Usolwelo wa Yesu Kristu Alwezele Kuli Yoano
21 Namwene lilu liaha ni hashi haha; mumu lilu litangu ni hashi hatangu te hiyapalika, ni kalunga-lwiji keshiko nawa. 2 Namwene nawa mbonge yisandu, Yerusaleme Yaha, yinahulumuka mwilu ya kuli Zambi, yakululieka ngwe nandungi yoze wazala hanga atambule mukwo-lunga. 3 Mba nevwile liji linene kukatuka mwilu ngwo: “Tala! Mbalaka ya Zambi yili hamwe ni atu, iye kumakatwama hamwe no, o makapwa atu jenyi. Ni Zambi mwene makapwa hamwe no. 4 Iye makakusumuna masoji eswe ku meso jo, kufwa kuchichi kapwako nawa, kukuchi kapwa nawa kunenganyana, chipwe miteto, chipwe yikola, mumu yuma yitangu hiyapalika.”
5 Yoze te unatwama ha ngunja yamba ngwenyi: “Tala! Ngunalingi yuma yeswe yaha.” Yamba nawa ngwenyi: “Soneka, mumu maliji wano kali a ujikijilo ni a umwenemwene.” 6 Mba yamba kuli yami ngwenyi: “Maliji wano hamanunuka! Yami nguli Alfa ni Omega,* uputukilo ni songo. Mweswawo yoze mevwa pwila mungukamwaha chawana, meya a ku fuji lia mwono. 7 Mweswe yoze makumba, makazuka yuma yino, yami mungukapwa Zambi yenyi, iye kumakapwa mwanami. 8 Alioze hali akwa-mwongo, ni waze keshi kufuliela, ni akwa-kuzelwokesa, ni yingalwe, ni akwa-kulinga utanji,* ni akwa-kulinga yuma ya yipanda-panda,* ni akwa-kukombelela mahamba, ni akwa-mahuza eswe, chihela cho muchikapwa mu chitende chize chinalekwoka ni kahia ni fundanga. Chino chinalumbunuka kufwa chamuchiali.”
9 Mba umwe wa kuli angelo shimbiali waze apwile ni malonga shimbiali anazala too ni yilungo shimbiali ya kasula, yakundama kuli yami ni kwamba ngwenyi: “Tweya, mungukusolwela nandungi, pwo lia Mwana-panga.” 10 Chocho, wangutwalile mu ndundo ja spiritu ku umwe mulundu unene usuku ni kungusolwela mbonge yisandu ya Yerusaleme yize yinahulumuka mwilu ya kuli Zambi 11 ni uhenya wa Zambi. Kupeyima chayo chapwile ngwe liwe lia ndando yinji, ngwe liwe lia jasepe lize liakupeyima chinji. 12 Yili ni chipanga chinene chisuku chize chili ni yikolo 12, mba ku yikolo kwapwile angelo 12, ku yikolo yacho kwapwile kwakusoneka majina a minyachi 12 ya ana a Izalele. 13 Ku chivumbuko kwapwile yikolo yitatu, ni ku norte yikolo yitatu, ni ku sule yikolo yitatu, ni ku chitokelo yikolo yitatu. 14 Chipanga cha mbonge, necho chapwile ni mawe 12 a fundamentu, haze hapwile majina ja apostolo 12 a Mwana-panga.
15 Yoze wahanjikile ni yami te kanakwata chimwe chikwata cha kweseka nacho, umwe lumbungu wa oru hanga akeseke mbonge, yikolo yamo, ni chipanga cha mbonge. 16 Mbonge yacho yapwile ni mbango jiwana, usuhwe walio wapwile chimuwika ni utohe walio. Iye wesekele mbonge ni lumbungu ngwo, 2,220 a kilometru;* ni usuhwe walio, ni utohe walio, ni usuku walio kwilu, yapwile yimuwika. 17 Iye wesekele nawa chipanga chalio ngwo, 144 ni mbandu jiwana,* cheseko chize mungelo esekele nacho, chenacho atu akweseka nacho. 18 Chipanga kachitungile ni jasepe, mbonge yapwile ya oru yipema ngwe katalilo mutoma. 19 Fundamentu ja chipanga cha mbonge kajitungile ni milali yeswe ya mawe alemu: Fundamentu yitangu ni jasepe, yamuchiali ni safwira, yamuchitatu ni kalesetonia; yamuchiwana ni esmeralda, 20 yamuchitano ni sardonenise, yamuchisambano ni sartiu, yamuchishimbiali ni krisolita, yamuchinake ni mberilu, yamuchilivwa ni topajiu, yamuchikumi ni krisoprasu, yamuchikumi ni kashi ni jasendu, yamuchikumi ni yamuchiali ni ametita. 21 Chikwo nawa, yikolo 12 yapwile ya tukanga kumi ni yiali; chikolo ni chikolo kachilingile ni kakanga umuwika. Tapalo linene lia mbonge liapwile lia oru yipema ngwe katalilo.
22 Chamwenemo tembele niyimwe, mumu Yehova* Zambi Mukwa-Ndundo-Jeswe, iye mwe tembele yo ni Mwana-panga neye. 23 Mbonge yishi kufupiwa pangu lia tangwa hanji lia kakweji, mumu uhenya wa Zambi wakutemunamo ni Mwana-panga kali ndeya yamo. 24 Mavungu kumakenda mu pangu liamo, ni mianangana a hashi makanehamo uhenya wo. 25 Yikolo yamo kechi kayajila ha mwalwa, mumu kumuchi kapwa ufuku. 26 O kumakanehamo uhenya ni ulemu wa mavungu. 27 Alioze nichimwe chuma cha luchisa, chipwe yoze wakulinga yuma ya uzelwokeso ni ya mahuza, kechi kanjilamo; shina wika waze ali akusoneka mu chivungo cha mwono cha Mwana-panga.