Yilinga ya Apostolo
5 Alioze, umwe lunga avuluka ngwo, Ananiya ni mukwo-pwo Safira, yalanjisa umwe munda. 2 Chocho, iye yasweka chihanda chikwo cha mbongo, ni mukwo-pwo yachinyingika. Mba yanda chihanda chize chasalileho yachihana kuli apostolo. 3 Alioze, Petulu yamba kuli iye ngwenyi: “Ananiya, kuchi kevwe Satana anjila mu mbunge ye hanga wonge spiritu yisandu ya Zambi ni kusweka chihanda cha mbongo ja munda? 4 Ngwami shimbu te kanda uchiulanjisa, munda wapwile niwe nyi? Muze te hiwaulanjisa, ngwami mbongo japwile mu moko je nyi? Mba kuchi wanyonganga kulinga chuma chino? Kuwahanjikile mahuza kuli atu, alioze kuli Zambi.” 5 Ha kwivwa maliji wano, Ananiya yalimbuka, yafwa. Mba eswe waze evwile yuma yino yevwa woma unji. 6 Chocho, akweze yakatuka yamuvunga ha mahina yamutwala haze ni kumufunda.
7 Hakupalika cha maola atatu, mukwo-pwo yanjila chakuhona kunyingika yize yalingiwile. 8 Petulu yamuhula ngwenyi: “Ngwambulwile: Ndando yiyene ye nwalanjisanga munda nyi?” Iye yakumbulula ngwenyi: “Ewa, yiyene.” 9 Chocho Petulu yamba kuli iye ngwenyi: “Mumu liaka nwalitesanga kusa spiritu ya Yehova* mu cheseko? Atu waze ayanga ni kufunda mukwenu-lunga mu chikolo ali, ni yena kumakumbata.” 10 Hazehene mwe pwo yalimbukila ku molu ja Petulu, yafwa. Mba akweze yanjila yamuwana hafwa. Yamumbata yamutwala haze ni kumufunda sali lia mukwo-lunga. 11 Chocho, chikungulwila cheswe ni eswe waze evwile hakutwala ku chikuma chacho yevwa woma unji.
12 Chikwo nawa, apostolo yanunga ni kulinga yilayi yinji ni yikomokeso mukachi ka mbunga. O kapwile ni kulikungulwila mu Mbalanda ya Solomone. 13 Kwamba pundu, niumwe wa kuli atu akwo wahamukine hanga alichinge no wakuhi, alioze mbunga apwile ni kwachichimieka chinji. 14 Chikwo nawa, kwapwile atu anji, malunga ni mapwo waze afulielele muli Mwene ni kulichinga no. 15 Anehene mieji haze, mu majila ni kwapombesa ha mihela yikehe-yikehe ni ha yikanga, hanga muze Petulu te mapalika, chizulie chenyi chizulamine kama kuli umwe wa kuli ayo. 16 Kwapwile ni kwiza nawa mbunga anji waze te akukatuka ku mambonge alisulangana ni Yerusaleme, o apwile ni kuneha mieji ni waze apwile ni spiritu ya luchisa mba no aaukile.
17 Alioze, mwata wa asasendote a lutwe ni waze apwile hamwe nenyi, a mu chizavu cha A-Satuseu akatukile ni ukwa unji. 18 Chocho, yakwata* apostolo yaasa mu zuwo lia ususu. 19 Alioze ha ufuku, mungelo wa Yehova* yazulula mapito ja zuwo lia ususu, yaatwala haze yamba kuli ayo ngwenyi: 20 “Yeenu mu tembele nununge ni kwambulwila atu sango jeswe hakutwala ku mwono wa mutolo.” 21 Muze evwile maliji wano, yaanjila mu tembele ha chimenemene yaputuka kulongesa.
Alioze mwata wa asasendote a lutwe wahetele ni waze apwile hamwe nenyi, yatambika Akwa-Kuyula ni makulwana eswe ja A-Izalele alikungulule. Mba yatuma tupita ku zuwo lia ususu hanga anehe apostolo. 22 Alioze, muze tupita* ahetele ku zuwo lia ususu kaawanyineko, chocho yahiluka ni kwamba ngwo: 23 “Twawananga zuwo lia ususu liakuyika kanawa ni tulayi kanamana ku mapito a zuwo lia ususu, alioze muze twazululanga, kutwawanyinemo niumwe.” 24 Muze kapitau ka tembele ni asasendote a lutwe evwile maliji wano, yasakalala chinji ni kulihula yize te muyilingiwa kulutwe. 25 Hohene, yikuheta umwe mutu yalweza ngwenyi: “Malunga waze nwasanga mu zuwo lia ususu mu tembele ali, kanalongesa atu.” 26 Hohene, kapitau yaya hamwe ni tupita twenyi, yaaneha alioze kaalambile mumu evwile woma ngwo atu kumaasa mawe.
27 Muze te haaneha yaamanyisa kumeso ja Akwa-Kuyula. Mba mwata wa asasendote a lutwe yamba kuli ayo 28 ngwenyi: “Tunakanukanjisa ngwetu kanda nulongesa nawa mu jina lino. Alioze yenu hinwazalisa Yerusaleme ni malongeso jenu mumu nunazange kutukokela uhiso wa manyinga ja mutu yono.” 29 Petulu ni apostolo akwo yaakumbulula ngwo: “Twatamba kwononokena Zambi ngwe nguvulu wetu hi atu ko. 30 Zambi ya tulamba twetu kahindwishile Yesu mukachi ka afu, yoze yenu nwashihile ha kumuhachila ha mutondo. 31 Chikwo nawa, wamunangamishine ku chindume chenyi hanga akapwe Kasongo wa Ufulielo kanda Chilamwina, mukuhana kuli A-Izalele kulikonyeka ni ukonekeno wa shili yo. 32 Yetu tuli yela ja yuma yino, ni spiritu yisandu yize Zambi akuhana kuli waze akumwononokena ngwe nguvulu neyo yili chela.”
33 Muze o evwile yize apostolo ambile yevwa uli* unji, chocho yaazanga kwashiha. 34 Alioze, kwakatukile hakachi ka Akwa-Kuyula umwe Ka-Fwariseu avuluka ngwo, Ngamaliele, longeshi ya Shimbi mulemu kuli atu eswe, yeta hanga atuhwise apostolo haze ha shimbu likepe. 35 Iye yamba kuli akwo ngwenyi: “Malunga a Izalele, kanyamenu ha yize munulinga kuli atu wano. 36 Chakutalilaho, ha miaka yimwe kunyima, kwasolokele Teunda, yoze wambile ngwenyi, nguli munene, mba malunga amwe 400, alichingile hamwe nenyi. Alioze muze amushihile, eswe waze amukawile yamwangana ni che chizavu yichifwa. 37 Kulutwe lienyi, kwejile Yundase Ka-Ngalileya ha matangwa a kusonekesa atu, iye yakoka atu anji kunyima lienyi. Lunga yono nawa wafwile, mba waze eswe te akumukaula yamwangana. 38 Kashika, ngunambe kuli yenu ngwami: Ha yuma ngwe yino, kanda nupinjisa wano atu, echenu. Mumu nyi yuma yino yili ya atu kuyichi kanunga. 39 Alioze nyi kuli Zambi yinakatuka, kunuchi kuhasa kuyikwika. Mumu nyi ka muchipwa ngwe nunalimiki ni Zambi.” 40 O yatayiza chiyulo chenyi. Mba yatuma kusanyika apostolo, muze te haalamba, yaakanjisa kuhanjika mu jina lia Yesu. Chocho yaatusula.
41 O yakatuka kumeso ja Akwa-Kuyula ni uwahililo ha kwasaula mumu lia jina lia Yesu. 42 Mba matangwa eswe, o anungine ni kulongesa ni kwambujola sango jipema mu tembele ni ku zuwo ni zuwo, hakutwala kuli Kristu Yesu.