Mukanda Wamuchiali wa Petulu
2 Alioze, ngwe chizechene mukachi ka A-Izalele mwapwile aprofeta a mahuza, ni hakachi kenu muhasoloka alongeshi a mahuza. Alongeshi jacho manjisa hakehe-hakehe kulihandununa hakachi kenu, kulihandununa chacho muchipihisa ufulielo wenu, ayo malituna mwene wo yoze waalanjile, hachino malikokela unongeso ni kawashi. 2 Chikwo nawa, atu anji makakaula yitanga yo ya sonyi, mba mumu lia ayo, atu anji makahanjika yuma yipi hakutwala ku jila ya umwenemwene. 3 Mba mumu lia kuzo, ayo makanwonga ni maliji a mahuza. Alioze upatwilo wo, uze hanautesa kulu, kuuchi kulaluka, unongeso wo kuushi kusuku.
4 Kwamba pundu, Zambi kakakonekenene angelo waze avulumwine, alioze yaanyasa mu Tartaru,* yaakasa ni malenge mu milima yinji ni kwatulika hanga akaasopese. 5 Iye kakakonekenene nawa atu a ku shakulu, alioze yafunga Noa, mukwa-kwambujola ululi, hamuwika ni atu shimbiali, muze anehene sanga lia meya hanga anongese yingulungulu. 6 Iye yahisa mambonge a Sondome ni Ngomora, yaanongesa ni kwapwisa uto, yahichika chilweza kuli yingulungulu cha yuma yize muyikalingiwa kulutwe. 7 Alioze yalamwina Lote mukwa-ululi, yoze wapwile ni kupihilila ha yuma ya sonyi yize yingulungulu apwile ni kulinga. 8 Mumu tangwa ha tangwa muze mutu yono mukwa-ululi apwile hakachi ko, mwono wenyi wa ululi wapwile ni kupinda mumu lia kumona ni kwivwa yitanga ya atu yize ya kulimika ni shimbi. 9 Yehova* kananyingika kulamwina mu cheseko atu waze akumuwayila ni mbunge yeswe, alioze kakutulika yihenge hanga akaanongese ha tangwa lia upatwilo, 10 chipi-chipi waze akuzanga kupihisa mijimba ya akwo ni kulelesa wata.
Keshi sonyi, yihuka, keshi woma wa kuhanjika yuma yipi hali atu waze Zambi akulemesa,* 11 alioze angelo chipwe ngwe kali ni ndundo ni tachi jinji, nihindu keshi kwihia atu jacho ni maliji a luchoko, mumu lia vumbi hali Yehova.* 12 Alioze, malunga jacho kali ngwe tushitu waze keshi mana, keshi kunyonga, akusemuka hanga aakwate ni kwanongesa, ayo kakuhanjika upi ha yuma yize kanyingikine. Makaanongesa mumu lia yitanga yo yipi, 13 ni kumona lamba mumu lia yuma yipi yize alingile.
Ayo kakuwahilila chinji ha kulihana hanga alivwise kuwaha ku mwono ha mwalwa. Kali ni yipeka ni tupalia, kakuwahilila mu malongeso jo a mahuza muze anali hamwe ni yenu ha yiwanyino. 14 Meso jo kanazale too ni upangala, keshi kuhasa kulitwamina kuvulumuna, kakupiangula waze keshi kujikiza. Mbunge jo hijinejilila ni kuzo. Kali ana waze ashingile. 15 Ayo yahichika jila yalulama, yapianguka. Yakaula jila ya Mbalau mwana wa Mbeore, yoze wazangile fweto hanga alinge yuma ya uhenge, 16 alioze yamukumika ha kwehuka shimbi. Chocho kashitu yoze wakumbata yilemu, kamama, yahanjika ni liji lia mutu, yakwika profeta hanga ahone kulinga yuma yipi.
17 Atu wano kali yito yize kuyishi meya, malelwa waze anahungumioka ni fuji ya tachi, hanaatulikila kulu milima yinji. 18 Ayo kakuhanjika maliji akukwomwesa, alioze amokomoko. Kupalikila mu usolo wo wa musunya ni yitanga ya sonyi, kakupiangula atu waze hanachina yivulumunyi. 19 Chipwe ngwe kakulakenya utuswilo kuli atu jacho, nihindu ayo ene kali ndungo a ndako jipi; mumu mutu mweswawo akukumba kuli mukwo, kakupwa ndungo yenyi. 20 Kwamba pundu, nyi ayo hanachina yuma ya luchisa ya hano hashi, kupalikila mu chinyingi cha umwenemwene cha Mwene, kanda Chilamwina chetu Yesu Kristu, alioze mafuna cheka ni kulinga yuma yacho ni kwakumba, mapwa atu api chinji kuhiana chize apwile chitangu. 21 Te muchipema kuli ayo nyi kakanyingikine kanawa jila ya ululi, kuhiana muze hayinyingika, mba mehuka shimbi yisandu yize atambwile. 22 Kashika, yuma yize ambile ha chishima cha umwenemwene yinamanunuka hali ayo, ngwo: “Kawa hahilukila ku yisaza yenyi mwene, ni ngulu, muze hamusanyisa hafuna ni kulichupika mu malowa.”