Asonekene Luka
10 Ha kupalika cha yino yuma, Mwene yatongola akwo 70 yaatuma aali aali, aliange kuya kulutwe lienyi ku mbonge jeswe ni ku yihela yeswe kuze neye te maya. 2 Iye yaalweza ngwenyi: “Kuli milimo yinji, alioze akwa-kuyilinga akehe. Kashika, etenu kuli Mwenya-milimo hanga atume akwa-milimo anji alinge milimo yenyi. 3 Yeenu! Ngunanutumu ngwe ana-mapanga hakachi ka tungunga. 4 Kanda numbata tuku ya mbongo, chipwe tuku ya kulia, chipwe sapato, chikwo nawa, kanda numeneka mutu niumwe mu jila. 5 Mu zuwo lieswalio mununjila, chitangu ambenu ngwenu: ‘Sambukila yipwe mu zuwo lino.’ 6 Nyi munuwanamo mukwa-kuzanga sambukila, sambukila yenu muyipwa hali iye, alioze nyi kunwamuwanyinemo, sambukila yenu muyifuna hali yenu. 7 Hachino, twamenu mu zuwo liacho, nulie, nunwe yuma yize manwaha, mumu mukwa-mulimo katela fweto yenyi. Kanda nututuluka ku zuwo ni zuwo.
8 “Chikwo nawa, mu mbonge yeswayo mununjila, nyi atu manutambula, lienu cheswacho manwaha, 9 ukenu mieji waze alimo ni kwalweza ngwenu: ‘Wanangana wa Zambi uli hakamwihi ni yenu.’ 10 Alioze, mu mbonge yeswayo mununjila, nyi atu kanutambwile, tuhukenu mu matapalo anene-anene nwambe ngwenu: 11 ‘Yetu mutukukumuna chipwe fufuta ya mu mbonge yenu yize yalalaminya ku yiliato yetu. Nihindu nyingikenu ngwenu, Wanangana wa Zambi uli hakamwihi.’ 12 Ngunanulweze ngwami, ha tangwa liacho, lamba lize makamwesa mbonge yacho mulikapwa linji chinji kuhiana lia Sondome.
13 “Lamba lienu A-Karazene! Lamba lienu A-Mbeteseta! Mumu yikomokeso yize yalingiwile muli yenu, nyi yinakalingiwa mu Teru ni Sendone, kachi atu jamo hanalikonyeka kulu ni yikeleyi ni uto. 14 Kashika, ha tangwa lia usopeso, lamba lize makanumwesa mulikapwa linji chinji, kuhiana lia Teru ni Sendone. 15 Ni yena, Kafwanaume, shina unanyongo ngwe makakuzundula ndo mwilu? Mukapalumuka ndo mu Fuka!
16 “Mweswawo manwivwa, kangwivwa nawa yami. Yoze malituna yenu, kalituna nawa yami. Chikwo nawa, yoze malituna yami, kalituna nawa Yoze wangutumine.”
17 E 70 yahiluka ni chiseke ni kwamba ngwo: “Mwene, chipwe lume andemoniu katwononokena muze twatongola jina lie.” 18 Yesu hakuchivwa, yamba kuli ayo ngwenyi: “Ngunamono Satana haholoka mwilu ngwe muhenyo. 19 Panjikenu! Hinanwaha ndundo ja kuliata tupela ni tuvwanda, ni ndundo ja kukumba tachi jeswe ja mukwa-kole, mba nichimwe chuma kuchichi kanulinga upi. 20 Nihindu, kanda nuwahilila mumu ngwo maspiritu kananuzeyela, alioze wahililenu mumu majina jenu hanaasoneka mu malilu.” 21 Ha shimbu lizeliene, Yesu yawahilila chinji mu spiritu yisandu, yamba ngwenyi: “Ngunakuhalisa ha mbunga, Tata, Mwenya-malilu ni hashi, mumu hiwaswekela yuma yino akwa-mana ni akwa-malinjekela, alioze wayisolwela ana-kemba. Chochene, Tata, mumu hiwalinga yuma kulita ni chize chinakupemena. 22 Tata hanangwehe yuma yeswe, niumwe unanyingika kanawa Mwana wakuhi, shina wika Tata, niumwe unanyingika kanawa Tata wakuhi, shina wika Mwana ni yoze Mwana anazange kumusolwela.”
23 Chocho, yateulukila kuli tumbaji twenyi, yaalweza kwa ukawo ngwenyi: “Kawaha meso waze anamono yuma yize yenu nunamono. 24 Mumu ngunanulweze pundu ngwami, aprofeta anji ni mianangana, kazangile kumona yuma yino yenu nunamono, alioze kayimwene, ni kwivwa yuma yino yenu nunevu, alioze kayivwile.”
25 Hohene, umwe mutu wanyingika kanawa Shimbi yakatuka hanga amweseke, yamuhula ngwenyi: “Longeshi, yika natamba kulinga mba nguzuke mwono wa mutolo?” 26 Yesu yamba kuli iye ngwenyi: “Yika anasoneka mu Shimbi? Yika wakutangamo?” 27 Iye yakumbulula ngwenyi: “‘Zanga Yehova* Zambi ye, ni mbunge ye yeswe ni mwono we weswe ni kunyonga che cheswe ni tachi je jeswe’ ni ‘kuzanga mwenyembo we ngwe chize wakulizanga yena mwene.’” 28 Yesu yamulweza ngwenyi: “Wakumbulula kanawa; nunga ni kulinga chizechene mba mukapwa ni mwono.”
29 Alioze, amu azangile kulisolola ngwo kali mukwa-ululi, yahula kuli Yesu ngwenyi: “Mwenyembo wami iya?” 30 Yesu yamukumbulula ngwenyi: “Umwe mutu te kanakatuka ku Yerusaleme kanapalumuka ku Yeriku, yaliwana ni eji, o yamutambula yuma yeswe, yamulamba, yaya, yamuhichika ni chonono. 31 Umwe sasendote te kanapalumuka mu jila yacho, alioze muze amumwene, yapalikila sali likwo. 32 Chizechene nawa, umwe Ka-Levi muze haheta ha chihela chacho, yamumona yapalikila sali likwo. 33 Alioze umwe Ka-Samaria yoze te unapalikila mu jila yacho yamuwana, muze hamumona, yamuvwila keke. 34 Chocho, yakundama kuli iye, yatehwina maji ni vinyu ha yilonda yenyi, yayikasa. Mba yamunyinyisa ha chimbulu chenyi yamutwala ku zuwo lia ngeji yamufunga. 35 Muze hikwacha, yanda ndenariu* jaali yajihana kuli mwenya-zuwo, yamba ngwenyi: ‘Mufunge kanawa, cheswacho muwezelaho hanga umukwase, mungukakufwetacho muze munguhiluka.’ 36 Kunyonga lie, kuli wano atatu, iya wasolwele ngwo kali mwenyembo wa lunga yoze walitakanyine ni eji?” 37 Iye yakumbulula ngwenyi: “Yoze wamusolwela keke.” Mba Yesu yamba kuli iye ngwenyi: “Ni yena yako ulinge chizechene.”
38 Muze ayo te anayi, iye yanjila mu chimwe chihunda, muzemwene, umwe pwo avuluka ngwo Marta yamuzumbula ku zuwo lienyi. 39 Pwo wacho, kapwile ni ndumbwenyi wa pwo te avuluka ngwo Maria, yoze watwamine ku molu ja Mwene ni kupanjika yize te anambe. 40 Alioze, Marta te kanalipikala ni milimo yinji yize te analingi. Chocho, yakundama kuli Yesu yamba ngwenyi: “Mwene, shina kuwamwene ngwo ndumbwami kangwechela milimo ukawami? Mulweze kama hanga eze angukwase.” 41 Alioze, Mwene yamukumbulula ngwenyi: “Marta, Marta, unalipikala ni kulihulumba ni yuma yinji. 42 Alioze, yuma yikehe ye tunafupiwa, hanji chimuwika. Kashika, Maria hasakula chihanda chipema chize kechi kamutambulacho.”