Mukanda Utangu Kuli A-Tesalonika

2 Kwamba pundu mandumbu, nunanyingika ngwenu ungeji wetu kuwapwile wamokomoko. 2 Mumu ngwe chize nunanyingika, chipwe ngwe twamwene lamba linji ni kutuhungumiona mu Fwilipu, ni ukwaso wa Zambi twapwile ni hamu hanga tunwambulwile sango jipema ja Zambi chipwe ni kulimika* chinji. 3 Mumu utowezo uze twakuhana kuushi kukatuka ha tupalia, chipwe ha luchisa hanji ha mahuza, 4 alioze twakuhanjika kuli yenu ngwe waze Zambi hanatongola hanga ambujole sango jipema. Yetu kutushi kuhanjika hanga tuvwise atu kuwaha, alioze twakuhanjika tuvwise Zambi kuwaha, yoze wakuhengwola mbunge jetu.

5 Yenu nunanyingika ngwenu, kanda tunwonga kama ni maliji apema, chipwe kusoloka ngwe tuli atu apema hanga tuzuke yimwe; Zambi kananyingika kanawa chikuma chino! 6 Yetu kutwafupiwile uhenya wa atu, chipwe wa yenu, chipwe wa atu akwo ka, chipwe ngwe te mutuhasa kunwaha chiteli cha kutufunga mumu tuli apostolo ja Kristu. 7 Alioze yetu twapwile yimbovu mukachi kenu, ngwe chize mama akupapisa ni kufunga* kanawa ana jenyi. 8 Chocho, mumu lia zango lietu hali yenu, twawahililile chinji hi kunwambulwila wika ko sango jipema ja Zambi, alioze ni kuhana nawa mwono* wetu hali yenu mumu twanuzanga chinji.

9 Chamwenemwene mandumbu, nunewuluka kukilikita ni kuhondangana chetu. Twakalakalile ufuku ni mwalwa hanga tuchine kupwa yilemu kuli niumwe wa kuli yenu ha kunwambulwila sango jipema ja Zambi. 10 Yenu nuli yela ni Zambi neye, hakutwala ku chize twendele ni ushishiko, ni ululi, kutushi chitela kuli yenu akwa-kufuliela. 11 Nunanyingika kanawa ngwenu, yetu twatowezele, twatakamishine ni kuhana yiyulo kuli umwe ni umwe wa kuli yenu, ngwe chize tata akulinga kuli ana jenyi, 12 hanga nununge ni kwenda mu jila yalita ya Zambi, yoze wakunusanyika mu Wanangana wenyi ni uhenya.

13 Kashika ha chikuma chino, kutushi kulitwamina kusakwilila Zambi, mumu muze twanwambujolwele liji lia Zambi, nwalivwile ni kulitayiza, hi ngwe liji lia atu ko, alioze ngwe chize liapwa, lie liji lia Zambi, lienalio liakukwasa yenu akwa-kufuliela. 14 Mumu yenu mandumbu, nwapwile akwa-kwimbulula yikungulwila ya Zambi mu Yundeya, yize yinalinungu ni Kristu Yesu, mumu nwamwene lamba ku moko ja akwa-chifuchi chenu, lamba lizeliene no nawa anamono ku moko ja A-Yunda. 15 O kashihile Mwene Yesu, ni aprofeta, ni kutuhungumiona. Chikwo nawa, keshi kuvwisa Zambi kuwaha, alioze kakulimika ni atu eswe, 16 se kakweseka kutukwika kulongesa atu a ku mavungu hanga akalilamwine. Ha kulinga chino, kakununga ni kuwezela ha shili yo. Alioze haliapwila ufwatulo wa Zambi kuuneza hali ayo.

17 Mandumbu, yetu muze atuhandunwine ni yenu ha mashimbu akehe (ku mujimba, hi mu mbunge ko), twapwile ni usona unji wa kunumona meso ni meso,* chocho yitusa tachi jinji hanga tuchilinge. 18 Ha chikuma chino, twazangile kwiza ni kunumeneka, ewa, yami Paulu nesekele, hi kamuwika ko, alioze kaali keswe, chipwe chocho Satana wakwikile jila yetu. 19 Mba kutalatala chetu, uwahililo hanji chipangula cha kulisamba nacho, kumeso ja Mwene wetu Yesu ha kwiza chenyi chika? Hi yenu ko nyi? 20 Chamwenemwene yenu nuli uhenya wetu ni uwahililo.