Yilinga ya Apostolo
6 Ha matangwa waze, muze tumbaji okele kuhiana, A-Yunda waze te akuhanjika limi lia Ngregu, yaputuka kulinyenyeta hali A-Yunda waze apwile ni kuhanjika limi lia Hepreu. Mumu mapwo waze apwile tuliwa, te keshi kwaha kulia chize akwo apwile ni kutambula tangwa ha tangwa. 2 Kashika, e Kumi ni Aali yakungulula tumbaji eswe ni kwamba kuli ayo ngwo: “Kuchalitele* kusa liji lia Zambi ku tenga hanga tutetele atu kulia. 3 Haliapwila mandumbu, sakulenu mukachi kenu malunga shimbiali a lufuma mupema waze anazala too ni spiritu ni mana hanga tweehe mulimo uno. 4 Alioze yetu mutunyongonona mu kulemba ni kulongesa liji lia Zambi.” 5 Mbunga eswe yaawahilila ni maliji wano. Mba yatongola Eshetevau lunga wa too ni ufulielo ni spiritu yisandu, ni Fwilipe, ni Prokoru, ni Nikanore, ni Timau, ni Parmena, ni Nikolau wa ku Andiakia yoze watayijile longeso lia A-Yunda. 6 Yaatwala kuli apostolo, mba muze te halemba, yaasayika moko.
7 Chocho liji lia Zambi lianungine ni kufumana, tumbaji yoka kuhiana mu Yerusaleme ni asasendote anji afulielele.
8 Eshetevau yoze wapwile ni utayizo wa Zambi, yoze nawa wapwile ni ndundo ja Zambi, walingile yilayi yinji ni yikomokeso mukachi ka atu. 9 Kwejile amwe malunga a ku Sunangonga ya A-Libertino, ni amwe a kuli A-Serene, ni a kuli A-Alexandria, ni a kuli A-Selishia, ni a ku Azia hanga alimike ni Eshetevau. 10 Alioze mumu lia ukwaso wa spiritu yisandu ni mana waze iye apwile ni kuhanjika no, o kahashile kulimika nenyi. 11 Hohene ayo yalembejeka amwe malunga ku tenga hanga ambe ngwo: “Twamwivwa kanashililika Mose ni Zambi.” 12 Chocho yasupwila mbunga, ni makulwana, ni alongeshi a shimbi, mba yakwata Eshetevau yamutwala kuli Akwa-Kuyula. 13 Yaneha nawa yela a mahuza waze ambile ngwo: “Lunga yono keshi kulitwamina kushililika chihela chino chisandu ni Shimbi. 14 Chakutalilaho, twamuvwile mamba ngwenyi, Yesu Ka-Nazare makauzula tembele yino ni kwalumuna shimbi jize Mose ahanyine.”
15 Mba muze eswe waze apwile mukachi ka Akwa-Kuyula ahulikilile meso jo hali iye, amwene chifwa chenyi chapwile ngwe chifwa cha umwe mungelo.