Asonekene Marku
1 Uputukilo wa sango jipema* hakutwala kuli Yesu Kristu, Mwana wa Zambi. 2 Ngwe chize asonekene profeta Izaia ngwenyi: “(Tala! Mungutuma kanganda kami kulutwe lie,* iye mwe makakululiekela jila.) 3 Liji lia umwe mutu linakololoka mu puya* ngwo: ‘Luliekenu jila ya Yehova!* Lulamisenu matapalo jenyi.’” 4 Yoano Chipapachisa, wapwile mu puya ni kwambulwila atu hakutwala ku upapachiso ngwe chilayi cha kulikonyeka mba Zambi akonekene shili yo. 5 Atu eswe a mu chifuchi cha Yundeya ni a mu Yerusaleme, ejile kuli iye ni kumulweza shili yo yeswe, chocho iye wapapachishile* mu Lwiji Yordau. 6 Yoano kapwile ni kuzala mazalo a wona wa kamelu ni muya wa lambu mu zalilo, chikwo nawa, kapwile ni kulia mapasu ni uchi wa mu musenge. 7 Iye wambujolwele ngwenyi: “Kunyima lia yami mukwiza umwe mutu yoze wanguhiana. Chikwo nawa, ami chishi ni ulite wa kuhetama ni kukasulula muya wa sapato jenyi. 8 Yami nanupapachisa ni meya, alioze iye makanupapachisa ni spiritu yisandu.”
9 Ha matangwa waze, Yesu yakatuka mu limbo lia Nazare, mu chifuchi cha Ngalileya, yaya kuli Yoano yamupapachisa mu Lwiji Yordau. 10 Hazehene, ha kututuka mu meya, yamona malilu kanazuluka ni spiritu yahulumukine hali iye ngwe liembe. 11 Chocho, liji yilituhuka mu malilu ngwo: “Yena uli Mwanami, yoze nazanga chinji; muli yena ngunawahilila.”
12 Hazehene, spiritu yisandu yiyimushinjila aye mu puya. 13 Hachino, yatwama mu puya matangwa 40, chocho Satana yamweseka. Iye watwamine hamwe ni tushitu a mu yambu, mba angelo yamulingila.
14 Kulutwe, muze Yoano amusele mu zuwo lia ususu, Yesu yanjila mu Ngalileya, yambujola sango jipema ja Zambi 15 ni kwamba ngwenyi: “Mwaka unamanunuka, kashika Wanangana wa Zambi unakundama. Likonyekenu ni kufuliela ha sango jipema.”
16 Muze te anende ku sesa lia Kalunga-lwiji wa Ngalileya, iye yamona Semone ni mwana-kwo Andeleu, kanate wanda mu kalunga-lwiji, mumu ayo te akwa-kuta yishi. 17 Hachino, Yesu yamba kuli ayo ngwenyi: “Ngukaulenu, mungukanupwisa akwa-kwoza atu.” 18 Hazehene, yahichika manda jo yamukaula. 19 Muze Yesu hasenya kulutwe, yamona Tiangu ni mwana-kwo Yoano, ana ja Zebedeu, te mu wato ali kanalulieka manda jo. 20 Hohene, yaasanyika. O yaahichika tato Zebedeu mu wato ni ngamba jenyi, chocho yamukaula. 21 Yaya ku limbo lia Kafwanaume.
Mba muze tangwa lia Sambata liahetele, Yesu yanjila mu sunangonga yaputuka kulongesa. 22 Atu alishimwokene ha chize iye apwile ni kulongesa, mumu iye te kakulongesa ngwe yoze uli ni chiyulo, hi ngwe alongeshi a shimbi ko. 23 Ha shimbu liacho, mu sunangonga mwapwile umwe lunga yoze wapwile ni spiritu ya luchisa, iye yakololoka ngwenyi: 24 “Yika twakulinga* mba utupinjise, Yesu Ka-Nazare? Shina weza ni kutunongesa nyi? Yami ngunakunyingika kanawa: Uli mwe Musandu wa Zambi!” 25 Alioze, Yesu yamukanjisa ngwenyi: “Hola, tuhuka muli iye!” 26 Spiritu ya luchisa, yiyitunyisa mwe lunga ni kukololoka ni liji linene, chocho yiyituhuka muli iye. 27 Atu eswe akomokene, mba yaputuka kulihula umwe ni mukwo ngwo: “Ayi yene yika? Lino lili longeso liaha! Mumu chiyulo akwete, chipwe maspiritu a luchisa kakumwononokena.” 28 Hachino, lufuma wenyi yalimwanga ni kawashi mu chifuchi cheswe cha Ngalileya.
29 Mba ayo yatuhuka mu sunangonga, yaya ku zuwo lia Semone ni Andeleu hamwe ni Tiangu ni Yoano. 30 Naye-weno ya Semone kapwile ha muhela mumu te kachiki anayiji, chocho yalweza Yesu hakutwala kuli iye. 31 Yesu yakundama kuli iye, yamukwata ku kwoko, yamukatwisa. Chocho kachiki yamuhwa, mba yaputuka kwaluliekela kulia.
32 Ha chingoloshi, ha kunjila cha tangwa, atu yamunehena mieji eswe ni waze apwile ni spiritu ya luchisa. 33 Atu eswe a mu limbo, yakungulukila ku chikolo cha zuwo kuze Yesu apwile. 34 Chocho, Yesu yauka atu anji waze apwile ni misongo yeka ni yeka, ni kutuhwisa maspiritu* a luchisa. Alioze, kakechele hanga maspiritu jacho ahanjike mumu ayo te kananyingika ngwo, iye kali Kristu.
35 Ha chimenemene, muze te kuchili milima, Yesu yakatuka, yaya kwaukawenyi yaputuka kulemba. 36 Alioze, Semone ni waze apwile hamwe nenyi yaya ni kumufupa. 37 Muze amuwanyine, yamulweza ngwo: “Atu eswe kanakufupu.” 38 Alioze, iye yakumbulula ngwenyi: “Tuyenu ku chihela chikwo, ku membo akwo hanga ngukambulwileko, mumu ha chikuma chino, nejile hano hashi.” 39 Chocho, iye yenda mu chifuchi cheswe cha Ngalileya, yambujola mu masunangonga jo ni kutuhwisa maspiritu a luchisa.
40 Yikwiza nawa kuli iye umwe mukwa-mbumba, yaliumba ni kumulweza ngwenyi: “Nyi muzanga, nguuke* kama.” 41 Ha kumumona, Yesu yamuvwila keke, yolola kwoko lienyi, yamukwata ni kumulweza ngwenyi: “Ngunazange! Hinduka ku musongo we.” 42 Hazehene, mbumba yiyimuhwa ni kuhinduka ku musongo wenyi. 43 Chocho, Yesu yamwamba hanga aye ni kumutoweza ngwenyi: 44 “Tala, kanda ulweza chikuma chino kuli mutu niumwe. Alioze, yako ulisolole kuli sasendote ni kuhana mulambu uze Mose ambile mumu ha kuhinduka che, hanga ukapwe uchela kuli ayo.” 45 Muze hakatuka, lunga wacho yaputuka kulweza atu akwo hakutwala ku yize yalingiwile. Mumu lia chino, Yesu kahashile nawa kusoloka kumeso ja atu mu membo, alioze wapwile kwaukawenyi. Atu a ku yihela yeka ni yeka apwile ni kwiza kuli iye.