Asonekene Mateu
25 “Wanangana wa mu malilu uli ngwe kumi lia ana-mapwo waze te kanda achilimona ni malunga,* waze anjile ndeya jo yaya ni kupatwiza sandungi. 2 Atano a kuli ayo kapwile yihepuke, alioze akwo atano kapwile yikanyame. 3 Yihepuke yambata ndeya jo, alioze kambachile maji, 4 yikanyame yambata maji mu milangi hamuwika ni ndeya jo. 5 Amu sandungi te anashimbula, ayo eswe yanongwoka yaya tulo. 6 Susumuku ha muchima-ufuku, yevwa liji linene ngwo: ‘Sandungi yono! Tuhukenu nuye ni kumupatwiza.’ 7 Chocho ana-mapwo jacho eswe kumi, yahinduka, yalulieka ndeya jo. 8 Yihepuke yalweza yikanyame ngwo: ‘Twehenu kama ndambu ya maji, mumu ndeya jetu jinambe kujima.’ 9 Yikanyame yakumbulula ngwo: ‘Kuchina hanji maji waze tuli no kechi kukumbana kuli yenu ni yetu. Alioze yeenu kuli akwa-kulanjisa maji hanga nulande ndambu.’ 10 Muze ayile ni kulanda maji, sandungi yeza. Ana-mapwo atano waze te halilulieka yanjila ni sandungi ha chiwanyino cha umbachiso, mba chikolo yachiyika. 11 Chocho ana-mapwo akwo atano yeza, yamba ngwo: ‘Mwene, Mwene, twazulwile kama!’ 12 Iye yaakumbulula ngwenyi: ‘Pundu ngunanulweze ngwami: ‘Chanunyingikine.’
13 “Kashika, nungenu ni kulawola, mumu kunwanyingikine tangwa, chipwe ola.
14 “Mumu chino chinapu ngwe umwe mutu yoze te unambe kuya mu wenyi, shimbu kanda achiya, yakunga ndungo jenyi yaaha yikumba yenyi. 15 Umwe yamwaha talentu* jitano, mukwo yamwaha talentu jaali, mweka yamwaha talentu yimuwika, yahana kuli mutu mweswe kulita ni uhashi wenyi, mba yaya mu wenyi. 16 Yoze watambwile talentu jitano, hazehene yaya yalinga najo mingoso, yazuka nawa talentu jikwo jitano. 17 Chizechene nawa, yoze watambwile jaali, yazuka jikwo jaali. 18 Alioze ndungo yoze watambwile talentu yimuwika, yaya, yafula wina, yavumbika talentu ya mwata wenyi.
19 “Muze hikwapalika mashimbu anji, mwata wo yahiluka mu wenyi, yalula no mbongo. 20 Mba yoze watambwile talentu jitano yeza, yaneha kuli mwata wenyi talentu jikwo jitano, yamba ngwenyi: ‘Mwata, nwanguhele talentu jitano. Tala, hinazukako jikwo jitano.’ 21 Mwata wenyi yamukumbulula ngwenyi: ‘Walinga kanawa, ndungo mupema, washishika! Washishika ha yuma yikehe, mungukutongola hanga ufunge yuma yinji. Wahilila hamwe ni mwata we.’ 22 Mba yoze watambwile talentu jaali, yeza, yamba ngwenyi: ‘Mwata, wanguhele talentu jaali, tala, hinazukako jikwo jaali.’ 23 Mwata wenyi yamukumbulula ngwenyi: ‘Walinga kanawa, ndungo mupema, washishika! Washishika ha yuma yikehe. Mungukutongola hanga ufunge yuma yinji. Wahilila hamwe ni mwata we.’
24 Kusulaho yoze watambwile talentu yimuwika yeza, yamba ngwenyi: ‘Mwata, ngunanyingika ngwami uli mutu mukalu, wakuhela haze kuwatumbile, wakukunga haze kuwamwangine. 25 Kashika ngunakevwa woma, mba yingusweka talentu ye mu mavu. Tala, talentu ye ayi.’ 26 Mwata wenyi yamukumbulula ngwenyi: ‘Ndungo mupi, chileya, kumana te unanyingika ngwe nakuhela haze chatumbile ni kukunga haze chamwangine? 27 Nyi chocho, kachi unakahana mbongo jami kuli akwa-kulanjisa, muze neza kachi najitambula ni mbwezo.
28 “Kashika mutambulenu talentu, nuyihane kuli yoze uli ni kumi lia talentu. 29 Mumu yoze ulinacho, kumakamuweza nawa, makapwa ni yalumbama. Alioze yoze keshi nacho, chipwe chize alinacho kumakamuchizacho. 30 Mbilenu yono ndungo wamokomoko haze mu milima. Henaho makalilila mbimbi ni kulikeleketa ku mazo.’
31 “Muze Mwana-mutu meza mu uhenya wenyi hamwe ni angelo eswe, makatwama ha ngunja yenyi ya uhenya. 32 Mavungu eswe makaakungulula kulutwe lienyi, iye makahandununa atu ngwe chizechene kafunga akuhandununa mapanga ni pembe. 33 Makasa mapanga ku chindume chenyi, pembe ku chimeso chenyi.
34 “Mba Mwanangana makamba kuli waze ali ku chindume chenyi ngwenyi: ‘Tweyenu, yenu waze hanawahisa kuli Tata, hingenu Wanangana uze hananululiekela chize ku uputukilo wa hashi. 35 Mumu nevwile zala, yinungwaha kulia. Nevwile pwila, yinungwaha meya. Napwile chilambala yinunguzumbula kanawa; 36 napwile ni uvu, yinungujika. Nayijile, yinungufunga. Napwile mu zuwo lia ususu, yinuya ni kungumeneka.’ 37 Mba akwa-ululi makamukumbulula ngwo: ‘Mwene, tangwa lika twakumwene ni zala mba yitukwaha kulia, hanji ni pwila mba yitukwaha meya? 38 Tangwa lika twakumwene ngwe chilambala mba yitukuzumbula kanawa, hanji ni uvu mba yitukujika? 39 Tangwa lika twakumwene unayiji hanji mu zuwo lia ususu mba yituya ni kukumeneka?’ 40 Mwanangana makaakumbulula ngwenyi: ‘Ngunanulweze pundu ngwami: Yize nwalingile kuli umwe wa kuli wano mandumbu jami akehe, nwayilingile kuli yami.’
41 “Mba Mwanangana makamba kuli waze ali ku chimeso chenyi ngwenyi: ‘Katukenu kuli yami, yenu waze hinunashingiwa, yeenu mu chitende cha kahia ka mutolo kaze hanaluliekela Ndiapu ni angelo jenyi. 42 Mumu nevwile zala, yenu kunwanguhele nichimwe cha kulia; nevwile pwila, kunwanguhele meya. 43 Napwile chilambala, alioze kunwanguzumbwile; napwile ni uvu, alioze kunwangujikile; nayijile, napwile mu zuwo lia ususu, alioze kunwangukwashile.’ 44 Hohene, no makamukumbulula ngwo: ‘Mwene, tangwa lika twakumwene ni zala, hanji ni pwila, hanji chilambala, hanji ni uvu hanji unayiji, hanji mu zuwo lia ususu, alioze kutwakukwashile?’ 45 Iye kumakaakumbulula ngwenyi: ‘Pundu ngunanulweze ngwami, chize kunwalingile kuli umwe wa kuli wano mandumbu jami akehe, kunwachilingile kuli yami.’ 46 Wano kumakaya ku kufwa cha mutolo, alioze akwa-ululi kumakaaha mwono wa mutolo.”