Asonekene Luka
7 Muze Yesu hahwisa yize te analweze mbunga, yanjila mu Kafwanaume. 2 Ndungo ya umwe kapitau wa maswalale, yoze te azanga chinji kuli mwata wenyi, te kanayiji chinji, kanambe kufwa. 3 Muze kapitau evwile hakutwala kuli Yesu, yatuma amwe makulwana ja A-Yunda hanga amwite eze ni kuuka ndungo yenyi. 4 Muze ayo ahetele kuli Yesu, yaputuka kuliumba ni kwamba ngwo: “Kanatela ukwaso we, 5 mumu kakuzanga vungu lietu, chikwo nawa, iye mwe watungile sunangonga yetu.” 6 Chocho Yesu yaya hamwe no. Alioze muze te kwasala hakehe hanga ahete ku zuwo, kapitau wa maswalale yatuma masepa jenyi hanga amulweze ngwo: “Mwene, kanda ulimwesa lamba, mumu kuchangutelele kunutambula ku zuwo liami. 7 Kashika namona ngwami, kuchatelele kuya kuli yena. Alioze ambenu liji, kavumbi kami kumahinduka. 8 Mumu ni yami nguli ni chiyulo hali atu, nguli ni maswalale waze nakuyula, nakwamba kuli umwe ngwami: ‘Yako!’ iye maya, kuli mukwo ngwami, ‘Tweya!’ iye meza, kuli ngamba wami ngwami, ‘Linga chino!’ iye malinga.” 9 Muze Yesu evwile maliji wano, yakomoka, yatewuluka yatala kuli mbunga waze te anamukaula, yamba ngwenyi: “Pundu ngunanulweze ngwami, kanda nguchiwana mutu niumwe chipwe mu Izalele uli ni ufulielo upwahaha.” 10 Muze waze atumine ahilukile ku zuwo, yawana ndungo hahinduka.
11 Ha kupalika cha amwe mashimbu, Yesu yaya mu yimwe mbonge avuluka ngwo Naine hamwe ni tumbaji twenyi ni mbunga yinene ya atu. 12 Muze te anakundama ku chikolo cha mbonge, yalitakana ni amwe atu anambata mufu hanga aye ni kumufunda. Mufu wacho kapwile mwana wa wika kuli naye. Chikwo nawa, pwo wacho te tuliwa, mbunga yinene ya atu a mu mbonge yacho te yinayi hamwe nenyi. 13 Muze Mwene amumwene, yamuvwila keke, yamulweza ngwenyi: “Kanda ulila.” 14 Mba yakundama, yakwata ku chipoya, akwa-kumbata yamana. Yesu yamba ngwenyi: “Mukweze, ngunambe kuli yena ngwami, hinduka!” 15 Mba mufu yahinduka, yatwama, yaputuka kuhanjika, Yesu yamuhana kuli naye. 16 Atu eswe yevwa woma, yaputuka kuhalisa Zambi ni kwamba ngwo: “Profeta munene hasoloka mukachi ketu,” chikwo nawa, “Zambi hanyonga hali atu jenyi.” 17 Lusango yono hakutwala kuli iye, yalimwanga mu Yundeya yeswe ni mu yifuchi yeswe yalisulangana nayo.
18 Chocho tumbaji twa Yoano yamulweza yino yuma yeswe. 19 Mba Yoano yasanyika aali a kuli tumbaji twenyi, yaatuma kuli Mwene hanga amuhule ngwo: “Yena uli Yoze Meza, nyi twatamba kushimbwila mutu mweka?” 20 Muze ayo ahetele kuli iye, yamba ngwo: “Yoano Chipapachisa katutuma kuli yena hanga tukuhule ngwo: ‘Yena uli Yoze Meza, nyi twatamba kushimbwila mutu mweka?’” 21 Ha ola yizeyene, Yesu yawuka atu anji ku yikola yo ni ku misongo yikalu ni maspiritu api, yalawisa nawa meso ja tupuputa anji. 22 Iye yaakumbulula ngwenyi: “Yeenu nulweze Yoano yuma yize nwamona ni yize nwevwa: Tupuputa haliapwila kanamono, yitonji kanende, akwa-mbumba kanaapemesa, afwa-matwi kanevu, afu kanaahindwisa ni sango jipema kanajambujola kuli yiswale. 23 Kawaha yoze kechi kuwana chitalingiso muli yami.”
24 Muze tunganda twa Yoano haya, Yesu yaputuka kulweza mbunga hakutwala kuli Yoano ngwenyi: “Yika nwayanga ni kutala mu puya? Shina lumbungu unanyika ni fuji? 25 Mba yika nwayanga ni kutala? Shina mutu yoze unazala mahina alefuna? Waze akuzala mahina alefuna kakutwama mu mazuwo ja mianangana. 26 Mba yika nwayanga ni kutalako? Umwe profeta? Ewa, ngunanulweze ngwami, iye kanahiane chikolo profeta. 27 Yono mwe asonekene hakutwala kuli iye ngwo: ‘Tala! Mungutuma kanganda kami kulutwe lie, iye mwe makakululiekela jila.’ 28 Pundu ngunanulweze ngwami, hakachi ka waze akusemuka kuli mapwo, kukushi niumwe unahiana Yoano, alioze yoze uli mukehe mu Wanangana wa Zambi mwe unamuhiana.” 29 (Muze evwile chino, atu eswe ni akwa-kufwetesa lijimu yamba ngwo, Zambi kali mukwa-ululi, mumu kaapapachishile ni upapachiso wa Yoano. 30 Alioze, A-Fwariseu ni waze anyingika kanawa Shimbi, yalengulula upale wa Zambi hali ayo, mumu kakaapapachishile kuli Yoano.)
31 “Ni neya mungutesa atu a chisemuko chino, neya analifwu? 32 Kanalifu ni twanuke waze anatwame ha chisalo ni kukololoka kuli umwe ni mukwo ngwo: ‘Yetu twanwimbilanga ndembo, alioze yenu kunwahanganyine; yetu twalinyenganga, alioze yenu kunwalilile.’ 33 Chizechene nawa, Yoano Chipapachisa kanakeza kakalile mbolo chipwe kunwa vinyu, alioze yinumwamba ngwenu: ‘Iye kali ni ndemoniu.’ 34 Mwana-mutu keza ni kulia ni kunwa, alioze yenu nwakumwamba ngwenu: ‘Talenu! Lunga au kali chipulutu, mukwa-kunwa vinyu, sepa lia akwa-kufwetesa lijimu ni yivulumunyi!’ 35 Alioze, mana kakusoloka zwalala mu yitanga.”*
36 Umwe Ka-Fwariseu yanunga ni kumwita hanga alie nenyi hamuwika. Chocho Yesu yanjila mu zuwo lia Ka-Fwariseu wacho, yatwama ku mesa. 37 Umwe pwo yoze te anyingika mu mbonge ngwo chivulumunyi, muze hanyingika ngwenyi, Yesu kanali ku zuwo lia Ka-Fwariseu, yaya ni mulangi* wa alabasta wa maji a vumba lipema. 38 Iye yatwama kunyima lia Yesu, ku molu jenyi, yaputuka kulila ni kuulisa molu jenyi ni masoji ni kwakusumuna ni kambu jenyi. Yamumbejala nawa ku molu ni kuzujilako maji a vumba lipema. 39 Muze Ka-Fwariseu yoze wamuzumbwile hachimona, yamba mu mbunge yenyi ngwenyi: “Nyi lunga yono kali lume profeta, kachi kanyingika chize apwa pwo yoze unamukwata, ngwo kali chivulumunyi.” 40 Hachino, Yesu yamulweza ngwenyi: “Semone, ngunazange kukulweza chimwe chuma.” Iye yamba ngwenyi: “Hanjika, Longeshi.”
41 “Kwapwile malunga aali waze apwile ni kongo lia umwe-mukwa kuhana mikuli, umwe kapwile ni kongo lia 500 a ndenariu,* alioze mukwo 50. 42 Amu ayo kakapwile ni chuma nichimwe chakumufweta, iye yaakonekena eswe aali ni mbunge yeswe. Iya wa kuli ayo mamuzanga chinji?” 43 Semone yamukumbulula ngwenyi: “Ku nyonga liami yoze anakakonekena kongo linene.” Yesu yamulweza ngwenyi: “Wamba kanawa.” 44 Mba yatewulukila kuli pwo, yamba kuli Semone ngwenyi: “Unamono pwo au nyi? Nanjila mu zuwo lie kuwanguhele meya ngusane ku molu. Alioze pwo yono kaulisa molu jami ni masoji, ni kwakusumuna ni kambu jenyi. 45 Yena kuwanguhele mbeju niyimwe, alioze pwo yono chize haze nanjilanga mu zuwo lie, kalitwaminyine kumbejala molu jami. 46 Yena kuwazujile maji ha mutwe wami, alioze pwo yono kazuza maji a vumba lipema ku molu jami. 47 Kashika, ngunakulweza ngwami, shili yenyi chipwe ngwe yinji, hamukonekenayo. Mumu iye hazanga chinji, alioze mutu yoze akukonekena hakehe, kakuzanga hakehe.” 48 Mba Yesu yalweza pwo ngwenyi: “Shili ye hakukonekenayo.” 49 Waze te anatwama nenyi ku mesa yaputuka kulinyinguna umwe ni mukwo ngwo: “Au mwene mutu muka, chipwe shili kanayikonekena?” 50 Alioze, Yesu yalweza pwo ngwenyi: “Ufulielo we wakulamwina, yako ni sambukila.”