Kuli A-Hepreu
3 Kashika, mandumbu asandu, yenu atambikile hanga nuye mu malilu, nyongenu hali mutu yoze tunanyingika ngwetu postolo, nawa mwata wa asasendote, mutu wacho Yesu. 2 Iye kashishikile kuli Yoze wamutongwele, ngwe chizechene Mose ashishikile ku zuwo lieswe lia Zambi. 3 Kashika, iye katela uhenya unji kuhiana Mose, mumu mutu Yoze wakutunga zuwo, kakumuchichimieka chinji kuhiana zuwo lize atunga. 4 Kwamba pundu, zuwo lieswe lili ni mutu yoze walitungile, alioze Zambi mwe watangile yuma yeswe. 5 Mose yashishika ngwe mukwa-mulimo mu zuwo lieswe lia Zambi, chocho yapwa chela wa yuma yize te mahanjika kulutwe, 6 alioze Kristu yashishika ngwe mwana mu zuwo lia Zambi. Yetu mutupwa zuwo lia Zambi, nyi twalalaminya ku hamu lietu lia kuhanjika ni ha kutalatala chetu ndo ku songo.
7 Kashika, ngwe chize spiritu yisandu yinambe: “Musono, nyi munupanjika liji lienyi, 8 kanda nukalisa mbunge jenu ngwe chize alingile tulamba twenu, ha tangwa lize avundwile ufwatulo wenyi usasu, 9 muze tulamba twenu angwesekele ni kunguhamikisa, chipwe ngwe kamwene yikomokeso yami ha 40 a miaka. 10 Kashika nevwilile kupiha chisemuko chino ni kwamba ngwami: ‘Ayo kakupianguka mashimbu eswe mu mbunge jo, kanyingikine majila jami.’ 11 Kashika nalishingile mu ufwatulo wami ngwami: ‘Kechi kanjila mu uhwimino wami.’”
12 Kanyamenu mandumbu, hanga niumwe wa kuli yenu ahone kupwa ni mbunge yipi, yize kuyishi ufulielo, ha kusosoloka kuli Zambi ya mwono; 13 alioze nungenu ni kulikolweza umwe ni mukwo tangwa ha tangwa, shimbu matangwa waze anavuluka ngwo, “Musono,” anachinungu, hanga niumwe wa kuli yenu ahone kukalisa mbunge yenyi mumu lia ndundo ja kwonga cha shili. 14 Mumu mutuzuka yize Kristu azukile, nyi twakakaminya chikolo ndo ku songo ufulielo uze twapwile nawo ku uputukilo. 15 Ngwe chize hanachambe ngwo: “Musono, nyi munupanjika liji lienyi, kanda nukalisa mbunge jenu ngwe chize alingile tulamba twenu, ha tangwa lize avundwile ufwatulo wenyi usasu.”
16 Aya waze apanjikile chipwe chocho yavundula ufwatulo usasu wa Zambi? Ngwami kali atu waze akatukile mu Engitu ni usongwelo wa Mose? 17 Chikwo nawa, atu aka Zambi evwilile uli ha miaka 40? Ngwami kali waze avulumwine, waze afwile mu puya? 18 Kuli aya iye alishingile ngwenyi, te kechi kunjila mu uhwimino wenyi? Ngwami kuli waze kakononokene? 19 Twamona ngwetu, ayo kakahashile kunjilamo mumu lia kuhona ufulielo.