Uputukilo

46 Chocho, Izalele yaya ni yikumba yenyi yeswe. Muze ahetele ku Mbia-shipa yahana chitapo kuli Zambi ya tato Izake. 2 Ha ufuku, Zambi yahanjika ni Izalele kupalikila mu usolwelo ngwenyi: “Yakomba, Yakomba!” Iye yakumbulula ngwenyi: “Yami uno!” 3 Zambi yamba ngwenyi: “Yami Zambi wamwenemwene, Zambi ya tatenu. Kanda wivwa woma wa kuya ku Engitu, mumu kwenakuze mungukakupwisa vungu linene. 4 Yami mwene munguya ni yena mu Engitu mungukakuhilwisa nawa kuno, mba muze mukafwa, Yosefwe mwe makakufuka meso.”

5 Mba Yakomba yakatuka ku Mbia-shipa, ana jenyi yanyinyisa tato Yakomba, ana jo ni mapwo jo mu matemba waze Falau atumine. 6 Yaya ni yimuna ni yikumba yize azukile mu chifuchi cha Kanana. Chocho, Yakomba yaheta mu Engitu ni munyachi wenyi weswe. 7 Iye yaya mu Engitu ni ana jenyi a malunga, ajikulu jenyi a malunga, ana jenyi a mapwo, ajikulu jenyi a mapwo ni munyachi wenyi weswe.

8 Wano e majina ja ana ja Izalele, che kwamba ana ja Yakomba waze ayile mu Engitu: Mwana mutangu* wa Yakomba kapwile Rupene.

9 Ana ja Rupene kapwile Hanoke, Palu, Hezerone ni Kame.

10 Ana ja Simeone kapwile Yemule, Yamine, Ohate, Yakine, Zohare ni Shalo, yoze wapwile mwana wa umwe pwo wa ku Kanana.

11 Ana ja Levi kapwile Ngeshone, Kohate ni Merari.

12 Ana ja Yunda kapwile Ere, Onane, Shela, Pereze ni Zera. Alioze Ere ni Onane kafwilile mu chifuchi cha Kanana.

Ana ja Pereze kapwile Hezerone ni Hamuli.

13 Ana ja Yisaka kapwile Tola, Puvwa, Yombi ni Shimerone.

14 Ana ja Zapulone kapwile Serote, Elone ni Yalile.

15 Wano e ana ja Liya waze asemenene Yakomba ku Panda-narame, ni mwanenyi wa pwo Ndina. Ana eswe a Yakomba a malunga ni a mapwo kapwile 33.

16 Ana ja Ngate kapwile Zefwone, Hangi, Shuni, Izopone, Ire, Erote ni Arele.

17 Ana ja Ashe kapwile Ima, Ishevwa, Ishevwi ni Mberia, ndumbwo wa pwo kapwile Sera.

Ana ja Mberia kapwile Hepere ni Malikiele.

18 Wano e apwile ana ja Zelupa ngamba yoze Lapane ahanyine kuli mwanenyi Liya. Iye yasemena Yakomba ana 16.

19 Ana ja Rakele pwo lia Yakomba kapwile Yosefwe ni Mbenjamine.

20 Mu chifuchi cha Engitu, Yosefwe yasema Manase ni Eframe, ana waze amusemenene kuli Asena mwana wa pwo wa Potifera, sasendote wa One.

21 Ana ja Mbenjamine kapwile Mbela, Mbechi, Asembele, Ngera, Naamane, Ehi, Roshe, Mupine, Hupimi ni Arande.

22 Wano e ana waze Rakele asemenene Yakomba, eswe kapwile 14.

23 Mwana wa Ndane kapwile Hushime.

24 Ana ja Napatali kapwile Yozele, Nguni, Yeze ni Shilemi.

25 Wano e ana ja Mbila, ngamba yoze Lapane ahanyine kuli mwanenyi Rakele. Iye yasemena Yakomba ana 7.

26 Ana eswe waze Yakomba ayile no ku Engitu kapwile 66, kuchizako mapwo ja ana jenyi. 27 Ana ja Yosefwe waze asemukine mu Engitu kapwile aali. Atu eswe a mu zuwo lia Yakomba waze ayile ku Engitu kapwile 70.

28 Yakomba yatuma Yunda kulutwe lienyi hanga alweze Yosefwe ngwenyi, tata himaheta ku Ngoshone. Muze ahetele mu chifuchi cha Ngoshone, 29 Yosefwe yatuma kululieka temba lienyi, mba yaya ni kulitakana ni tato Izalele ku Ngoshone. Muze amumwene, yamukangayika chocho yaputuka kulila chinji. 30 Mba Izalele yamba kuli Yosefwe ngwenyi: “Haliapwila munguhasa kufwa kwami. Mumu hinakumona, hinanyingika ngwami uchili ni mwono.”

31 Chocho, Yosefwe yamba kuli mandumbu jenyi ni kuli akwa-zuwo lia tato ngwenyi: “Ngunahiluka hanga ngulweze Falau ngwami: ‘Mandumbu jami ni akwa-zuwo lia tata waze te ali mu chifuchi cha Kanana haheta. 32 Ayo kali tufunga, kakupita yimuna. Keza ni ngombe jo, mapanga jo ni yuma yo yeswe.’ 33 Muze Falau manusanyika ni kunuhula ngwenyi: ‘Mulimo uka nwakulinga?’ 34 Nwambe ngwenu: ‘Yetu tuvumbi twenu twakupita yimuna chize ku wanuke wetu ndo haliapwila, ngwe chize apwile ni kulinga tulamba twetu,’ hanga nutwame mu chifuchi cha Ngoshone, mumu a Engitu keshi kuzanga tufunga waze akupita mapanga.”