Kuli A-Hepreu
10 Amu Shimbi yili ni chizulie cha yuma yipema yize muyiza kulutwe, alioze hi yuma yamwenemwene ko, shimbi ni yitapo yize akununga ni kulambula mwaka ha mwaka, kuyishi kuhasa kupwisa angunu atu waze akukundama kuli Zambi hanga amuwayile. 2 Nyi chenacho, kachi kechele kuhana yitapo, mumu waze akulinga mulimo usandu, amu hanaapemesa, kachi te kechi kulipikala nawa ha shili yo, hi chocho ko? 3 Alioze, yitapo yize akuhana, yakwewulula shili yo mwaka ha mwaka, 4 mumu manyinga ja ngombe ni ja pembe keshi kuhasa kuhwisa shili.
5 Kashika, muze ejile hano hashi, iye yamba ngwenyi: “‘Kuwazangile yitapo ni milambu, alioze yenu hinunangululikila umwe mujimba. 6 Yenu kunwatayijile milambu ya kwocha, chipwe milambu ha shili.’ 7 Kashika, nambile ngwami: ‘Yami uno (mu chivungo munasonewa hakutwala kuli yami) hanga ngulinge upale wenu, Zambi yami.’” 8 Chitangu iye yamba ngwenyi: “Yenu kunwazangile chipwe kutayiza yitapo, milambu, ni milambu ya kwocha, chipwe milambu ha shili,” yitapo yize akuhana kulita ni Shimbi; 9 mba yamba nawa ngwenyi: “Yami uno hanga ngulinge upale wenu.” Iye machiza ululikiso utangu wa milambu ni yitapo hanga asalakanyise ululikiso wamuchaali wa chitapo cha ukuule wa Yesu. 10 Mumu lia “upale” unowene, hanatupwisa asandu kamuwika kunahu kupalikila mu mulambu wa mujimba wa Yesu Kristu.
11 Chikwo nawa, sasendote mweswe kakumana tangwa ha tangwa haze akukalakalila hanga alinge mulimo wenyi usandu, ni kulambula yitapo yizeyene ha yisuho yinji, yize kuyishi kuhasa kujimuna shili. 12 Alioze, iye hanalambula chitapo chimuwika ha shili chisuho chimuwika kunahu, hanatwama ku kwoko lia chindume lia Zambi, 13 kukatuka haze, kakushimbwila ndo muze masa akwa-kole jenyi kushi lia yiliato yenyi. 14 Mumu, ni mulambu umuwika wa chitapo, iye yapwisa angunu kamuwika kunahu waze anase ku usandu. 15 Chikwo nawa, spiritu yisandu neyo yakutwaha uchela ha kwamba ngwo: 16 “‘Uno we usendo mungukalinga no ha kupalika cha matangwa waze,’ chocho anambe Yehova.* ‘Mungukasa shimbi jami mu mbunge jo ni kujisoneka mu manyonga jo.’” 17 Mba yaweza ngwenyi: “Chichi kewuluka nawa shili yo, ni yitanga yo ya kuhona kwononokena shimbi.” 18 Kashika kuze kuli ukonekeno wa yuma yino, kukushi nawa mulambu wa shili.
19 Kashika, mandumbu, amu tuli ni hamu lia kwenda mu jila ya kuya muma musandu kupalikila mu manyinga ja Yesu, 20 jila yaha, ya mwono yize iye atwazulwilile kupalikila mu chikalakala cha hina, che kwamba, musunya wenyi, 21 chikwo nawa, amu tuli ni sasendote munene yoze wakuyula ku zuwo lia Zambi, 22 tukundamenu kuli Zambi ni mbunge yeswe ni ufulielo ungunu ni mbunge yitoma ya kupemesa ku yitanga yipi, ni mijimba yetu ya kusanyisa ni meya apema. 23 Tunungenu ni kuhanjika hakutwala ku kutalatala chetu ha mbunga, chakuhona kuyambashana, mumu mutu yoze watulakenyene kashishika. 24 Tulihulumbenu hali umwe ni mukwo hanga tulikolweze ni kulisolwela zango ni yitanga yipema, 25 kanda tulitwamina kulikungulula, ngwe chize amwe akulinga, alioze tulitakamisenu umwe ni mukwo, kuhiana chikolo muze tunamono lie tangwa lia Zambi linakundama.
26 Mumu nyi twalinga shili ku tachi muze hitwapwa kulu ni chinyingi cha umwenemwene, kukushi nawa chitapo chikwo chize muchichiza shili yacho, 27 alioze, kuli kutalatala cha usopeso ukalu, ni utenu usasu uze muukanongesa akwa-kulimika ni Zambi. 28 Mutu mweswawo wakulelesa Shimbi ja Mose kakufwa chakuhona kumuvwila keke, kulita ni uchela wa atu aali hanji atatu. 29 Kuchi nunanyongo, shina kechi kumwesa lamba linji mutu yoze maliata Mwana wa Zambi ni kutuka spiritu ya chawana cha keke, ni kulelesa ulemu wa manyinga a usendo waze amupwishile no musandu? 30 Mumu tunanyingika yoze wambile ngwenyi: “Kukala* milonga ni chami; yami mwene mungukafwetesa.” Chikwo nawa ngwenyi: “Yehova* makasopesa atu jenyi.” 31 Kuholokela mu moko ja Zambi ya mwono chakukolesa woma.
32 Kashika, nungenu ni kwiwuluka matangwa a kunyima, muze te hinwapwa ni pangu, yenu nwanyongonwene mu jita yikalu ni lamba linji. 33 Ha mashimbu amwe kapwile ni kunutuka ni kunuhungumiona ha mbunga, ha mashimbu akwo te nwakupwa hamuwika ni atu waze amwene lamba liacho. 34 Mumu nwevwilile keke waze apwile mu zuwo lia ususu, yinutayiza ni chiseke cheswe hanga anwiye yikumba yenu, ha kunyingika ngwenu nuli ni chuma chahiana ulemu, nawa cha mutolo.
35 Kashika, kanda nwecha hamu lienu, mumu lie makanuwahishila. 36 Hachino, nwatamba kunyongonona, hanga muze hinwalinga upale wa Zambi, nukatambule umanunuko wa chilakenyo. 37 Mumu, “shimbu likehe liasalako,” “yoze uneza kumaheta, kechi kalaluka.” 38 “Alioze mutu wami mukwa-ululi kumakatwama ni mwono mumu lia ufulielo,” mba “nyi mahiluka kunyima, chichi kuwahilila nenyi.” 39 Yetu hi tuli akwa-kuhiluka kunyima ko hanga atunongese, alioze tuli akwa-kufuliela hanga tufunge mwono.