Mukanda wa Tiangu
4 Jita ni kulitachika chenu kulihi yinakatuka? Shina kuyakatukile ku usolo wenu wa musunya uze wakwasa jita mu mijimba yenu? 2 Yenu nunazange kupwa ni yuma, alioze kunushi kuhasa kupwa nayo, nunanungu ni kushiha akwenu ni kwivwa kuzo,* alioze, kunushi kuhasa kupwa ni yize nunazange. Nunanungu ni kulitachika ni kwasa jita. Kunushi nayo mumu kunushi kwita. 3 Muze nwakwita yuma, kunushi kuyitambula, mumu nwakwita ni nyonga lipi, hanga nuyikise ku usolo wenu upi wa musunya.
4 Yenu yipangala,* kunwanyingikine ngwenu usepa ni akwa-hashi wapwa kole kuli Zambi nyi? Kashika, mweswe mazanga kupwa sepa lia akwa-hashi, malipwisa mukwa-kole wa Zambi. 5 Nyi hanji nunanyongo ngwenu, chisoneko chinahanjika chamuhanjikila ha kwamba ngwo: “Spiritu ya chipululu yize yinatungu muli yetu yinazala too ni usolo wa yuma yeka ni yeka”? 6 Alioze, chawana cha keke chize Iye ananwehe, chili chinene chinji. Kashika chisoneko chinambe ngwo: “Zambi kakulimika ni waze akulinangamisa, alioze kakuhana chawana cha keke kuli waze akulikehesa.”
7 Kashika, zeyelenu kuli Zambi; alioze limikenu ni Ndiapu, mba iye kumanuchina. 8 Kundamenu kuli Zambi, mba iye makundama kuli yenu. Pemesenu moko jenu, yenu yivulumunyi, tomesenu mbunge jenu, yenu akwa-mbunge jiali. 9 Ivwenu yinyengo, lilenu. Shimbu nusehe, lilenu, shimbu nuwahilile, ivwenu yinyengo. 10 Likehesenu kumeso ja Yehova,* mba iye manunangamisa.
11 Mandumbu, litwaminenu kuhanjika yuma yipi hali akwenu. Yoze mahanjika yuma yipi hali ndumbwenyi hanji kusopesa ndumbwenyi, kanahanjika yuma yipi ha shimbi ni kusopesa shimbi. Kashika, nyi musopesa shimbi, kuushi kuyononokena, alioze uli sopi. 12 Kwatwama Mukwa-kusa shimbi ni Sopi umuwika, iye mwe uli ni ndundo ja kulamwina ni kunongesa. Alioze, yena iya, mba usopese mukwenu?
13 Haliapwila panjikenu, yenu nwakwamba ngwenu: “Musono hanji hamene, mutuya ku mbonge ya nganji, mutulingako mwaka umuwika, mutulinga mingoso ni kuzuka mbongo,” 14 chipwe ngwe kunwanyingikine chize mwono wenu muupwa hamene. Mumu nuli mbundu yize yakusoloka ha shimbu likehe, mba muyihwa.* 15 Alioze, nwatamba kwamba ngwenu: “Nyi Yehova* mapala, mutupwa ni mwono ni kulinga chinganji-chinganji.” 16 Alioze, chuma nwakulinga chili kulisambula mumu lia kulizata chenu. Kulizata chino cheswe chili chipi. 17 Kashika, nyi mutu kananyingika ngwenyi katamba kulinga chuma chize chalita, alioze keshi kuchilinga, kanavulumuna.