Usolwelo wa Yesu Kristu Alwezele Kuli Yoano
6 Hohene yingumona Mwana-panga kanalamuna chijikilo chitangu cha yijikilo shimbiali, mba yingwivwa umwe wa ku yitangiwa yiwana ya mwono kanahanjika ni liji ngwe lundunjila ngwenyi: “Tweya!” 2 Namwene kavwalu mutoma, yoze watwamineho te kanakwata uta wa manana; amuhele chipangula, iye wakatukile mu kukumba hanga amanunune kukumba chenyi.
3 Muze alamwine chijikilo chamuchiali, nevwile chitangiwa chamuchiali cha mwono chambile ngwo: “Tweya!” 4 Mba yikutuhuka kavwalu mukwo muchila, yoze watwamineho kapwile ni chiyulo cha kuchiza sambukila hano hashi hanga atu akalishihe umwe ni mukwo. Amuhele mukwale unene.
5 Muze alamwine chijikilo chamuchitatu, nevwile chitangiwa chamuchitatu cha mwono chambile ngwo: “Tweya!” Mba namwene kavwalu mulaa, yoze watwamineho wapwile ni mbalansa ku kwoko. 6 Nevwile yize yapwile ngwe liji mukachi ka yitangiwa yiwana ya mwono liambile ngwo: “Njongo* ya tiliku ha lumbongo umuwika; ni njongo jitatu ja sevada ha lumbongo* umuwika, alioze kanda upihisa maji a olevwe ni vinyu.”
7 Muze alamwine chijikilo chamuchiwana, nevwile chitangiwa chamuchiwana cha mwono chambile ngwo: “Tweya!” 8 Mba namwene kavwalu watomonoka, yoze watwamineho jina lienyi Kufwa, ni Fuka* liamukawile. Amuhele chiyulo ha chihanda chimuwika cha ku yihanda yiwana ya hashi hanga ashihe ni mukwale usuku, ni kapunga, ni kufwa ni tushitu asasu a hashi.
9 Muze alamwine chijikilo chamuchitano, namwene kushi lia chilumbilo alma* ja waze ashihile mumu lia liji lia Zambi, ni mumu lia uchela uze ahanyine. 10 O akololokele ni liji linene ngwo: “Ndo ha mwaka uka, Mwene wakuyula eswe, musandu ni wamwenemwene, mushimbwila mba upatwile waze atwama hashi ni kukala manyinga jetu waze o amwangine?” 11 Mba ahanyine kuli umwe ni umwe wa kuli ayo mazalo asuku atoma, aalwezele hanga ahwime shimbu likepe ndo muze mamanununa kwoka cha ndungo ni akwo ni mandumbu waze te kwasala hakehe hanga aashihe ngwe chize chalingiwile kuli ayo.
12 Namwene muze alamwine chijikilo chamuchisambano. Kwapwile munyiko unene, tangwa lialayile ngwe chikeleyi* chilaa, kakweji wachilile ngwe manyinga, 13 ni tutongonoshi a mwilu aholokelele hashi ngwe chize makuyu a wisu akuholoka ku mukuyu muze wakutukunga ni fuji yinji. 14 Lilu liatandulukile ngwe chivungo muze machivunga. Milundu yeswe ni matungu eswe yatutulukile ha yihela yayo. 15 Mianangana a hashi ni akwa-kuyula, ni miata a tujita, ni pichi, ni akwa-tachi, ni ndungo eswe ni waze hi ndungo ko, yaya ni kuswama mu yivwenge kushi lia mawe a ku milundu. 16 O yamba ku milundu ni ku mawe ngwo: “Lundumukinenu hali yetu nutusweke kumeso ja Yoze unatwama ha ngunja ni ku utenu wa Mwana-panga, 17 mumu tangwa linene lia utenu wenyi hiliaheta, mba iya mahasa kumana?”