Mukanda Utangu wa A-Korindu
1 Yami Paulu angutambikile ngupwe postolo wa Yesu Kristu, ku upale wa Zambi, hamwe ni ndumbwetu Sosetene, 2 ku chikungulwila cha Zambi chize chili mu Korindu, kuli waze hanaasela ku usandu muli Kristu Yesu, hanaatambika akapwe asandu hamwe ni waze eswe akutambika ha jina lia Mwene wetu Yesu Kristu, Mwene wo kanda ni wetu:
3 Chawana cha keke ni sambukila ya kuli Zambi Tata yetu ni ya kuli Yesu Kristu Mwene wetu, yipwe hali yenu.
4 Nakusakwilila kuli Zambi yami matangwa eswe hakutwala kuli yenu, mumu lia chawana cha keke chize Zambi anuhele muli Kristu Yesu. 5 Mumu lia kulinunga chenu ni Kristu, hinunatambula yuma yeswe hamwe ni utotombo wa kwambujola kanawa liji lia Zambi ni kulinyingika kanawa. 6 Chikwo nawa, sango hakutwala kuli Kristu ajikolesele mukachi kenu 7 hanga nuchine kuhona niumwe utotombo, muze nunashimbwila usolwelo hakutwala kuli Mwene wetu Yesu Kristu. 8 Iye makanutakamisa nawa ndo ku songo. Chocho, kechi kanuwana ni chitela nichimwe ha tangwa lia Mwene wetu Yesu Kristu. 9 Zambi kali mukwa-kushishika yoze wanutambikile nulinunge* ni Mwanenyi Yesu Kristu, Mwene wetu.
10 Ngunaliumbu kuli yenu mandumbu, mu jina lia Mwene wetu Yesu Kristu ngwami, nukahanjike chuma chimuwika. Kanda nulihandunwona, alioze nukalinunge hamuwika mu kunyonga chimuwika, ni upatwilo umuwika. 11 Mumu atu amwe a ku zuwo lia Choe hanangulweze hakutwala kuli yenu ngwo, kulihangujola chili hakachi kenu. 12 Chuma ngunambe kwamba chili ngwo, mutu ni mutu hakachi kenu kakwamba ngwenyi: “Ami nguli wa Paulu,” mukwo ngwenyi: “Ami nguli wa Apolu,” au ngwenyi: “Yami nguli wa Sefwa,”* mweka nawa ngwenyi: “Ami nguli wa Kristu.” 13 Shina Kristu kali wa kuhandununa? Kutala, Paulu kafwile ha mutondo wa lamba mumu hali yenu nyi? Nyi shina kanupapachishile mu jina lia Paulu? 14 Ngunasakwila kuli Zambi mumu chapapachishile niumwe wa kuli yenu, shina wika Krispu ni Ngayu, 15 hanga niumwe achine kwamba ngwenyi, kamupapachishile mu jina liami. 16 Ewa, napapachishile nawa Estefana ni akwa-zuwo lienyi. Alioze chanyingikine nyi napapachishile nawa atu amwe. 17 Kwamba pundu, Kristu kangutumine hanga ngupapachise atu, alioze ngukambujole sango jipema, hi ni maliji a mana ko, hanga nguhone kulelesa kufwa cha Kristu ha mutondo* wa lamba.
18 Mumu sango hakutwala ku mutondo* wa lamba, jili uhepuke kuli waze ali mu jila ya kwonwona,* alioze kuli yetu waze analamwina, jili ndundo ja Zambi. 19 Mumu chinasonewa ngwo: “Kumungukahwisa mana ja akwa-mana ni kulituna* malinjekela ja akwa-malinjekela.” 20 Mukwa-mana kulihi ali? Longeshi* ya shimbi yolihi? Mukwa-kuhangujola wa mwakono yolihi?* Te Zambi kahepwishile mana ja mwakono nyi? 21 Se ni kulita ni mana a Zambi, akwa-hashi ku mana jo kanyingikine Zambi. Kashika mumu lia uhepuke wa yize akwambujola, Zambi hanawahilila kulamwina waze akufuliela.
22 Shimbu A-Yunda anechi yilayi ni A-Ngresia anafupu mana; 23 yetu twakwambujola hakutwala kuli Kristu yoze wafwile ha mutondo wa lamba, sango jize kuli A-Yunda japwa chitalingiso, kuli akwa-mavungu japwa uhepuke. 24 Kuli waze hanaatambika chipwe A-Yunda hanji A-Ngresia, Kristu je ndundo ni mana a Zambi. 25 Mumu yuma yize yakukatuka kuli Zambi yakusoloka ngwe uhepuke, yahiana mana ja atu, ni yuma yize yakukatuka kuli Zambi yize atu akumona ngwe yilelu, yahiana tachi ja atu.
26 Kashika mandumbu, nyongenu muze anutambikile, munuhasa kumona ngwenu mukachi ka waze atambikile kuli iye, kumushi akwa-mana* anji kulita ni atu, chipwe akwa-ndundo anji hanji akwa-lufuma* anji. 27 Alioze Zambi hanatongola yuma ya uhepuke ya hano hashi hanga akolese sonyi akwa-mana. Chikwo nawa, Zambi hanatongola yuma yilelu ya hano hashi hanga akolese sonyi yuma ya tachi. 28 Yuma yilelu ya hano hashi ni yuma yamokomoko, Zambi hanayitongola, ni yuma yize yishiko hanga akakuwise yuma yize yiliko. 29 Kashika, niumwe* kechi kalisamba kumeso ja Zambi. 30 Alioze Zambi hananunungu ni Kristu Yesu, mba Yesu hanasolola mana ja Zambi ni ululi wa Zambi. Kashika kupalikila muli Yesu, atu mahasa kupwa asandu ni kupwa ni utuswilo mumu lia ukuule, 31 hanga chipwe ngwe chize chinasonewa ngwo: “Yoze malisamba alisambe muli Yehova.”*