Ezekiele

18 hocho Yehova yangulweza nawa ngwenyi: 2 “Yika chinalumbunuka chishima chino nunate mu Izalele ngwo: ‘Yisemi kalia uva yapangaminya, alioze ana e eva kupangaminya mu kanwa’?

3 “‘Mwene Yehova kanambe ngwenyi: Ngunalishingi ni mwono wami’ ngwami, ‘kunuchi kata nawa chishima chino mu Izalele. 4 Alma jeswe ni jami, alma ya tata ni ya mwana, jeswe ni jami. Alma yize muyivulumuna, ye muyikafwa.

5 “‘Tunyongenu ngwetu, mutu mapwa mukwa-ululi, malinga yuma yalita ni ya ululi. 6 Iye keshi kulia yitapo yize akulambula kuli tuponya ku milundu. Keshi kutala tuponya a uzelwokeso a zuwo lia Izalele. Keshi kulinga upangala ni pwo lia mukwo chipwe kulimona ni pwo yoze uli ku chijila. 7 Keshi kumwesa lamba mutu niumwe, alioze kakuhilwisa yuma kuli yoze wamukongwesa. Keshi kwiya chuma cha mutu niumwe, alioze iye kakuhana kulia chenyi kuli waze keshi kulia ni kujika waze ali ni uvu. 8 Keshi kukongwesa* hanga atambule mbwezo, chipwe kuzuka mbongo mu jila yize kuyalitele. Kakulituna kulinga yuma ya uhenge, alioze kakupatula ni ululi mulonga, hakachi ka atu aali. 9 Iye kakwenda mu majila jami mashimbu eswe ni kwononokena yiyulo ni upatwilo wami hanga alinge yuma ni ushishiko. Mutu wacho kali mukwa-ululi, pundu lume, makanunga ni mwono,’ chocho anambe Mwene Yehova.

10 “‘Alioze tunyongenu ngwetu, lunga wacho kali ni mwana mwiji, mukwa-kushiha, hanji kakulinga yimwe ya ku yuma yino, 11 (chipwe ngwe tato te kanda achilinga yuma yacho.) Iye kakulia yitapo yize akuhana kuli tuponya ku milundu, kakulinga upangala ni pwo lia mukwo. 12 Kakumwesa lamba mukwa-kuhona ni chiswale, kakwiya, keshi kufunyisa yuma yize atambula kuli yoze akongwesa, meso jenyi kakutala tuponya a uzelwokeso, kakulinga yuma yipi. 13 Kakukongwesa ni kutambula mbwezo ni kuzuka mbongo mu jila yize kuyalitele. Mwana yono kechi kanunga ni mwono. Pundu lume, iye makafwa mumu lia yuma yipi yize akulinga. Manyinga jenyi makaholokela hali iye mwene.

14 “‘Sali likwo, tunyongenu hali umwe tata uli ni mwanenyi yoze wakumona shili yeswe yize tato akulinga. Alioze, mwana wacho, keshi kulinga yuma yacho. 15 Iye keshi kulia yitapo yize akulambula kuli tuponya ku milundu, keshi kutala tuponya a uzelwokeso a ku zuwo lia Izalele. Keshi kulinga upangala ni pwo lia mukwo. 16 Iye keshi kumwesa lamba mutu niumwe, keshi kutwama ni chuma chize amwaha kuli yoze akongwesa, keshi kwiya, kakuhana kulia chenyi kuli waze keshi nacho, kakujika waze ali ni uvu. 17 Keshi kumwesa lamba yiswale, keshi kukongwesa hanga atambule mbwezo chipwe kuzuka mbongo mu jila yize kuyalitele, kakwononokena yiyulo ni upatwilo wami, iye kakwenda mu majila jami. Mutu wacho, kechi kafwa mumu lia uhenge wa tato. Pundu lume, makanunga ni mwono. 18 Alioze, amu tato alionga, eya yuma ya ndumbwenyi ni kulinga yuma yipi mukachi ka atu jenyi, pundu lume, iye kumakafwa mumu lia uhenge wenyi.

19 “‘Alioze, yenu munukahula ngwenu: “Mumu liaka uhenge wa tato wakwachile hali mwana?” Mwana kalinga yuma ya ululi, yipema, kafunga shimbi jami ni kujononokena. Kashika, iye makanunga ni mwono. 20 Alma* yize muyivulumuna ye muyikafwa. Mwana kechi kambata mulonga wa tato, tata kechi kambata mulonga wa mwana. Ululi wa mukwa-ululi, makawalula hali iye mwene, upi wa yoze wakulinga yuma yipi, mukashata hali iye mwene.

21 “‘Haliapwila, nyi mutu yoze mupi mecha kulinga shili yeswe yize apwile ni kulinga, menda mu majila jami, malinga yuma ya ululi ni yuma yipema, pundu lume, iye makanunga ni mwono. Kechi kafwa. 22 Iye kechi kamona lamba mumu lia yuma yipi yize alingile. Iye makanunga ni mwono ha kulinga yuma ya ululi.’

23 “‘Shina nakuwahilila ni kufwa cha mutu mupi?’ Chocho anambe Mwene Yehova. ‘Chishi kuwahilila muze iye akwecha majila jenyi api hanga anunge ni mwono?’

24 “‘Chikwo nawa, nyi mukwa-ululi mecha kulinga yuma ya ululi, maputuka kulinga yuma yipi, malinga yuma yeswe yipi yize atu api akulinga, shina iye manunga ni mwono? Yitanga yenyi ya ululi kechi kayiwuluka. Mumu lia kuhona kushishika ni shili yenyi, iye kumakafwa.

25 “‘Alioze, munukamba ngwenu: “Jila ya Yehova hi ya ululi ko.” Lisesa, panjikenu, yenu akwa-zuwo lia Izalele! Shina jila yami hi ya ululi ko? Hi majila jenu ko waze hi ululi ko?

26 “‘Nyi mukwa-ululi mecha kulinga yuma ya ululi, malinga yuma yipi, mba mafwa, iye makafwa mumu lia uhenge wenyi.

27 “‘Nyi mutu mupi mecha kulinga yuma yipi, maputuka kulinga yuma ya ululi ni yipema, iye makalamwina mwono wenyi. 28 Nyi iye mamona upi weswe uze alinga mba mawecha, pundu lume, iye makanunga ni mwono. Kechi kafwa.

29 “‘Akwa-zuwo lia Izalele makamba ngwo: “Jila ya Yehova hi ya ululi ko.” Yenu akwa-zuwo lia Izalele, shina majila jami hi a ululi ko? Hi majila jenu ko waze hi a ululi ko?

30 “‘Kashika, Mwene Yehova kanambe ngwenyi: Yenu akwa-zuwo lia Izalele,’ mungukapatwila mutu ni mutu kulita ni majila jenyi. Echenu, ewa, echenu shili yenu yeswe hanga yichine kupwa liwe lia chitalingiso ni kununehena milonga. 31 Echenu shili yenu yeswe yize nwakulinga, pwenu ni mbunge yaha ni spiritu yaha. Yenu akwa-zuwo lia Izalele mumu liaka nunazange kufwa?’

32 “‘Yami chishi kuwahilila ni kufwa cha mutu niumwe,’ chocho anambe Mwene Yehova. ‘Kashika, likonyekenu, echenu shili yize nwapwile ni kulinga hanga nupwe ni mwolno.”’