Asonekene Luka
8 Ha kupalika cha amwe mashimbu, Yesu yaputuka kuya mu mbonge ni mbonge, chihunda ni chihunda, ni kulongesa ni kwambujola sango jipema ja Wanangana wa Zambi. E tumbaji Kumi ni Aali kapwile hamwe nenyi, 2 ni amwe mapwo waze awukile ku maspiritu api ni ku misongo: Maria, yoze apwile ni kuvuluka ngwo Ka-Mandala, kuli iye andemoniu shimbiali atuhukile, 3 Joana, pwo lia Kuza, kafufuchi wa Heronde, Suzana ni mapwo akwo anji waze apwile ni kwakwasa ni yikumba yo.
4 Muze mbunga yinene yalichingile ni atu waze apwile ni kwiza kuli iye kukatuka ku mbonge ni mbonge, iye yahanjika no mu chishima ngwenyi: 5 “Umwe mutu yaya ni kukuwa mbuto jenyi. Muze te anakuwa, jimwe yijiholokela ku sesa lia jila, yajiliata, tujila a mwilu yajilia. 6 Jikwo yijiholokela ha mawe, muze hijasoka, yijoma, mumu meya te akuhi. 7 Jeka yijiholokela mukachi ka mingonga, mingonga yiyitatuka hamuwika najo, mba yajikeketesa. 8 Alioze, jikwo yijiholokela ha mavu apema, muze hijema mbuto, yijima mihuko yisuho 100.” Muze haalweza yuma yino, iye yahanjika ni liji mwilu ngwenyi: “Mweswe uli ni matwi a kwivwa, evwe.”
9 Alioze, tumbaji twenyi yamuhula ulumbunwiso wa chishima chino. 10 Iye yamba ngwenyi: “Yenu hananwehe uhashi wa kunyingika yijimbikilo yisandu ya Wanangana wa Zambi, alioze, akwo ngunahanjika no mu yishima, hanga chipwe muze matala, alioze kechi kumona nichimwe, hanga chipwe muze mevwa, alioze kuyichi kwalumbunuka. 11 Ulumbunwiso wa chishima uli uno: Mbuto jinalumbunuka liji lia Zambi. 12 Jize jaholokele ku sesa lia jila, jinalumbunuka waze hanevu liji, mba Ndiapu meza, maachiza liji mu mbunge jo hanga aakwike kufuliela, ahone kwalamwina. 13 Mbuto jize jaholokele ha mawe, jinalumbunuka waze, muze hevwa liji, malitambula ni chiseke, alioze keshi miji. Mafuliela ha mashimbu akehe, alioze ha mashimbu a cheseko, mapianguka. 14 Jize jaholokele hakachi ka mingonga, jinalumbunuka waze evwile liji, alioze muze yipikalo, upite ni usolo wa mwono uno, muyaapiangula, makeketela chinji, kechi kwima mihuko yipema. 15 Mbuto jize jaholokele ha mavu apema, jinalumbunuka waze, muze hevwa liji ni mbunge yitoma nawa yipema, mafunga liji, mema mihuko ni kunyongonona.
16 “Kukushi mutu yoze, muze makwachisa ndeya mayifuka ni chimwe chikashi hanji kuyisa kwishi lia muhela, alioze kakuyisa helu lia mesa hanga waze manjila amone pangu. 17 Mumu chuma cheswe cha kusweka muchikasoloka, chipwe chuma cheswe chize chili cha kuhengeka necho makachinyingika ni kusoloka hatoma. 18 Kashika, kanyamenu ha chize nwakwivwa, mumu yoze uli nacho, kumakamuwezela, alioze yoze keshi nacho, chipwe chize ananyongo ngwenyi kali nacho, makamutambulacho.”
19 Naye ni ana-kwo yeza, alioze kahashile kuheta kuli iye mumu lia mbunga. 20 Mba yamulweza ngwo: “Noko ni ana-kwenu kali haze, kanazange kukumona.” 21 Iye yaakumbulula ngwenyi: “Mama ni ana-kwetu kali wano akwivwa liji lia Zambi ni kulikaula.”
22 Tangwa limwe, iye ni tumbaji twenyi yanjila mu wato, mba iye yaalweza ngwenyi: “Tuzaukenu hanga tuye mu sali likwo.” Chocho yaya. 23 Alioze muze te anazauka, Yesu yapomba. Mba yikwiza fuji yinji ha chitende, wato yiuputuka kuzala ni meya, chocho yapwa mu utoji. 24 Hachino, yamulawisa ni kwamba ngwo: “Longeshi, Longeshi, tunambe kufwa!” Iye yakatuka, yatenukina fuji ni mikanya ya meya, yiyihola kuluu. 25 Mba iye yaamba ngwenyi: “Ufulielo wenu ulihi?” Alioze ayo yevwa woma unji ni kukomoka, yamba kuli umwe ni mukwo ngwo: “Au mwene mutu muka? Mumu kanatumina chipwe fuji ni meya, neyo yinamwononokena.”
26 Yaheta mu chifuchi cha A-Ngandara, chize chalitalangana ni Ngalileya. 27 Muze Yesu atuhukile mu wato, umwe lunga wa mu limbo liacho yoze te uli ni andemoniu, yaya ni kulitakana nenyi, lunga wacho ha mashimbu anji te keshi kuzala mahina, chipwe kutwama mu zuwo, alioze kutwama chenyi ku mafuka. 28 Muze hamona Yesu, yakololoka, yafulamana kulutwe lienyi, yamba ni liji linene ngwenyi: “Yesu, Mwana wa Zambi Chitunda, yika unafupu kuli yami? Ngunaliumbu kuli yena, kanda ungupinjisa.” 29 (Mumu Yesu kambile kuli spiritu ya luchisa hanga yituhuke muli lunga. Spiritu yacho yapwile ni kumupinjisa chinji, kanji-kanji kapwile ni kumukasa malenge ku molu ni ku moko, chikwo nawa, te kakumufunga kuli atu, alioze iye kapwile ni kupatula malenge, ndemoniu kapwile ni kumutwala hanga atwame ku chihela kwa-ukawenyi.) 30 Yesu yamuhula ngwenyi: “Jina lie iya?” Iye yakumbulula ngwenyi: “Tununu,”* mumu andemoniu anji anjilile muli iye. 31 Yaputuka kuliumba kuli Yesu hanga ahone kwatuma mu jondo. 32 Kwapwile chendo chinene cha ngulu waze te anali ha mulundu, kashika ayo yaliumba kuli iye hanga aatayize anjile muli ngulu jacho, iye yaatayiza. 33 Chocho andemoniu yatuhuka muli lunga, yanjila muli ngulu, chendo cheswe cha ngulu yichilundumukina mu chimbongo yanjila mu chitende, ngulu eswe yafwa mu meya. 34 Alioze, muze tufunga ngulu amwene yize yinakalingiwako, yachina, yaya ni kwambulula yuma yacho mu mbonge ni mu yihunda yeswe.
35 Mba atu yaya hanga atale yize yalingiwileko. Muze haheta kuli Yesu, yawana mutu yoze atuhwishile andemoniu hazala mazalo, hapwa ni manyonga a utu, kanatwama ku molu ja Yesu, chocho yevwa woma. 36 Atu waze amwene yuma yacho, yaalumbunwina mbunga chize iye awukile mutu yoze wapwile ni andemoniu. 37 Atu anji a mu chifuchi cheswe cha A-Ngarase, yeta kuli Yesu hanga akatuke kuli ayo, mumu te kanevu woma unji. Chocho, Yesu yanjila mu wato hanga aye. 38 Alioze, lunga yoze atuhwishile andemoniu, yanunga ni kuliumba kuli iye hanga aye nenyi, alioze Yesu yamulweza hanga aye kwenyi, yamwamba ngwenyi: 39 “Hiluka ku zuwo, nunga ni kuhanjika ha yize Zambi alinga hali yena.” Chocho yaya kwenyi ni kwambujola mu mbonge yeswe yuma yize Yesu anakamulingila.
40 Muze Yesu ahilukile, mbunga yamutambula kanawa, mumu te kanamushimbwila. 41 Mba umwe lunga avuluka ngwo Yaru yaheta, lunga wacho kapwile kasongo wa sunangonga. Iye yafulamana ku molu ja Yesu, yaputuka kuliumba hanga aye ku zuwo lienyi, 42 mumu mwanenyi wa wika wa pwo, wa miaka 12 te kanambe kufwa.
Muze Yesu te anayi, mbunga te yinamushinjeka sali ni sali. 43 Kwapwile umwe pwo yoze te ukwete musongo wa kuhita manyinga ha miaka 12, niumwe te keshi kuhasa kumuwuka. 44 Iye yakundama kunyima lia Yesu, yakwata ku songo lia mazalo jenyi, hazehene kuhita cha manyinga yichipatuka. 45 Kashika, Yesu yahula ngwenyi: “Iya wangukwata?” Amu atu eswe te analikala, Petulu yamba ngwenyi: “Longeshi, mbunga yinakujingilika ni kukushinjeka.” 46 Alioze, Yesu yamba ngwenyi: “Mutu wangukwata, mumu nevwa ndundo jatuhuka muli yami.” 47 Muze pwo hamona ngwenyi kahashile kuswama, yakundama kuli Yesu ni kuchikima ni woma, yafulamana kumeso jenyi, yalumbununa kulutwe lia mbunga chikuma chize akwachila Yesu, ni chize ahinduka hazehene ku musongo wenyi. 48 Alioze iye yamulweza ngwenyi: “Mwanami, ufulielo we wakuuka. Yako ni sambukila.”
49 Shimbu Yesu te machihanjika, yikuheta umwe wa ku zuwo lia mukwa-kuyula sunangonga, yamba ngwenyi: “Mwane hafwa. Kanda upinjisa nawa Longeshi.” 50 Muze Yesu achivwile, yamukumbulula ngwenyi: “Kanda wivwa woma, fuliela wika, mwane kumahinduka.” 51 Muze ahetele ku zuwo, Yesu katayijile niumwe hanga anjile nenyi, shina wika Petulu, Yoano, Tiangu, tato ni naye ya mwana-pwo. 52 Alioze, atu eswe te kanalila, kanalilambe ha pambo ni kulinyenga ha kufwa cha kanuke wacho wa pwo. Kashika, iye yamba ngwenyi: “Holenu, kanda nulila, mumu kafwile, alioze kanapombo.” 53 Ha kuchivwa, ayo yaputuka kumuseha ni kumulelesa, mumu ayo te kananyingika ngwo mwana hafwa. 54 Alioze iye yamukwata ku kwoko, yamusanyika ngwenyi: “Mwana-pwo, hinduka!” 55 Mba spiritu yenyi yiyihiluka, chocho yakatuka hazehene, Yesu yaalweza hanga amwehe kulia. 56 Yisemi jenyi yawahilila chinji, alioze iye yaamba hanga ahone kulweza mutu niumwe yize yalingiwa.