Asonekene Mateu
10 Yesu yasanyika tumbaji twenyi 12, yaaha chiyulo helu lia maspiritu a luchisa, hanga akaatuhwise ni kuuka misongo yeswe ni weji weswe.
2 E majina ja apostolo 12 wano: Mutangu Semone, yoze avuluka nawa ngwo Petulu, ni mwana-kwo Andeleu; Tiangu ni mwana-kwo Yoano ana ja Zebedeu; 3 Fwilipe, ni Mbatolomeu; Tomase, ni Mateu mukwa-kufwetesa lijimu; Tiangu mwana wa Alefweu; ni Tateu; 4 Semone Ka-Kanana,* ni Yundase Ka-Keriote, yoze kulutwe wakunjikile Yesu.
5 Yesu yatuma wano 12, yaaha shimbi ngwenyi: “Kanda nuya mu jila ya akwa-mavungu, chipwe kunjila mu mambonge ja A-Samaria; 6 alioze yeenu wika ni kufupa mapanga a ku zuwo lia Izalele waze hanatoko. 7 Muze munuya, ambujolenu ngwenu: ‘Wanangana wa mu malilu unakundama.’ 8 Ukenu waze ayiza, hindwisenu afu, pemesenu akwa-mbumba, tuhwisenu andemoniu. Yuma yino Zambi kanwahayo yawana, ni yenu yihanenu yawana. 9 Kanda numbata oru, chipwe prata, chipwe mbongo mu miya yenu, 10 chipwe tuku ya kulia mu wenyi wenu, chipwe mahina aali, chipwe sapato, chipwe mukombo,* mumu mukwa-milimo kanatela kulia chenyi.
11 “Mbonge yeswayo mununjila hanji chihunda, fupenumo yoze unatela, ni kutwamamo ndo muze munutuhuka. 12 Muze mununjila mu zuwo, menekenu enya-zuwo. 13 Nyi enya-zuwo matela, sambukila yenu yize hali ayo; nyi katelele, sambukila yenu yihiluke kuli yenu. 14 Ku zuwo lieswalio hanji mbonge kuze kanutambwile, hanji kupanjika maliji jenu, ha kutuhuka mu zuwo liacho hanji mu mbonge yacho, kukumunenu fufuta ku molu jenu. 15 Pundu ngunambe kuli yenu ngwami: Ha tangwa lia upatwilo, lamba linji mulikapwa mu mbonge yize, kuhiana lia Sondome ni Ngomora.
16 “Ngunanutumu ngwe mapanga mukachi ka mikuza. Kashika, kanyamenu ngwe tupela, alioze pwenu akwa-kusamba ngwe membe. 17 Kanyamenu ni atu, mumu makanukunjika ku yota ya usopelo, ni kunulamba ni shikote* mu masunangonga jo. 18 Makanutwala kumeso ja manguvulu ni mianangana mumu lia yami, hanga nukambujole kuli ayo ni kuli akwa-mavungu hakutwala kuli yami. 19 Alioze, muze manukunjika, kanda nulipikala ha yize munwamba ni chize munuyamba: mumu yize munwamba makanwahayo ha ola yizeyene; 20 mumu hi yenu wika ko nunahanjika, alioze spiritu ya Tatenu ye yinahanjika kupalikila muli yenu. 21 Chikwo nawa, ndumbu makakunjika ndumbwenyi ku kufwa, chisemi makunjika mwanenyi wa lunga, ana makakatukila yisemi jo ni kwashihisa. 22 Ni yenu makanuvwila kole kuli atu eswe mumu lia jina liami, alioze, yoze manyongonona ndo kusongo, makamulamwina. 23 Muze manuhungumiona mu mbonge yimwe, chinyinenu mu mbonge yikwo, pundu ngunanulweze ngwami, kunuchi kahwisa kwendangana mu mambonge eswe a mu Izalele, shimbu mwe Mwana-mutu kanda achiheta.
24 “Longi keshi kuhiana longeshi wenyi, chipwe ndungo keshi kuhiana mwata wenyi. 25 Longi mahasa kupwa ngwe longeshi wenyi, ni ndungo mahasa kupwa ngwe mwata wenyi. Nyi mwenya-zuwo hanamuvuluka ngwo, Mbelezepu, mba yika mutwamba hali akwa-zuwo lienyi? 26 Kashika kanda nwevwila woma: Mumu yuma yeswe yize yili ya kufuka kumakayifukula, nawa kukushi chuma nichimwe cha kuhengeka chize kechi kachinyingika. 27 Yize ngunanulweze mu milima, yambululenu ha mwalwa; yize ngunanulwezela mwishi, yambujolenu ha mafulumba ja mazuwo. 28 Kanda nuvwila woma waze akushiha mujimba, alioze, kechi kuhasa kushiha mwono; kashika, vwilenu woma yoze mahasa kunongesa mwono ni mujimba mu Ngehena. 29 Shina keshi kulanjisa tujila* aali akehe-akehe ha kalumbongo kamuwika ka ndando yikehe?* Chipwe chocho, niumwe wa kuli ayo mahasa kuholoka hashi chakuhona Tatenu wa mu malilu kuchinyingika. 30 Alioze chipwe je kambu ja ku mitwe yenu hanajalula jeswe. 31 Kashika kanda nwivwa woma; yenu nuli ni ulemu unji kuhiana tujila anji akehe-akehe.
32 “Kashika mweswawo mangutayiza kumeso ja atu, ni yami mungukamutayiza kumeso ja Tata yoze uli mu malilu. 33 Alioze mweswawo malikala yami kumeso ja atu, ni yami mungukalikalaye kumeso ja Tata yoze uli mu malilu. 34 Kanda nunyonga ngwenu, neza ni kuneha sambukila hano hashi; chejile ni kuneha sambukila, alioze njangu.* 35 Mumu neza ni kuhandununa, mwana wa lunga ni tato, mwana wa pwo ni naye, tembwa-mwana ni naye-weno. 36 Pundu lume, asoko* ja mutu e makapwa akwa-kole jenyi. 37 Yoze wakuzanga chinji tato hanji naye kuhiana yami, kangutelele; chipwe yoze wakuzanga chinji mwanenyi wa lunga, hanji mwanenyi wa pwo kuhiana yami, kangutelele. 38 Yoze keshi kutayiza kuzundula mutondo wenyi wa lamba hanga angukaule, kangutelele. 39 Mumu mweswawo mazanga kulamwina mwono* wenyi makautokesa, alioze yoze matokesa mwono wenyi mumu lia yami, makauwana.
40 “Yoze matambula yenu, yami anatambula; yoze mangutambula, katambula nawa Yoze wangutumine. 41 Yoze matambula profeta mumu lia iye kupwa profeta, makatambula chiwape cha profeta, ni yoze matambula mukwa-ululi mumu lia iye kupwa mukwa-ululi, makatambula chiwape cha mukwa-ululi. 42 Chikwo nawa, yoze manwisa umwe wa kuli wano akepe chipwe musenge umuwika wa meya akekema, mumu lia kupwa kambaji kami, pundu ngunanulweze ngwami, makatambula fweto yenyi.”