Mukanda wa Tiangu
5 Haliapwila yenu pichi panjikenu, lilenu ni kulinyenga mumu lia lamba lize muliza hali yenu. 2 Upite wenu hiwapola, mazalo jenu haalia kuli yiswa. 3 Oru yenu ni prata yenu hiyakwachika ngengeya, ngengeya yacho muyikapwa uchela wa kulimika ni yenu, muyikalia misunya yenu. Yuma yize nunalilunjikila muyikapwa ngwe kahia ha matangwa a kusula. 4 Talenu! Fweto yize nwechele kufweta kuli akwa-kunukalakalila waze ahelele mbuto mu minda yenu yinatete, miteto ya akwa-kuhela waze anafupu ukwaso, hiyaheta ku matwi ja Yehova* wa tujita.* 5 Mwono wenu hano hashi wapwile wa too ni upite, ni kulivwisa kuwaha. Mbunge yenu yili ngwe tushitu waze anatoho ndo ha tangwa lize makaashiha. 6 Yenu hinunahisa, hinunashiha mukwa-ululi. Shina iye kechi kulimika ni yenu nyi?
7 Kashika, lihumikizenu mandumbu jami, ndo ha kwiza cha Mwene. Talenu chize njimi a kushimbwila mihuko yipema ya hashi. Kakuyishimbwila ni uhomboloji weswe ndo ha kwiza cha vula mutangu ni wakasula.* 8 Ni yenu nawa, lihumikizenu; kolesenu mbunge, mumu kwiza cha Mwene chinakundama.
9 Mandumbu jami, kanda nulinyenyeta hali umwe ni mukwo, hanga ahone kunusopesa. Talenu! Sopi ku yikolo ali. 10 Mandumbu jami, hakutwala ku chikuma cha kunyongonona mu lamba ni kulihumikiza, imbululenu chilweza cha aprofeta waze ahanjikile mu jina lia Yehova.* 11 Twakwavuluka ngwetu kawaha waze anyongonwene. Hinunevu ha kunyongonona cha Yombi, ni kunyingika chize Yehova* amuyukishile ku songo, hinunamono ngwenu Yehova* kakwete zango linji ni keke.
12 Kuhiana yuma yeswe, mandumbu jami, litwaminenu kulishinga, chipwe ni lilu, chipwe ni hashi, litwaminenu kulishinga chipwe shingo likwo lieswalio. Alioze, “ewa” wenu apwe lume ewa, ni “ka,” ka, hanga ahone kunusopesa.
13 Shina mukachi kenu muli mutu yoze unamono lamba? Anunge ni kulemba. Shina muli yoze unawahilila? Embe miaso ya uhaliso. 14 Shina mukachi kenu muli umwe yoze unayiji? Asanyike makulwana a mu chikungulwila, amulembele, ni kumuwahisa ni maji mu jina lia Yehova.* 15 Kulemba cha ufulielo muchikwasa yoze unayiji hanga ahinduke, Yehova* mamukatwisa. Chikwo nawa, nyi kalinga shili, mamukonekenayo.
16 Kashika, ambululenu shili yenu kuli umwe ni mukwo, ni kulilembela umwe ni mukwo, hanga nuhinduke, kuliumba cha mukwa-ululi chili ni tachi jinji. 17 Eliya kapwile mutu ngwe yetu, alioze, muze alembele ni kuliumba hanga vula achine kunoka, kakanokene mu chifuchi chacho ha miaka yitatu ni tukweji asambano. 18 Mba iye yalemba nawa, vula yanoka, hashi yihema mihuko.
19 Mandumbu jami, nyi umwe hakachi kenu mamupiangula ahichike umwenemwene, mba mukwo mamukwasa hanga ahiluke, 20 nyingikenu ngwenu, yoze makwasa chivulumunyi kukatuka mu jila yenyi yipi, mamulamwina ku ufwe ni kufuka shili yinji.