Usolwelo wa Yesu Kristu Alwezele Kuli Yoano

15 Namwene chilayi chikwo mu malilu, chinene, chakukomwesa, angelo shimbiali kanakwata yilungo shimbiali. Yino yili yilungo yakasula, mumu kupalikila mu yilungo yacho, Zambi makamanununa ufwatulo wenyi.

2 Namwene chuma chize chapwile ngwe kalunga-lwiji wa katalilo wakuchinga ni kahia, waze akumbile ngongo, kaponya kenyi, ni kwalula cha jina lienyi, te kanamana hakamwihi ni kalunga-lwiji wa katalilo ni kukwata tulialia twa Zambi. 3 O te kanembi mwaso wa Mose ndungo ya Zambi ni mwaso wa Mwana-panga ngwo:

“Yehova* Zambi Mukwa-Ndundo-Jeswe, yitanga yenu yapwa yinene, yakukomwesa. Majila jenu kapwa a ululi ni a umwenemwene, Mwanangana wa mutolo. 4 Yehova* iya yoze kechi kukuvwila woma ni kuchichimieka jina lienu mumu yenu wika nwashishika? Mavungu eswe makeza kuli yenu ni kuwayila kumeso jenu, mumu yitanga yenu ya ululi hanayisolola.”

5 Kulutwe lia yino yuma, namwene azulwile muma musandu mu mbalaka ya uchela mwilu, 6 mba angelo shimbiali waze te anakwata yilungo shimbiali atuhukile muma musandu, te kanazala mahina a linyu apema, apeyima ni miya ya oru yakujichika ha tulo. 7 Umwe wa kuli yitangiwa yiwana ya mwono, wahanyine kuli angelo shimbiali malonga shimbiali a oru a too ni ufwatulo wa Zambi yoze watwama ku miaka ya mutolo. 8 Muma musandu mwazalile too ni mwishi mumu lia uhenya wa Zambi, ni mumu lia ndundo jenyi, niumwe yoze wahashile kunjila muma musandu wakuhi, ndo muze yilungo shimbiali ya angelo shimbiali yamanunukine.