Mukanda Utangu wa Yoano
5 Mutu yoze wakufuliela ngwenyi Yesu kali Kristu, mutu wacho kasemukine kuli Zambi, yoze wakuzanga Zambi kakuzanga nawa ana ja Zambi. 2 Ha chikuma chino, tunanyingika ngwetu twakuzanga ana ja Zambi, muze twakuzanga Zambi ni kwononokena shimbi jenyi. 3 Mumu kuzanga Zambi chinalumbunuka chino: Ngwo, twononokenu shimbi jenyi, mumu, shimbi jenyi hi jikalu ko, 4 Mumu mweswawo yoze wasemukine kuli Zambi, kakukumba hashi. Chino che kukumba chize hichinakumbu hashi, ufulielo wetu.
5 Iya yoze mahasa kukumba hashi? Hi yoze ko wakufuliela ngwenyi Yesu kali Mwana wa Zambi nyi? 6 Yono mwe wejile kupalikila mu meya ni mu manyinga, Yesu Kristu, hi ni meya wika ko, alioze ni meya ni manyinga. Spiritu yakuhana uchela, mumu spiritu yapwa umwenemwene. 7 Mumu kuli yuma yitatu yize yakuhana uchela: 8 spiritu, meya ni manyinga; yuma yino yitatu yakuhana uchela ha chuma chimuwika.
9 Nyi twakutayiza uchela wa atu, uchela wa Zambi unahiane chinji wa atu. Mumu uno we uchela wa Zambi, uchela uze iye ahanyine hakutwala kuli Mwanenyi. 10 Yoze wakufuliela muli Mwana wa Zambi, kakusolola ngwo, yize Zambi amulongesele yili mu mbunge yenyi. Alioze, yoze keshi kufuliela muli Zambi, kakupwisa Zambi mukwa-mahuza, mumu keshi kufuliela ha uchela uze Zambi ahanyine hakutwala kuli Mwanenyi. 11 Uno we uchela, Zambi hanatwehe mwono wa mutolo, mwono wacho uli muli Mwanenyi. 12 Yoze uli ni Mwana, kali ni mwono wacho; yoze keshi ni Mwana wa Zambi, mwono wacho keshi nawo.
13 Ngunanusonekena yuma yino, yenu waze nunafuliela mu jina lia Mwana wa Zambi, hanga nunyingike ngwenu nuli ni mwono wa mutolo. 14 Uno we ufulielo* tuli nawo muli iye ngwo, yeswayo mutumwita kulita ni upale wenyi, iye matwivwa. 15 Nyi tunanyingika ngwetu iye kakutwivwa ha chuma cheswacho mutumwita, tunanyingika nawa ngwetu matwaha yize twamwita, mumu kuli iye twayita.
16 Nyi umwe mamona ndumbwenyi kanalinga shili yize kuyishi kutwala ku kufwa, amwichile kuli Zambi, Zambi mamwaha mwono, ewa, echile waze kalingile shili yize yakutwala ku kufwa. Kuli shili yize yakutwala ku kufwa. Chambile ngwami iye katamba kulemba hakutwala ku shili ya mutapu au. 17 Uhenge* weswe uli shili, alioze, kuli shili yize kuyishi kutwala ku kufwa.
18 Tunanyingika ngwetu, mweswe yoze wasemukine kuli Zambi keshi kulinga shili, alioze Mwana wa Zambi mamufunga, mwe mupi kechi kuhasa kumulinga* yuma yipi. 19 Tunanyingika ngwetu tuli a kuli Zambi, alioze hashi heswe kakuyulaho kuli mwe mupi. 20 Tunanyingika ngwetu Mwana wa Zambi kejile ni kutwaha mana hanga tuhase kupwa ni chinyingi cha yoze wapwa wamwenemwene. Yetu tunalivwashana ni yoze wapwa wamwenemwene, kupalikila muli Mwanenyi Yesu Kristu. Yono mwe Zambi wamwenemwene ni mwono wa mutolo. 21 Ana jami a zango, chinenu mahamba.