Mukanda Utangu wa A-Korindu
9 Shina te chatusukile nyi? Kutala chishi postolo nyi? Shina chamwene Yesu Mwene wetu nyi? Shina yenu kunushi mihuko yami mu milimo ya Mwene nyi? 2 Chipwe ngwe kuli atu akwo hi nguli postolo ko, nihindu nguli postolo kuli yenu! Mumu yenu nuli chijikilo chize chakusolola upostolo wami muli Mwene.
3 Kulisambisa chami kuli waze akungusopesa chili chino: 4 Shina kutushi ni ulite* wa kulia ni kunwa nyi? 5 Shina kutushi ni ulite wa kumbata umwe pwo yoze wa kufuliela hanga apwe ni kwendangana ni yetu ngwe chize akulinga apostolo akwo, ni mandumbu ja Mwene ni Sefwa* nyi? 6 Shina yami wika ni Mbarnabe e kutushi ni ulite wa kwecha kukalakala hanga tulikwase nyi? 7 Swalale muka masa jita ni kulifweta iye mwene? Iya matumba munda wa uvwa, mba kechi kulia mihuko yawo? Hanji iya mafunga chendo cha yimuna, mba keshi kunwa yamwa ya yimuna jenyi?
8 Shina ngunahanjika yuma yino kulita ni manyonga ja atu nyi? Shina Shimbi neyo kuyishi kuhanjika ha yuma yino? 9 Mumu chinasonewa mu Shimbi ya Mose ngwo: “Kanda ukasa ngombe ku kanwa muze anazungula mbuto.” Shina Zambi kanalihulumba hali ngombe nyi? 10 Shina iye kakambile yuma yino mumu hali yetu nyi? Pundu lume, yino yasonewene mumu hali yetu. Mumu mutu yoze wakuchipa ni yoze wakuzungula, katamba kulinga yuma yino ni kushimbwila kutambula chihanda cho.
11 Nyi hitunatumbu muli yenu yuma ya ku spiritu, shina chili chipi kutambula ukwaso wa ku musunya kuli yenu nyi? 12 Nyi atu akwo kali ni ulite* uno hali yenu, shina yetu kutushi nawo kuhiana nyi? Chipwe chocho, yetu kutwalingile chino, alioze tunanyongonona mu yuma yeswe hanga tuchine kusa chitalingiso ha sango jipema hakutwala kuli Kristu. 13 Kunwanyingikine ngwenu waze akulinga milimo yisandu, kakulia yuma ya ku tembele nyi? Hanji waze akukalakala ku chilumbilo kakutambula chihanda cha yize akulambula ku chilumbilo nyi? 14 Chizechene nawa, Mwene hanase shimbi ngwenyi, waze akwambujola sango jipema, akalile ku sango jipema.
15 Alioze, kanda ngwita kama chuma nichimwe. Pundu lume, chasonekene hanga nulinge yino yuma hali yami, mumu shinaho kufwa kuhiana—umwe kulelesa kulisambisa chami! 16 Kashika, nyi ngunambujola sango jipema, chatambile kulisamba, mumu chili chiteli chami. Kwamba pundu, lamba kuli yami nyi chambujolwele sango jipema! 17 Mumu nyi nakulinga mulimo wacho ku zango liami, mungutambula fweto; alioze, nyi hi ku zango lia yami mwene ko, chipwe chocho hanangwehe chiteli chacho. 18 Mba, fweto yami yika? Fweto yami kwambujola sango jipema chawana. Nyi nalinga chino, mungwehuka kwita yuma yize nguli ni ulite wa kwita mumu lia kwambujola sango jipema.
19 Mumu chipwe ngwe ngunatusuka hakutwala kuli eswe, nihindu hingunalipwisa ndungo wa eswe, hanga ngukazuke atu anji. 20 Kuli A-Yunda, nalipwishile Ka-Yunda hanga nguzuke A-Yunda; kuli waze atwama kushi lia shimbi, nalisele kushi lia shimbi hanga nguzuke waze ali kushi lia shimbi, chipwe ngwe yami mwene chishi kushi lia shimbi. 21 Kuli waze keshi shimbi, nalipwishile ngwe chishi shimbi, kuchapwile ngwe chishi shimbi kuli Zambi, alioze nguli mushi lia shimbi ya Kristu hanga nguzuke waze keshi shimbi. 22 Kuli alelu, nalipwishile mulelu, hanga nguzuke alelu. Nalipwishile yuma yeswe kuli atu eswe, hanga ni yuma yeswe ngukalamwine amwe. 23 Alioze, nakulinga yuma yeswe mumu lia sango jipema, hanga ngukalianyinejo ni akwetu.
24 Kunwanyingikine ngwenu, ha yiheho ya kuzomboka, akwa-kuzomboka eswe kakuzomboka, alioze umuwika wika mwe wakutambula fweto nyi? Kashika, zombokenu hanga nukayizuke. 25 Waze* eswe akulinga yiheho ya kuzomboka, kakulihumikiza mu yuma yeswe. O kakuchilinga hanga atambule chipangula chize chakupola, alioze yetu, hanga tukatambule chipangula chize kuchishi kupola. 26 Kashika, nakuzomboka mumu ngunanyingika kuze ngunayi; nguli ngwe mukwa-kumbufula yoze keshi kumbufula mu tetela; 27 nakumbufula* mujimba wami ni kuutwala ku undungo, hanga muze hinambujola kuli akwetu, Zambi kanda akalituna* yami.