Kuli A-Roma
7 Yami ngunahanjika kuli yenu mandumbu, (waze nunanyingika shimbi) shina kunwanyingikine ngwenu, Shimbi yili ni chiyulo hali mutu shimbu lieswe mapwa ni mwono nyi? 2 Mumu kulita ni shimbi, pwo makashiwa kuli mukwo-lunga ha shimbu lieswe lunga lienyi mapwa ni mwono; alioze nyi mukwo-lunga mafwa, pwo matusuka ku shimbi ya mukwo-lunga. 3 Kashika, nyi maya kuli lunga mweka shimbu mukwo-lunga achili ni mwono, mamuvuluka ngwo, chipangala. Alioze nyi mukwo-lunga mafwa, iye matusuka ku shimbi yenyi, chocho kechi kumuvuluka ngwo, chipangala, chipwe maya ulo kuli lunga mweka.
4 Chizechene nawa mandumbu, mujimba wa Kristu wanutuswile ku Shimbi ya Mose. Chino chalingiwile hanga nukapwe wa mutu mweka, yoze ahindwishile hakachi ka afu hanga tukeme mihuko yize muyihalisa Zambi. 5 Mumu muze twatwamine kulita ni musunya wetu, usolo uze ye Shimbi yakasumwine walingile mu mijimba yetu hanga yikeme mihuko yize yakutwala ku kufwa. 6 Alioze haliapwila hanatutusula ku Shimbi, chikwo nawa, hitunafu ku chuma chize chatupwishile funge. Yetu haliapwila tunalingila Zambi mu jila yaha kulita ni spiritu, hi mu jila yikulu ko kulita ni Shimbi jize jasonewene.
7 Mba kuchi mutwamba? Shina Shimbi yili shili nyi? Kwamba pundu ka! Yami kachi chanyingikine shili nyi ngwe Shimbi kuyatwamineko. Chikwo nawa, kachi chanyingikine ngwami, chili chipi kuvwila chipululu yuma ya akwetu nyi ngwe Shimbi kuyambile ngwo: “Kanda ukavwila chipululu yuma ya akwenu.” 8 Alioze shili, ni kuwana unjililo ku shimbi, yalingile muli yami chipululu cheswe. Mumu shili nyi kuyishi shimbi, kuyinafu. 9 Muze te Shimbi kuyishiko napwile ni mwono. Mba muze Shimbi hiyeza, shili yiyihuzuluka, alioze yami yingufwa. 10 Mba yingumona ngwami, shimbi yize te yatamba kungwaha mwono, kumana yinangutwala ku kufwa. 11 Mba shili, yiyiwana unjililo mu shimbi, yiyingwonga, ni kungushiha. 12 Chocho Shimbi ya Mose yili yisandu, ni yize shimbi yacho yakwamba yili ya ululi ni yipema.
13 Shina chino chinalumbunuka ngwo, chuma chipema che chanehene kufwa chami? Ka, shili ye yanehene kufwa chami! Shimbi yili yipema, alioze yakusolola pundu ngwo, shili ye yakokele kufwa chami. Kashika, shimbi yasolwele chize shili yapwa yipi kuhiana. 14 Mumu tunanyingika ngwetu, Shimbi yinakatuka kuli Zambi kupalikila mu spiritu yenyi. Alioze mulonga kuli yami uli, mumu nguli musunya, hanangulanjisa ngwe ndungo ya shili. 15 Yuma yize nakulinga, nakuyilinga ni kuyambashana. Mumu yize ngunazange kulinga chishi kuyilinga, alioze yize chazangile kulinga yenayo nakulinga. 16 Muze nakulinga yize chazangile kulinga, chino chakusolola ngwo, ngunatayiza ngwami Shimbi yili yipema. 17 Kashika hi yami ko nakuyilinga, alioze shili yize yatwama muli yami. 18 Mumu ngunanyingika ngwami muli yami, hanji ngwami, mu musunya wami, kumwatwamine nichimwe chuma chipema; mumu zango lia kulinga yuma yalita nguli nalio, alioze chishi ni tachi ja kulinga yuma yacho. 19 Chishi kulinga yipema yize ngunazange, alioze nakulinga yipi yize chishi kuzanga. 20 Mba nyi nakulinga yize chishi kuzanga, hi yami ko ngunayilingi, alioze shili yize yatwama muli yami.
21 Kashika, ngunawane shimbi muli yami: Muze ngunazange kulinga yuma yalita, yuma yipi muyiza muli yami. 22 Kwamba pundu, mu mbunge yami, nakuzanga shimbi ya Zambi, 23 alioze ngunamono shimbi yeka mu mujimba wami* yize yinase jita ni shimbi ya kunyonga chami, ni kunguneha ku ufunge ku shimbi ya shili yize yili mu mujimba wami.* 24 Lwangu mama, yami mutu wamokomoko! Iya mangupulula ku mujimba uno wa kufwa? 25 Nakusakwilila Zambi mumu iye kangupulwile kupalikila muli Yesu Kristu Mwene wetu! Kashika mu manyonga jami, ami nguli ndungo ya shimbi ya Zambi, alioze mu musunya wami nguli ndungo ya shili.