Ezera
4 Muze akwa-kole ja A-Yunda ni ja A-Mbenjamine anyingikine ngwo, waze akatukile ku undungo te kanatunga tembele ya Yehova, Zambi ya Izalele, 2 hazehene ayo yaya kuli Zorobabele ni kuli akwa-lutwe a minyachi ya atato ni kwamba ngwo: “Tutayizenu tutunge hamuwika ni yenu, mumu chizechene ngwe yenu, ni yetu twakuwayila* Zambi yenu, twakulambula yitapo kuli iye chize ha matangwa ja Ezare-Hadone Mwanangana wa Suria, yoze watunehene kuno.” 3 Alioze, Zorobabele, Yeshua ni akwa-lutwe akwo a minyachi ya atato ya A-Izalele, yaalweza ngwo: “Kunuchi kutunga ni yetu zuwo lia Zambi yetu, mumu yetu ene e mututunga zuwo lia Yehova, Zambi ya Izalele, ngwe chizechene atutumine kuli Siru, Mwanangana wa Persia.”
4 Chipwe chocho, atu a mu yifuchi ya hakamwihi te kakuhongesa A-Yunda mashimbu eswe ni kwevwisa woma hanga eche mulimo wa kutunga. 5 Yafweta mbongo kuli akwa-mana hanga apinjise A-Yunda ha matangwa eswe a Siru, Mwanangana wa Persia ndo ha kuyula cha Dariu, Mwanangana wa Persia. 6 Ku uputukilo wa kuyula cha Mwanangana Ahashueru, akwa-kole yaasoneka sango ja mahuza hanga asume mulonga atu a mu Yunda ni a mu Yerusaleme. 7 Ha matangwa ja Artasherke Mwanangana wa mu Persia, Bishalame, Miteredate, Tabiele ni atu akwo waze te akukalakala no yasonekena mwanangana Artasherke mukanda. Ayo yalumbununa mukanda wacho mu limi lia Arame ni kuusoneka ni sona ja Arame.*
8 *Rehume kapitau wa lutwe wa nguvulu ni Shimishaia mukwa-kusoneka, yasonekena mwanangana wa Persia mukanda wa kulimika ni Yerusaleme, ha mukanda wacho hapwile ha kusoneka ngwo: 9 (Mukanda wapwile wa Rehume, kapitau wa lutwe wa nguvulu, Shimishaia mukwa-kusoneka, ni atu akwo waze te akukalakala no, e ngaji, mihato ja nguvulu, akwa-kusoneka, atu a mu Ereke, A-Babilonia, ni atu a mu Shushane hanji ngwetu, atu a mu Elame, 10 ni mavungu akwo waze Asenapare mulemu wahiana atwalile mu undungo ni kwasa mu mambonge ja Samaria ni ku yihela yikwo ya hakamwihi ku chitokelo cha Lwiji Ufrateze. 11 Wano e maliji a mukanda uze atumine.)
“Kuli Mwanangana Artasherke, kukatuka kuli tuvumbi je, malunga a ku yihela ya ku chitokelo cha Lwiji Ufrateze: 12 Tunazange kunyingikisa mwanangana ngwetu, A-Yunda waze akatukile kuli yenu ni kwiza mu njiza yetu, haheta mu Yerusaleme. Ayo kanatungulula mbonge yipi ya uhulia, kanahwisa yipanga ni kukolesa fundamentu. 13 Mwanangana nyingikenu ngwenu, nyi mbonge yino mayitungulula ni yipanga yamo mayihwisa, ayo kechi kafweta nawa lijimu chipwe kuhana milambu ni mbongo. Chino muchihwisa upite mu mushete wa wanangana. 14 Amu fweto yetu yakukatuka ku zuwo lia wanangana, yitumona ngwetu, kuchalitele kuhola ha kumona chize ayo anapihisa mulimo wa mwanangana,* kashika twatuma lusango yono kuli mwanangana, 15 hanga nuhengwole mu mukanda wa sango ja tulamba twenu. Ha mukanda wacho munumonaho ngwenu, mbonge yino yili mbonge ya uhulia yize yakupinjisa mianangana. Chikwo nawa, chize ku mashimbu akunyima mukwete waze akusupwila akwo hanga anehe mbwanja, kashika mbonge yino ayinongesene. 16 Tunazange kulweza mwanangana ngwetu, nyi mbonge yino mayitungulula, chikwo nawa yipanga yamo mayihwisa, yenu mwanangana kunuchi kuhasa kuyula sali lino lia chitokelo lia Lwiji Ufrateze.”
17 Mwanangana yatuma lusango yono hanga akumbulule Rehume kapitau wa lutwe wa nguvulu, Shimishaia mukwa-kusoneka ni atu akwo waze apwile mu Samaria ni ku yihela yikwo ya ku chitokelo cha Lwiji Ufrateze, ngwenyi:
“Mwoyo wenu! 18 Mukanda uze nwangutuminanga kautanganga* kanawa kumeso jami. 19 Chocho yingutuma hanga ahengwole chikuma chacho, mba yanyingika ngwo, mbonge yino chize ku mashimbu akunyima yakulimika ni mianangana, chikwo nawa, mwakupwa mbwanja ni vunda yinji. 20 Mu Yerusaleme mwapwile mianangana a ndundo waze apwile ni kuyula chifuchi cheswe cha ku chitokelo cha Lwiji Ufrateze, te kakwafweta milambu, lijimu ni mbongo. 21 Kashika, hanenu shimbi hanga malunga jacho alitwamine kutungulula mbonge yacho ndo muze munguhana shimbi yeka. 22 Kanda nulengulula yize ngunanulweze hakutwala ku chikuma chino, hanga mbongo mu mushete wa wanangana jihone kuhwa.”
23 Muze atangile mukanda wa Mwanangana Artasherke kumeso ja Rehume ni Shimishaia mukwa-kusoneka ni akwa-milimo ni akwo, ayo yaya fuji-fuji kuli A-Yunda ku Yerusaleme, yaakwika kulinga mulimo. 24 Chocho mulimo wa zuwo lia Zambi ku Yerusaleme yiumana, yiumana ndo ha mwaka wamuchiali wa kuyula cha Dariu, Mwanangana wa Persia.