Yilinga ya Apostolo
20 Muze chizungo-zungo chahwile, Paulu yatuma kusanyika tumbaji, mba muze te haakolweza ni kulishika no, yaya ku Masendoniya. 2 Iye yendangana mu chifuchi chize ni kukolweza tumbaji ni maliji anji. Mba yaheta mu Ngresia. 3 Yatwamako tukweji atatu, alioze ha kumona ngwenyi A-Yunda kanamutwama punga, muze azangile kuya ku Seria, yahilukila ku Masendoniya. 4 Waze ayile hamwe nenyi wano: Sopatere mwana wa Pairu wa ku Mberea, ni Aristako, ni Sengundu a ku Tesalonika, ni Ngayu, wa ku Ndervwe, ni Timoteu, Techiku ni Trofwimu a mu mbonge ya Azia. 5 Malunga wano katetekelele ni kututwaminyina ku Troa. 6 Kulutwe lia matangwa a Chiwanyino cha Mbolo Kuyishi Futunwiso, yitukatuka ku Fwilipu. Mba ha kupalika cha matangwa atano, yituheta ku Troa kuze twatwamine matangwa shimbiali.
7 Ha tangwa litangu lia semana, muze te tunalikungulula hanga tulie, Paulu yaputuka kuhanjika ndo ha muchima ufuku, mumu muze te mukucha maya kwenyi. 8 Mu chipatulo cha kwilu muze te tunalikungulwila mwapwile ndeya jinji. 9 Umwe mukweze jina lienyi Utecho, te kanatwama ha kapenda, alioze yaputuka kunongwoka shimbu Paulu te machihanjika. Tulo yamukumba iye yaholoka ku chipatulo chamuchitatu cha kwilu. Mba muze amuzundwile te hafwa kulu. 10 Paulu yasunuka yahetamina hali iye yamukangayika ni kwamba ngwenyi: “Hwimenu mbunge iye kali ni mwono.”* 11 Muze Paulu te hanyina kwilu, yapalula mbolo yalia. Yanunga ni kuhanjika no nawa chisuho chisuku ndo muze kwachile, mba yaya kwenyi. 12 Mwe mukweze yamutwala ku zuwo lienyi ni mwono wenyi, eswe yalilembejeka chinji hali iye.
13 Yetu yitutetekela ni kunjila mu ulungu yituzauka ni kuya ku Asone, kwenako te mutuhitula Paulu ni kuya nenyi mu ulungu. Chenacho atushikile mumu iye te kanazange kwenda hashi. 14 Muze Paulu hatuwana mu Asone, yitunjila mu ulungu ni kuya ku Mitelene. 15 Muze hikwacha, yitukatukako yituheta hakamwihi ni Chiu. Ha tangwa liamuchiali yituheta ku Samoso, mba muze kwachile yituheta ku Miletu. 16 Paulu yatesa kuhiana Efwesu hanga achine kutokesa mashimbu mu mbonge ya Azia, mumu kazangile kuheta ni kawashi ku Yerusaleme ha tangwa lia Chiwanyino cha Pentekoste nyi te mahasa.
17 Ku Miletu, Paulu yatuma kusanyika makulwana a mu chikungulwila cha Efwesu. 18 Muze heza, Paulu yamba kuli ayo ngwenyi: “Yenu ene nunanyingika ndako yami, chize napwile mukachi kenu chize ku tangwa litangu muze nahetele mu mbonge ya Azia. 19 Nakalakalile ngwe ndungo ya Mwene, ni mbunge ya kulikehesa ni masoji anji, ni yeseko yize yanguwanyine mumu lia punga ya A-Yunda. 20 Chikwo nawa, chalitwaminyine kunwambulwila chuma nichimwe chize muchinuyukisa,* chipwe kulongesa ha mbunga ni ku zuwo ni zuwo. 21 Nambujolwele kanawa kuli A-Yunda ni kuli A-Ngresia ngwo katamba kulikonyeka, kuhiluka kuli Zambi ni kufuliela muli Mwene wetu Yesu. 22 Haliapwila spiritu yinangushinjila nguye ku Yerusaleme, chipwe ngwe chanyingikine yize muyikanguwanako. 23 Ngunanyingika ngwami, mu mambonge eswe spiritu yisandu yakungutoweza ha yisuho yinji ngwo, luyinda ni mazuwo a ususu yinangutwaminyina. 24 Alioze, chishi kumona mwono* wami ngwe chuma chilemu kuhiana. Chuma chilemu kuli yami kumanununa wenyi wami ni mulimo uze natambwile kuli Mwene Yesu; kwambujola kanawa sango jipema hakutwala ku chawana cha keke ya Zambi.
25 “Haliapwila hinanyingika ngwami, niumwe hakachi kenu waze nambujolwele Wanangana makangumona nawa wakuhi. 26 Kashika musono yenu nuli yela ngwenu, ngunasambe ku manyinga ja atu eswe, 27 mumu chalitwaminyine kunwambulwila upale* weswe wa Zambi. 28 Keyelenu kuli yenwene ni ku mbunga yeswe ya mapanga yize spiritu yisandu hiyinanutongola ngwe tulayi, hanga nukafunge chikungulwila cha Zambi chize alanjile ni manyinga ja Mwanenyi. 29 Mumu ngunanyingika ngwami, muze munguya, mikuza manjila hakachi kenu waze kechi kavwila keke mapanga. 30 Chipwe hakachi kenu, muhakasoloka atu waze makahanjika mahuza hakutwala ku umwenemwene ni kukoka tumbaji kunyima lio.
31 “Kashika kanyamenu, iwulukenu ngwenu ha miaka yitatu ufuku ni mwalwa, chalitwaminyine kukanyamisa mweswe wa kuli yenu ni masoji. 32 Haliapwila ngunanukunjika kuli Zambi ni ku liji lia chawana cha keke yenyi, lize mulihasa kunukolesa ni kunwaha chihinga hakachi ka waze hanasela ku usandu. 33 Chevwilile kuzo mbongo ja mutu niumwe, hanji oru hanji mahina ka. 34 Yenwene nunanyingika chize nakilikichile ni moko jami, hanga ngulikwase ha yize ngunahono ni kukwasa waze apwile hamwe ni yami. 35 Mu yuma yeswe nanuhele chilweza ha kuhondangana. Kashika, chanutamba kukwasa waze analele ni kwiwuluka maliji a Mwene Yesu waze ambile ngwenyi: ‘Kuhana chakuneha uwahililo unji kuhiana kutambula.’”
36 Muze te hamba yuma yino, Paulu yasa makungunwa hashi hamwe ni ayo eswe, yalemba. 37 O eswe yaputuka kulila chinji mba yaakangayika Paulu ni kumumbeja chikolo. 38 Yevwa chinyengo chinji, chipi-chipi mumu lia maliji waze Paulu ambile ngwenyi, kunuchi kangumona nawa. Chocho yamushinjikila ndo mu ulungu.