni hashi, muyikasangunuka mumu lia kusasaminya ni kahia, hashi ni yuma yize yatwamaho muyikawema.
11 Kashika, amu yuma yino yeswe muyikasangunuka chocho, nyongenu ha mutapu wa atu waze nwatamba kupwa.* Nwatamba kupwa atu a yitanga yisandu, ni kulinga milimo yize yinasolola ngwo nwakuwayila Zambi, 12 muze nunachishimbwila ni kwiwuluka mashimbu eswe kwiza cha tangwa lia Yehova.* Ha tangwa lize malilu makaanongesa ni kahia, ni yuma muyikasangunuka ni chivukuminya cha kahia kanji. 13 Alioze Zambi hanalakenya lilu liaha ni hashi haha haze muhakapwa ululi, yenayo tunashimbwila.
14 Kashika, mandumbu a zango, amu nunashimbwila yuma yino, senu tachi hanga iye anuwane kunushi chipeka chipwe kapalia, ni kunuwana mu sambukila. 15 Chikwo nawa, monenu kulihumikiza* cha Mwene wetu ngwe ulamwino, ngwe chize anusonekenene ndumbwetu wa zango Paulu, kulita ni mana waze amuhele, 16 ha kuhanjika yuma yino ngwe chize ayisonekene mu mikanda yenyi yeswe. Alioze yuma yimwe yize yilimo yili yikalu kuyinyingika, kashika akwa-kalengululo ni waze keshi kujikiza akuyihengesa, ngwe chize akulinga ni Yisoneko yikwo hanga alinehene ene unongeso.
17 Kashika, akwetu a zango, amu hinwalianga kunyingika yuma yino, kanyamenu hanga achine kunupiangula kuli atu waze keshi kwononokena shimbi, hanga nuhone kulimbuka. 18 Alioze, nungenu ni kukola mu chawana cha keke, ni mu chinyingi cha Mwene wetu kanda Chilamwina chetu Yesu Kristu. Uhenya ukapwe kuli iye haliapwila, ndo ku miaka ya mutolo. Amene.