Asonekene Mateu

23 Yesu yalweza mbunga ni tumbaji twenyi ngwenyi: 2 “Alongeshi a shimbi ni A-Fwariseu hanatwame mu chitwamo cha Mose. 3 Kashika, lingenu yeswe yize manulweza ni kuyikaula, alioze kanda nupwa ngwe ayo, mumu kakuhanjika, alioze keshi kulinga yize akwamba. 4 Kakukasa yiteli yilemu chinji ni kuyitwika ha yipaya ya akwo, alioze ayo ene kasolo kuyitutulula chipwe ni munwe umuwika. 5 Kakulinga milimo yo yeswe hanga aamone kuli atu. Mumu kakutohwesa mishete yo ya yisoneko yize akuzala ngwe ufunge, ni kusuhwisa masongo a mazalo jo. 6 Kakuzanga yihela yilemu ha yiwanyino ya kulia cha chingoloshi, yitwamo ya kulutwe mu masunangonga, 7 kwameneka ha yitanda ni kwavulwoka kuli atu ngwo, Alongeshi.* 8 Alioze, yenu kanda anusanyika ngwo, Alongeshi, mumu Longeshi wenu umuwika, yenu eswe nuli mandumbu. 9 Chikwo nawa, kanda nusanyika niumwe mutu hano hashi ngwenu tata, mumu Tatenu umuwika, Yoze uli mu malilu. 10 Chipwe kunuvuluka ngwo, miata, mumu Mwata wenu umuwika, Kristu. 11 Alioze, yoze munene wahiana eswe hakachi kenu, mwe watamba kupwa kavumbi kenu. 12 Yoze malinangamisa makamulelesa, yoze malikehesa makamunangamisa.

13 “Lamba lienu, alongeshi a shimbi ni A-Fwariseu, yilembekese! Mumu nwakukinda atu kunjila mu Wanangana wa mu malilu; alioze yenwene kunushi kunjilamo, chipwe waze anazange kunjilamo nunaakwika. 14* ——

15 “Lamba lienu, alongeshi a shimbi ni A-Fwariseu, yilembekese! Mumu nwakwendangana mu Kalunga-lwiji ni hatunda hanga nwalumune mutu umuwika apwe Ka-Yunda, muze mutu wacho matayiza, nwakumupwisa yoze unatela Ngehena, kakupwa mutu mupi yisuho yiali kuhiana yenwene.

16 “Lamba lienu, tusongo tupuputa, nwakwamba ngwenu: ‘Nyi mutu malishinga mu jina lia tembele kushi mulonga; alioze nyi malishinga mu jina lia oru ya mu tembele, katamba kumanununa shingo lienyi.’ 17 Yihepuke ni tupuputa! Chuma chika chilemu chahiana chikwo, shina oru, nyi tembele yize yakupwisa oru yisandu? 18 Chikwo nawa, yenu nwakwamba ngwenu: ‘Nyi mutu malishinga mu jina lia chilumbilo, kushi mulonga; alioze nyi malishinga mu jina lia mulambu uze uliho, katamba kumanununa shingo lienyi.’ 19 Tupuputa! Chuma chika chilemu chahiana chikwo, shina chawana, nyi chilumbilo chize chakupwisa chawana chisandu? 20 Kashika, yoze malishinga mu jina lia chilumbilo, kanalishingi ha chilumbilo ni yuma yeswe yize yiliho; 21 ni yoze malishinga mu jina lia tembele, kanalishingi ha tembele ni hali Yoze watwamamo; 22 ni yoze malishinga ni lilu, malishinga ni ngunja ya Zambi hamuwika ni Yoze watwamaho.

23 “Lamba lienu, alongeshi a shimbi ni A-Fwariseu, yilembekese! Mumu nwakuhana chihanda chamuchikumi cha kambumba ni endru ni kominyu,* alioze nwakulengulula yikuma yilemu chinji ya Shimbi, chekwamba, kupatula ni ululi, keke ni ushishiko. Yuma yino ye te nwatamba kulinga, alioze chakuhona kulelesa yikwo. 24 Yenu tusongo a tupuputa, nwakutata kamwe, alioze nwakumina kamelu!

25 “Lamba lienu, alongeshi a shimbi ni A-Fwariseu, yilembekese! Mumu nwakukosa haze lia musenge ni haze lia longa, alioze mbunge jenu munazala too ni kuzo ni usolo upi. 26 Yena Ka-Fwariseu kapuputa, lianga kukosa muchima lia musenge ni lia longa, mba haze neho hapeme.

27 “Lamba lienu, alongeshi a shimbi ni A-Fwariseu, yilembekese! Nuli ngwe mafuka akukwita ulombo utoma, mumu haze kakusoloka ngwe kali apema, alioze muchima kanazala too ni yifwaha ya afu ni yuma yeswe ya luchisa. 28 Ni yenu che nwapwa, haze nwakusoloka ngwe nuli akwa-ululi, alioze muchima nunazala too ni ulembekese ni yitanga yize kuyishi kulita ni shimbi.

29 “Lamba lienu, alongeshi a shimbi ni A-Fwariseu, yilembekese! Mumu nwakutunga mafuka ja aprofeta, ni kupemesa mafuka ja akwa-ululi, 30 nwakwamba ngwenu: ‘Nyi kachi twapwile ha matangwa ja tulamba twetu, kachi kutwakalichingile no ha kumwanga manyinga ja aprofeta.’ 31 Kashika, yenwene nwakusolola ngwo, nuli ana ja waze ashihile aprofeta. 32 Kashika, ni yenu manununenu yize aputukile tulamba twenu.

33 “Yenu tupela, ana ja yihili, kuchi munuchina upatwilo wa Ngehena? 34 Kashika ngunanutumina aprofeta, akwa-mana ni alongeshi. Amwe a kuli ayo, munukaashiha ni kwahata ha mitondo, akwo munukaalamba ni shikote mu masunangonga jenu, ni kwahungumiona mu mbonge ni mbonge, 35 hanga manyinga eswe ja akwa-ululi waze hanamwangana hano hashi akeze hali yenu, chize ku manyinga ja mukwa-ululi Abele ndo ku manyinga ja Zakaria, mwana wa Mbarakiya, yoze nwashihile hakachi ka muma musandu ni chilumbilo. 36 Ngunanulweze pundu ngwami, yuma yino yeswe, muyikeza ha chisemuko chino.

37 “Yerusaleme! Yerusaleme! Yena mukwa-kushiha aprofeta ni kwasa mawe kuli waze akukutumina! Yisuho yingahi nazangile kukunga ana je, ngwe chize kasumbi akukunga ana jenyi mushi lia mapulwa! Alioze yenu kunwatayijile. 38 Haliapwila, zuwo lienu makalihichika. 39 Mumu ngunanulweze ngwami, kukatuka musono, kunuchi kangumona nawa, ndo haze munukamba ngwenu: ‘Kawaha yoze uneza mu jina lia Yehova!’”*