Asonekene Marku
4 Yesu yaputuka nawa kulongesa ku sesa lia kalunga-lwiji, mba mbunga yinene yalikungulwila haze iye te ali. Kashika iye yanjila mu wato yatwama ni kusosoloka ku sesa lia kalunga-lwiji. Alioze mbunga eswe yamana ku sesa lia kalunga-lwiji. 2 Iye yaputuka kwalongesa yuma yinji kupalikila mu yishima. Yamba kuli ayo ngwenyi: 3 “Umwe mutu yaya ni kukuwa mbuto. 4 Muze te anakuwu mbuto, yimwe yiyiholokela ku sesa lia jila, tujila yeza yayilia. 5 Yikwo yiyiholokela ha mawe haze te kuheshi mavu anji, yiyisoka ni kawashi mumu te kuheshi mavu anji. 6 Alioze muze mwalwa watuhukile, mbuto yacho yiyilekama, yiyuma chau, mumu te kuyishi miji. 7 Mbuto yikwo yiyiholokela mukachi ka mingonga, ye mingonga yiyitatuka, mba yiyikeketesa mbuto, kashika kuyemine mihuko. 8 Alioze yikwo yiyiholokela ha mavu apema, yiyisoka, yiyitatuka ni kwima mihuko. Yimwe 30, yikwo 60, yeka 100 hanji kuhiana.” 9 Yesu yamba nawa ngwenyi: “Mweswe uli ni matwi a kwivwa, evwe.”
10 Muze Yesu asalile ukawenyi, waze te anamujingilika yeza hamwe ni apostolo Kumi ni Aali ni kuputuka kumuhula ulumbunwiso wa yishima. 11 Iye yamba kuli ayo ngwenyi: “Hananwehecho kunyingika chijimbikilo chisandu cha Wanangana wa Zambi. Alioze kuli waze ali haze, yuma yeswe kakwalwezayo mu yishima, 12 hanga chipwe muze matala yuma yize nakulinga nihindu kechi kumona, chipwe muze mevwa yuma yize nakuhanjika nihindu kuyichi kwalumbunuka. Chikwo nawa, o kechi kahiluka kuli Zambi chipwe kulikonyeka.” 13 Yamba nawa kuli ayo ngwenyi: “Nyi chishima chino kuchanulumbunukine, kuchi yishima yikwo muyikanulumbunuka?
14 “Chikuwa kakukuwa liji lia Zambi. 15 Kashika mbuto yize yaholokelele ku sesa lia jila yinalumbunuka atu waze akwivwa liji, alioze Satana meza, machiza liji lize atumbile mu mbunge jo. 16 Chizechene nawa, mbuto yize akuwile ha mawe yinalumbunuka atu waze akwivwa liji lia Zambi mba malitayiza ni chiseke. 17 Alioze amu keshi ni miji muli ayo-ene kashika manunga ha amwe mashimbu; mba muze mukusoloka kapinda hanji yihungumiona mumu lia lie liji, hazehene matalinga. 18 Kuli nawa mbuto yize akuwile hakachi ka mingonga. Mbuto yacho yinalumbunuka waze akwivwa lie liji, 19 alioze yipikalo ya hano hashi,* ni ndundo ja kwonga cha upite ni usolo wa yuma yikwo nawa, yakukeketesa lie liji, kashika kechi kwima mihuko. 20 Alioze mbuto yize akuwile ha mavu apema yinalumbunuka atu waze akwivwa liji malitayiza ni kwima mihuko. Yimwe 30, yikwo 60, yikwo 100 hanji kuhiana.”
21 Yesu yamba nawa kuli ayo ngwenyi: “Niumwe yoze wakwanda ndeya mayisa kushi lia chisoka hanji kushi lia muhela wakuhi. Alioze ndeya kakuyisa helu lia mesa. 22 Mumu chuma cheswe cha kusweka muchikasoloka; chipwe chuma cheswe chize chili cha kuhengeka necho muchikasoloka hatoma. 23 Mweswe uli ni matwi a kwivwa, evwe.”
24 Yaalweza nawa ngwenyi: “Kanyamenu ha yuma yize nwakwivwa. Mumu ni cheseko chize munweseka nacho akwenu, chenacho makanweseka nacho yenwene hanji kuhiana. 25 Mumu yoze uli nacho kumakamuwezela, alioze yoze keshi nacho makamutambula chipwe chize ali nacho.”
26 Yesu yamba nawa ngwenyi: “Kashika Wanangana wa Zambi uli ngwe njimi yoze wakukuwa mbuto. 27 Iye mapomba ha ufuku, chimene mahinduka, mbuto muyisoka ni kutatuka, chipwe ngwe kanyingikine chize chino chakulingiwa. 28 Mbuto yakusoka hakehe-hakehe: Chitangu mafwo, chamuchiali mukungo, kusulaho mbuto ha mukungo. 29 Alioze muze mbuto muyihia, hohene iye maya ni kucha, mumu mashimbu a kucha haheta.”
30 Yesu yamba nawa ngwenyi: “Ni chuma chika mutuhasa kutesa Wanangana wa Zambi? Hanji ni chishima chika mutuulumbununa? 31 Uli ngwe luchichi wa mosetate, muze akumutumba kapwa luchichi mukehe chinji hakachi ka chichi jeswe ja hashi. 32 Alioze muze hamutumba kakutatuka kuhiana yiputa* yeswe ya hashi, kakutanda mitango yinene-yinene ni tujila a mwilu kakutunga yaswa mu chizulie chawo.”
33 Ni yishima yinji ngwe yino, Yesu yaalongesa liji lia Zambi ni kulita ni kuhasa cho. 34 Kwamba pundu, te keshi kulweza atu chuma nichimwe chakuhona kwatela chishima, alioze wapwile ni kulumbununa yuma yeswe kuli tumbaji twenyi kwaukawo.
35 Ha tangwa lizeliene, muze kwapwile chingoloshi, iye yaalweza ngwenyi: “Tuzaukenu hanga tuye mu sali likwo lia kalunga-lwiji.” 36 Kashika, muze te hahichika mbunga, tumbaji twenyi yamumbata mu wato muze apwile, ni mato akwo yamukaula. 37 Chocho, kwejile kangonga munene, mba mikanya ya meya yiyiputuka kunjila mu wato, kashika wato yiuputuka kuzala. 38 Alioze Yesu te kanapombo kunyima lia wato ni kushachila mutwe wenyi ha ushachilo. Chocho tumbaji twenyi yamulawisa ni kumulweza ngwo: “Longeshi shina kunwamwene kama ngwenu tunambe kufwa nyi?” 39 Yesu yakatuka, yambila fuji ni kalunga-lwiji ngwenyi: “Hwima! Hola!” Mba ye fuji yahwile, chocho yikuhola kuluu. 40 Mba iye yaahula ngwenyi: “Mumu liaka nunevu woma upwahaha?* Shina kanda nuchipwa ni ufulielo?” 41 Tumbaji twenyi yevwa woma unji, chocho yamba kuli umwe ni mukwo ngwo: “Lunga muka aumwene? Chipwe fuji ni kalunga-lwiji yinamwononokena.”