Yilinga ya Apostolo
14 Mu Ikoniu, Paulu ni Mbarnabe anjilile hamuwika mu sunangonga ya A-Yunda. Mumu lia kulongesa cho, chizavu chinene cha A-Yunda ni A-Ngresia afulielele. 2 Alioze, A-Yunda waze kafulielele yavundula akwa-mavungu ni kwalumbula hakutwala kuli mandumbu. 3 Kashika Paulu ni Mbarnabe atwamineko mashimbu anji ni kwambujola ni hamu mu jina lia Yehova.* Iye* wahanyine uchela hakutwala ku sango ja chawana chenyi cha keke, ha kwaha ndundo hanga alinge yilayi ni yikomokeso. 4 Alioze atu a mu mbonge alihandunwine; amwe apwile hamwe ni A-Yunda, akwo apwile sali lia apostolo. 5 Chocho atu akwa-mavungu hamwe ni A-Yunda ni akwa-kwayula, yatesa kuhungumiona ni kwasa mawe Paulu ni Mbarnabe. 6 Alioze, muze apostolo achivwile, yachinyina ku Lisetra ni Ndervwe, mambonge a mu chifuchi cha Laikoneya ni ku yifuchi yakusulangana. 7 Koko, anungine ni kwambujola sango jipema.
8 Ku Lisetra kwapwile umwe lunga chilema chize ku kusemuka chenyi; te kanda enda kama nilimwe tangwa. Iye te kanatwama, 9 ni kupanjika Paulu. Mba muze Paulu ahulikilile meso jenyi hali iye ni kumona ngwo kali ni ufulielo hanga ahinduke, 10 yamba ni liji linene ngwenyi: “Katuka umane.” Chocho, lunga yanyangumuka ni kuputuka kwenda. 11 Alioze muze mbunga amwene yuma yize Paulu alingile, akololokele mu limi lia Laikoneya ngwo: “Tuzambi hahulumuka kuli yetu mu chifwa cha atu!” 12 Kashika o yaluka Mbarnabe ngwo Zeuse* ni Paulu ngwo Herme,* mumu iye mwe wahanjikile chinji kuhiana mukwo. 13 Chocho sasendote wa Zeuse yoze wapwile ni tembele yenyi ku unjililo ya mbonge yaneha ngombe ni yitemo ku yikolo, mumu kazangile kuhana yitapo hamwe ni mbunga hanga awayile Paulu ni Mbarnabe.
14 Muze apostolo Mbarnabe ni Paulu achivwile, yasuwa mazalo jo yazomboka yaya mukachi ka mbunga ni kukololoka ngwo: 15 “Yenu malunga, mumu liaka nunalingi yuma yino? Ni yetu tuli atu waze akwete ulelu ngwe yenu. Tunanwambulwila sango jipema ngwetu, mbilenu yuma yino yamokomoko nutewulukile kuli Zambi ya mwono yoze watangile lilu ni hashi ni kalunga-lwiji ni yeswe yize yatwamamo. 16 Ku yisemuko ya kunyima, iye kechele hanga mavungu eswe ende mu majila jo-ene. 17 Chipwe chocho, walisolwele kuli ayo ha kulinga yuma yipema, wanuvwilile keke ha kunwaha vula wa mwilu, tungonde a mbuto ni kunwaha kulia chinji hanga mbunge jenu jiwahilile.” 18 Chipwe ngwe kahanjikile yuma yino, nihindu o kahashile kukinda mbunga kwaha yitapo.
19 Alioze, yikwiza A-Yunda a ku Andiakia ni a mu Ikoniu waze alumbwile mbunga. Chocho, yasa mawe Paulu ni kumumbulumuna haze lia mbonge mumu anyongene ngwo hafwa. 20 Mba muze tumbaji te hamukungulukila, Paulu yakatuka yanjila mu mbonge. Mukwachako, yakatuka yaya ni Mbarnabe ku Ndervwe. 21 Muze te hambujola sango jipema mu mbonge yacho ni kupwisa atu anji tumbaji, o yahiluka ku Lisetra, Ikoniu ni Andiakia. 22 Koko, o yatakamisa tumbaji,* yaakolweza amane nguu mu ufulielo ni kwamba ngwo: “Chatutamba kupalika mu lamba linji mba tukanjile mu Wanangana wa Zambi.” 23 Chikwo nawa, yaatongwela makulwana mu yikungulwila yeswe, yalemba ni kulitwamina kulia. Mba Paulu ni Mbarnabe yakunjika makulwana jacho kuli Yehova* yoze o atayijile.
24 Kulutwe, yapalika ndusu mu Piseteya, yanjila mu Pamafwilia. 25 Mba muze te hambujola lie liji ku Peleje, yapalumuka ku Atalia. 26 Muze te hakatuka ko, o yanjila mu ulungu yazauka aye ku mbonge ya Andiakia, kuze mandumbu alembele kuli Zambi hanga asolole chawana cha keke kuli Paulu ni Mbarnabe mumu lia milimo yize te o hamanununa.
27 Muze ahetele, yakungulula akwa-chikungulwila eswe yaalumbunwina yuma yeswe yize Zambi alingile kupalikila muli ayo ni chize azulwilile jila* akwa-mavungu hanga afuliele. 28 Chocho, yatwamako shimbu linene hamwe ni tumbaji.