Mukanda Wamuchiali wa Petulu
1 Yami Semone Petulu, ndungo ni postolo wa Yesu Kristu, ngunasonekena waze hanazuku ufulielo ulemu ngwe wa yetu, kupalikila mu ululi wa Zambi ni wa Chilamwina chetu Yesu Kristu ngwami:
2 Chawana cha keke ya Zambi ni sambukila yilumbame kuli yenu, kupalikila mu chinyingi chamwenemwene cha Zambi ni cha Yesu, Mwene wetu, 3 mumu ndundo ja Zambi jatwaha yuma yeswe yize yakutukwasa hanga tupwe ni mwono ni kumulingila, mumu lia chinyingi chamwenemwene cha Yoze watusanyikine kupalikila mu uhenya ni mu upeme wenyi. 4 Kupalikila mu yuma yino, iye hanatwehe yilakenyo yilemu, yinene chinji, hanga kupalikila mu yilakenyo yacho, nulifwe ni Zambi, ni kukatuka ku yuma yipi ya hano hashi yize yakwiza mumu lia usolo upi.
5 Kashika, ha chikuma chino, wezenu ku ufulielo wenu yitanga yipema, ku yitanga yenu yipema, wezenu chinyingi, 6 ku chinyingi chenu, wezenu kulihumikiza,* ku kulihumikiza chenu, wezenu kunyongonona, ku kunyongonona chenu, wezenu kuwayila Zambi, 7 ha uwayilo wenu kuli Zambi, wezenu zango lia undumbu, ha zango lienu lia undumbu, zangenu atu eswe. 8 Mumu yuma yino nyi yapwa muli yenu ni kulumbama, muyinukwika kuzeya ku ufulielo hanji kupwa atu waze keshi kwima mihuko hakutwala ku chinyingi chamwenemwene cha Mwene wetu Yesu Kristu.
9 Alioze, yoze keshi ni yuma yino, kali kapuputa, kakufuka meso jenyi hanga ahone kumona pangu, kakuvulama chize amupemesene ku shili yenyi yikulu. 10 Kashika, mandumbu, likolwezenu chinji hanga nukakaminye ha kutambika chize anutambikile ni ha kunutongola chize anutongwele. Mumu nyi nwanunga ni kulinga yuma yino, kunuchi kulimbuka chipwe hakehe. 11 Kwamba pundu, nyi nwachilinga, makanutayiza nukanjile mu Wanangana wa mutolo wa Mwene wetu kanda Chilamwina chetu Yesu Kristu.
12 Kashika, ngunazange kunwiwulula mashimbu eswe yuma yino, chipwe ngwe nunayinyingika ni kujama mu umwenemwene uze uli muli yenu. 13 Kashika, shimbu nguchili ni mujimba wa musunya,* nanyonga ngwami natamba kunukasumuna ha kunwiwulula yuma yino, 14 mumu ngunanyingika ngwami kwasala hakehe mujimba wami wa musunya mauchiza, ngwe chize Mwene wetu Yesu Kristu angulwezele zwalala. 15 Mungusa tachi jinji hanga muze munguya, yenu ene nununge ni kwiwuluka yuma yino.
16 Mumu twakakawile yishima ya mahuza, yakulumba, muze twanunyingikishine ndundo ni kusoloka cha Mwene wetu Yesu Kristu. Alioze, twamwene uhenya wenyi ni meso jetu. 17 Mumu iye katambwile ulemu ni uhenya kuli Zambi, mwe Tata, muze maliji wano ejile kuli iye ni uhenya unene ngwo: “Yono mwe Mwanami, nakumuzanga chinji, muli iye nakuwahilila.” 18 Ewa, yetu twevwile maliji wano akatukile mwilu muze twapwile nenyi ku mulundu usandu.
19 Kashika, tuli ni liji lia uprofeto lize linatwehe nawa shindakenyo, nwakulinga kanawa ha kulipanjika, lili ngwe ndeya yize yakutemuna mu milima, (ndo muze kwilu mukucha ni ha kuvumbuka cha katongonoshi wa ha mandemba) mu mbunge jenu. 20 Kashika, chitangu nyingikenu ngwenu, kukushi uprofeto niumwe wa mu Yisoneko uze wakukatuka ku nyonga lia mutu. 21 Mumu uprofeto niumwe kuwakejile ku upale wa mutu, alioze atu kapwile ni kuhanjika yuma ya kuli Zambi, kulita ni chize spiritu yisandu yapwile ni kwasongwela.