Mukanda Utangu wa A-Korindu

14 Nungenu ni kusolola zango, alioze nungenu ni kufupa yawana ya ku spiritu, chahiana ulemu chawana cha kuprofeteza. 2 Mumu yoze wakuhanjika limi lieka, keshi kulihanjika kuli atu, alioze kuli Zambi, mumu niumwe wa kumwivwa wakuhi, chipwe ngwe iye mahanjika yijimbikilo yisandu kupalikila mu spiritu. 3 Alioze yoze wakuprofeteza, kakukolesa, kakutakamisa ni kulembejeka atu ni maliji jenyi. 4 Yoze wakuhanjika limi lieka kakulikolesa iye mwene, alioze yoze wakuprofeteza kakukolesa chikungulwila. 5 Ngunazange yenu eswe nuhanjike mu malimi, alioze shinaho nuprofeteze. Kwamba pundu, yoze maprofeteza kahiana yoze mahanjika mu malimi, shina wika ndo mutu mwene alumbunune hanga chikungulwila cheswe chikakole. 6 Alioze mandumbu, nyi neza ni kunumeneka haliapwila mba munguhanjika mu malimi, kuyuka chika munukapwa nacho nyi chahanjikile kupalikila mu umwe usolwelo, ni chinyingi, ni umwe uprofeto hanji ni limwe longeso?

7 Chino che chakulingiwa muze tunembi ni ndembo hanji kalialia.* Nyi mutu kembishile kanawa yikwata yacho, mwaso uze iye memba kuuchi kulumbunuka. 8 Mumu nyi chitavwi kachimbile kanawa, iya malilulieka hanga aye mu jita? 9 Chizechene nawa, nyi kunwahanjikile ni limi maliji waze apwa ashi kwivwa, kuchi mutu mahasa kunyingika yize nunambe? Kwamba pundu, yize munuhanjika muyipwa ngwe nunayihanjika mu tetela. 10 Hashi mahasa kuhanjikaho malimi eka ni eka, alioze eswe kakwete ulumbunwiso. 11 Kashika, nyi chanyingikine ulumbunwiso wa yize anahanjika, yami mungupwa chilambala kuli yoze mahanjika, ni yoze mahanjika mapwa chilambala kuli yami. 12 Chizechene ni yenu nawa, se nwakufupa kupwa ni yawana ya ku spiritu, kashika fupenu chinji kupwa ni yawana yize muyikolesa chikungulwila.

13 Chocho, yoze mahanjika mu limi lieka alembe hanga ahase kulilumbununa. 14 Mumu nyi mungulemba mu limi lieka, hi yami ko ngunahanjika, alioze chawana chize anguhele spiritu yisandu. Kashika chanyingikine yize ngunahanjika. 15 Mba yika natamba kulinga? Ha kulemba, munguhanjika kupalikila mu chawana chize spiritu yisandu yanguhele, alioze mungulemba nawa hanga yize munguhanjika yilumbunuke. Ha kwimba uhaliso, munguhanjika kupalikila mu chawana chize spiritu yisandu yanguhele, alioze mungwimba nawa hanga yize munguhanjika yilumbunuke. 16 Chikwo nawa, nyi muhana umwe uhaliso ni chawana cha spiritu, kuchi mutu mweswawo yoze uli hakachi kenu mahasa kwamba ngwenyi “Amene” ha usakwililo we, nyi kanyingikine yize unambe? 17 Chamwenemwene wakusakwilila mu jila yipema, alioze kuwakolesele mukwenu. 18 Nakusakwilila kuli Zambi mumu nakuhanjika malimi anji kuhiana yenu eswe. 19 Alioze mu chimwe chikungulwila nakufupa kuhanjika maliji atano kulita ni yinyingi yami hanga ngulongese akwetu, kuhiana kuhanjika kumi lia tununu a maliji mu limi lieka.

20 Mandumbu, kanda nupwa twanuke mu kunyonga chenu. Pwenu twanuke hakutwala ku yuma yipi ni kupwa makulwana mu kunyonga chenu. 21 Chinasonewa mu Shimbi ngwo: “‘Mungukahanjika ni atu wano mu limi lia yilambala ni mivumbo ya atu eka, chipwe chocho o kechi kangupanjika,’ chocho anambe Yehova.”* 22 Kashika, malimi keshi chilayi kuli waze akufuliela, alioze kuli waze keshi kufuliela, mba uprofeto hi wa waze keshi kufuliela ko, alioze wa waze akufuliela. 23 Kashika, nyi chikungulwila cheswe muchilikungulula, mba eswe maputuka kuhanjika mu malimi, chocho mumunjila atu eka hanji waze keshi kufuliela, shina kechi kwamba ngwo, nunazaluka nyi? 24 Alioze nyi yenu eswe munuprofeteza, mba mukunjila umwe yoze keshi kufuliela hanji mutu mweswawo, iye makamukumika ni kumupatwila kuli eswe. 25 Yuma ya kuhengama ya mu mbunge yenyi muyisoloka, chocho mafulamana hashi ni kuwayila Zambi, mba mamba ngwenyi: “Pundu, Zambi kali hakachi kenu.”

26 Mba yika nwatamba kulinga, mandumbu? Muze munulikungulula, umwe kali ni samu, mukwo kali ni longeso, mukwo kali ni usolwelo, mukwo kakuhanjika limi lieka, mukwo kakulumbununa. Yuma yeswe yikalingiwe hanga nukolese chikungulwila. 27 Nyi ngwe mutu umwe mahanjika mu limi lieka, chino chikapwe hakachi ka atu aali hanji atatu, akahanjike mutu umuwika umuwika, mukwo malumbununa. 28 Alioze, nyi ngwe mukwa-kulumbununa wakuhi, mutu wacho akahole mu chikungulwila, ahanjike ni Zambi mu mbunge yenyi mwene. 29 Aprofeta aali hanji atatu ahanjike, akwo ase shindakenyo ha ulumbunwiso. 30 Alioze, nyi umwe matambula usolwelo shimbu machitwamako, yoze unahanjika akahole. 31 Mumu yenu eswe munuhasa kuprofeteza mutu umuwika umuwika, hanga eswe akalilongese ni kutakama. 32 Chikwo nawa, chawana cha ku spiritu cha aprofeta, katamba kuchiyula kuli aprofeta. 33 Mumu Zambi hi Zambi wa chizungo-zungo ko, alioze wa sambukila, chizechene ngwe mu yikungulwila yeswe ya asandu,

34 mapwo akahole mu yikungulwila, mumu kaatayijile kuhanjika. Alioze akazeye ngwe chize nawa Shimbi yinambe. 35 Nyi o mazanga kulilongesa chimwe chuma, akahule kuli malunga jo ku mazuwo, mumu chapwa sonyi pwo kuhanjika mu chikungulwila.

36 Shina liji lia Zambi liakatukile kuli yenu nyi? Shina kuli yenu wika liahetele?

37 Nyi umwe manyonga ngwenyi kali profeta hanji kali ni chimwe chawana cha ku spiritu, iye katamba kunyingika ngwenyi yuma yize ngunanusonekena yili shimbi ya Mwene. 38 Alioze nyi umwe malengulula yino yuma, neye makamulengulula.* 39 Kashika mandumbu jami, nungenu ni kulikolweza nuprofeteze, alioze kanda nukanjisa kuhanjika mu malimi. 40 Alioze yuma yeswe yikalingiwe mu jila yalita chakuhona chizungo-zungo.