Kuli A-Hepreu
12 Kashika, amu tuli ni mbunga yinene ya yela yinatujingilika, ni yetu tumbilenu yilemu yeswe, ni shili yize yakutulimbalimba, tuzombokenu ni kunyongonona mu kuzomboka chize hanase kumeso jetu, 2 ni kuhulikila meso jetu kuli Kaputu, Mukwa-Kuwahisa ufulielo wetu, Yesu. Mumu lia uwahililo uze asele kumeso jenyi, iye yanyongonona ha mutondo wa lamba, kakevwile sonyi, yatwama ku kwoko lia chindume lia ngunja ya Zambi. 3 Chochene, lihulikilenu kanawa hali yoze wanyongonwene ha maliji api waze yivulumunyi apwile ni kumwamba, waze apwile ni kulihisa ene, hanga nuchine kuhonga, chipwe kulitwamina.
4 Mu kulitachika chenu ni shili yacho, kanda nuchinyongonona ndo ku kufwa. 5 Hinwavulama utowezo uze anuhele ngwe ana, ngwo: “Mwanami, kanda ulelesa fumbo lia Yehova,* chipwe kunenganyana muze iye makwolola. 6 Mumu Yehova* kakufumba waze akuzanga; kwamba pundu, kakulamba ni shikote mweswe yoze matambula ngwe mwanenyi.”
7 Nwatamba kunyongonona, mumu kunyongonona necho chili ngwe fumbo. Mumu kuli Zambi yenu nuli ana jenyi. Mwana muka yoze tato keshi kumufumba? 8 Alioze, nyi yenu eswe kunwatambwile fumbo lino, hi nuli ko ana jenyi nawa, nuli ana a mutu mweka. 9 Chikwo nawa, atata waze atusemene kapwile ni kutufumba. Yetu twapwile ni kwavumbika. Shina kutwatambile kuzeyela ni kawashi Tata ya mwono wetu wa ku ufulielo hanga tupwe ni mwono? 10 Mumu ayo katufumbile ha shimbu likepe, kulita ni chize chapwile ni kwapemena, alioze iye kakuchilinga hanga atuyukise, tupwe asandu ngwe iye. 11 Kwamba pundu, niumwe wakuwahilila ni fumbo ha shimbu lize amwahalio wakuhi, alioze kakwivwa yikola; mba ha kupalika cha mashimbu, fumbo liacho liakwima muhuko wa sambukila ya ululi kuli waze akulitambula.
12 Kashika, kolesenu moko waze anazeye ni makungunwa waze anahongo. 13 Nungenu ni kululamisa majila ja molu jenu, hanga chilema achine kulemana, alioze, ahinduke. 14 Fupenu kupwa ni sambukila ni atu eswe ni usandu, nyi ka, niumwe kechi kamona Mwene. 15 Kanyamenu chinji hanga niumwe kanda ahona kupwa ni chawana cha keke ya Zambi, hanga niumwe muji usasu uhone kusoka ni kuneha kapinda, ni kuchisa nawa atu anji. 16 Kanyamenu hanga mukachi kenu muhone kupwa mutu yoze wakulinga utanji, chipwe mutu yoze keshi kulemesa yuma yisandu, ngwe Esau, yoze ha mukunda wa ndambu ya kulia, yalanjisa ukulwana wenyi. 17 Mumu yenu nunanyingika ngwenu, kulutwe, muze iye azangile kuhinga chiwape, yamuminacho, chipwe ngwe kanungine ni kwita ni kulila hanga yuma yalumuke, alioze kakahashile.
18 Yenu kunwakundamine ku chuma chize munuhasa kukwata ni moko jenu, chize chakwachile kahia, chapwile ni lelwa lilaa, chapwile ni milima ni chijimbi, 19 chahiohiele ngwe chitavwi ni liji lize liahanjikile, lize atu evwile mba yaliumba hanga lihone kuhanjika cheka kuli ayo. 20 Mumu te kechi kuhasa kwononokena shimbi yinambe ngwo: “Chipwe lume kashitu nyi maliata ku mulundu, katamba kumwasa mawe.” 21 Chikwo nawa, yuma yize yalingiwileko yapwile ni kuhana woma, chipwe Mose kambile ngwenyi: “Ngunevu woma, ngunachikima.” 22 Alioze, yenu nwakundama ku Mulundu wa Zaione, ni ku mbonge ya Zambi ya mwono, Yerusaleme ya mwilu, ni kuli yizavu yinji ya angelo* 23 waze anakunguluka hamuwika, ni ku chikungulwila cha ana atangu waze majina jo hanaasoneka mu malilu, ni kuli Zambi, Sopi wa eswe, ni ku mwono wa ku ufulielo wa akwa-ululi waze hanaapwisa angunu, 24 ni kuli Yesu, chitakanyishi wa usendo waha, ni ku manyinga a kusapwila, waze anahanjika kanawa kuhiana manyinga ja Abele.
25 Kanyamenu, kanda nulituna kupanjika yoze unahanjika. Mumu nyi atu waze alitunyine kupanjika yoze wapwile ni kuhana utowezo wa Zambi hano hashi, ayo kakalilamwinyine ku lamba, chipwe yetu nyi twehuka kupanjika yoze wakuhanjika kukatuka mu malilu, kutuchi kalilamwina ku lamba! 26 Ha matangwa jacho, liji lienyi lianyikishine hashi, alioze haliapwila iye hanalakenya ngwenyi: “Cheka nawa, chichi kunyikisa wika hashi, alioze mungunyikisa nawa lilu.” 27 Liji linambe ngwo “cheka nawa,” linalumbunuka kuchiza yuma yize hananyikisa, che kwamba, yuma yize anakatanga, hanga yuma yize kanyikishine yisale. 28 Kashika, amu mututambula Wanangana uze kechi kuhasa kunyikisa, tunungenu ni kutambula chawana cha keke, ni ukwaso wa chawana chacho mutuhasa kulingila Zambi mulimo usandu uze iye matayiza, ni kumuvwila woma ni vumbi. 29 Mumu Zambi yetu kali kahia kaze kakunongesa.