Kuli Titu
1 Yami Paulu, ndungo ya Zambi ni postolo wa Yesu Kristu, mukulita ni ufulielo wa waze Zambi hanatongola ni chinyingi chamwenemwene, chize chinalite ni uwayilo wetu kuli Zambi. 2 Ufulielo wami unakatuka ha kutalatala cha mwono wa mutolo. Zambi yoze keshi mahuza mwe walakenyene kutalatala chacho ha miaka yinji kunyima. 3 Alioze ha shimbu lialita, yanyingikisa liji lienyi kupalikila mu mulimo wa kwambujola uze angukunjikile, kulita ni shimbi ya Zambi, Chilamwina chetu; 4 kuli Titu yoze wapwa ngwe mwanami wamwenemwene kulita ni ufulielo uze tukwete:
Chawana cha keke ni sambukila ya kuli Zambi, mwe Tata, ni ya Kristu Yesu, Chilamwina chetu, yikapwe hamwe ni yena.
5 Nakuhichikile mu Kreta hanga ululieke yuma yize te kuyishi kanawa,* ni kutongola makulwana a mu yikungulwila mu mbonge ni mbonge, kulita ni usongwelo uze nakuhele ngwami: 6 Mukulwana wa mu chikungululwila chamutambile kupwa ni kapalia, katamba kupwa lunga wa pwo umuwika, ana jenyi katamba kupwa akwa-kufuliela, hi akwa-lufuma mupi ko chipwe akwa-kukolema. 7 Mumu, ngwe kaselo yoze hanatongola kuli Zambi, kalayi katambile kupwa ni kapalia, katambile kupwa mukwa-pami, chipwe mukwa-kutenuka ni kawashi, chipwe mukwa-kuzengewa, chipwe mukwa-kulambana, chipwe mukwa-kuzanga mbongo, chipwe mukwa-kufupa wika yuma yenyi mwene. 8 Alioze katamba kupwa mukwa-kuzumbula ngeji, mukwa-kuzanga yipema, mukwa-mana,* mukwa-ululi, mukwa-kushishika, mukwa-kusuula, 9 ni kulikwachilila ku liji lia umwenemwene* hakutwala ku utotombo wenyi wa kulongesa, hanga ahase kutakamisa* kupalikila mu malongeso apema,* ni kukumika akwa-kuhamika.
10 Mumu kuli atu anji akwa-kukolema, akwa-kuhanjika yuma yamokomoko ni akwa-kwonga, chipi-chipi waze akulikwachilila ha ungalami. 11 Chatamba kuholesa makanwa jo, mumu atu wano kakununga ni kupihisa ufulielo wa asoko ha kwalongesa yuma yize katambile, hanga azuke upite wa sonyi. 12 Umwe wa kuli ayo, profeta wo ene wambile ngwenyi: “A-Kreta kakuhanjika mahuza matangwa eswe, kali tushitu asasu, kali yileya waze akuzanga kulia chinji.”
13 Maliji wano kali amwenemwene. Kashika, nunga ni kwakumika chikolo hanga apwe ni ufulielo ukolo, 14 kanda apanjika nawa ku yishima yamokomoko ya A-Yunda ni ku shimbi ja atu waze hanapianguka ku umwenemwene. 15 Kuli akwa-kulinanga, yuma yeswe yapwa yalinanga; alioze kuli akwa-luchisa waze keshi kufuliela, kukushi nichimwe chuma chalinanga, mumu kunyonga cho ni mbunge jo kujalichisa. 16 O kakwamba kumeso ja atu ngwo kananyingika Zambi, alioze kakulikalaye kupalikila mu yitanga yo, mumu kapwa yizelwokeso ni yihulia, kashika keshi kwatayiza kulinga chuma cheswacho chipema.